黃安

黃安（1962年12月8號—），原名黃宏銘，係中國大陸歌手。佢本嚟係臺灣歌手，憑一首《新鴛鴦蝴蝶夢》而出名，但之後星途一路都唔順利，2001年投共，入籍中華人民共和國。

爭議

黃安政治立場親中共，自封「臺獨剋星」，近年更加針對政見唔同嘅臺灣同香港藝人，向大陸當局「舉報」佢哋，令佢哋畀大陸當局「封殺」。

事例

單係2016年1月頭，黃安就已經有兩單「舉報」：

1. 「舉報」南韓組合TWICE嘅臺灣成員周子瑜喺南韓節目展示中華民國旗，誣衊佢係「臺獨分子」，令安徽衛視春晚節目封殺咗TWICE，最後逼到周子瑜喊曬口公開鞠躬道歉，講明「中國只有一個」，而Twice官網上面，周子瑜嘅出世地方亦由英文「Taiwan」改做簡體字嘅「中国台湾」。
2. 「舉報」香港藝人王喜喺facebook「褻瀆周恩來」，令佢喺中國中央電視台節目《了不起的挑戰》全程被打格仔。

批評

有人批評佢實際係兩面手法，以往響節目上揮舞中華民國旗、高唱「復我河山、救我同胞」嘅愛國歌，甚至揶揄大陸女性「我拿青春賭明天、不給小費算強姦」價值觀偏差嘅順口溜，打面佢「一邊罵台獨，一邊損大陸」。更有網友質疑，黃安瘋狂舉報台獨藝人，其實只係為咗掩護佢響節目上違規推銷可疑保健品。有人甚至話佢做綠營臥底。

引伸關於台灣保健制度嘅討論

雖然黃安經常歌頌中共政權，但係佢每次有病嘅時候都返去台灣使用保健睇病，令唔少台灣人不滿，亦引起咗台灣國內對於長期旅外國人享有台灣健保資源議題嘅關注。去到2020年11月，台灣健保署就計劃修改法例，將針對旅外國人停復保嘅制度進行修正，結果黃安相當不滿，喺微博發文重砲抨擊民進黨政府。