黃遵憲

黃遵憲（1848年4月27號—1905年3月28號），字公度，別號人境廬主人，喺廣東嘉應州出世，客家人。晚清詩人、外交官、政治人同教育家。

黃遵憲
出生日	1848年4月27號、1848年
出生地	Jiaying Zhou
死亡日	1905年3月28號、1905年  （56歲）
死亡地	Jiaying Zhou
國籍	大清
識嘅語言	中文
職業	詩人、外交官、教育學家
[改維基數據]

生平

道光二十八年（1848年）4月27號，黃遵憲喺廣東嘉應州（今梅州市梅縣區東區下市角）出世。4歲讀書，10歲學詩。

光緒二年（1876年）中舉人。

光緒三年（1877年）隨何如璋東渡出使日本。在任期間，就琉球問題同日本積極交涉。後來佢去美國、英國、星加坡等地擔任外交官。駐外期間，佢留心觀察所在國嘅事物，認為中國要革新自強，必須效法日本維新變法。佢撰寫《日本國志》，全書共四十卷，五十幾萬字，詳細論述日本變革嘅經過同埋得失，借此提出改革中國嘅主張。

光緒八年（1882年）春，調任駐美國三藩市總領事。當時美國借啲意逮捕大批華僑入獄，黃到監獄探望華僑，叫隨從丈量監獄。美官員冇聲出，唯有釋放華僑。1894年黃回國。

光緒二十一年（1895年），出任湖南按察使，喺巡撫陳寶箴支持下宣傳維新變法。光緒二十四年（1898年）八月，獲任命為出使日本大臣。戊戌變法失敗之後，俾清政府列為「從嚴懲辦」嘅維新亂黨，但由於外國駐華公使等干預，清政府允許黃辭職還鄉。光緒三十一年（1905年）3月28號，黃遵憲喺鄉下病逝，終年58歲。

詩人

梅州黃遵憲故居

黃遵憲係「詩界革命」主要人物。佢輯錄咗9首客家民歌，收入《人境廬詩草》。梁啟超話，「近世詩人，能鎔鑄新思想入舊風格者，當推黃公度」，「公度之詩，獨闢境界，卓然自立於二十世紀詩界中，群推為大家」。

思想

黃遵憲喺1882年（光緒八年）至1885年出任清政府駐美國三藩市總領事，親眼目睹1884年美國總統選舉，點不知噉冇啟迪佢思想革新，反而令佢越來越似保守派。佢作詩歌《紀事》記載美國總統大選嘅情况同佢嘅感觸，結論係「共和政體萬不能施行於今日之吾國」。

著作

• 《日本雜事詩》二卷
• 1898年，《日本國志》四十卷，1887年成書，光緒二十四年上海圖書集成印書局出版、浙江書局重刊。
• 1911年，《人境廬詩草》十一卷（1902年定稿），1911年刊印於日本。
• 吳振清等編：《黃遵憲集》，天津人民出版社。

相關書本

• 吳天任：《黃公度先生傳稿》
• 施吉瑞：〈排华时期黄遵宪智取旧金山海关襄助加拿大华人旅客之史实〉。