鴨脷洲發電廠

鴨脷洲發電廠係香港舊時一座發電廠，喺香港島區嘅鴨脷洲嘅西面。發電廠喺1968年開始初步投產，1971年發生五級大火，損失約莫千萬港紙。1978年正式取代北角發電廠，1981年全部起好同全面投產。發電廠採用燃油發電機組，總發電量大約係1,061兆瓦。

鴨脷洲發電廠

由於鴨脷洲發電廠接近已發展區，譬如鄰近嘅鴨脷洲邨，加埋和記黃埔收購香港電燈後，有意發展發電廠地皮做大型私人住宅項目，所以香港電燈開始積極研究將佢全數搬去南丫島。1989年12月31號，鴨脷洲發電廠正式閂門，香港島、鴨脷洲同南丫島嘅電力供應，由1990年起全數改由1984年起好嘅南丫發電廠負責。鴨脷洲發電廠原址就連同附近嘅蜆殼鴨脷洲油庫，發展做而家嘅大型私人屋苑海怡半島。