黃鳳琼

黃鳳琼，前香港演員，喺2014年移民去加拿大。

早年生涯

黃鳳琼係香港演藝學院畢業生，同李婉華、劉雅麗係同班同學，1988年參加無綫《銀河接力大賽》入行。

演藝生涯

多年演藝生涯，佢拍攝過數以百計部嘅劇集，但都係做一啲師奶或者北姑嘅閒角。觀眾較深刻作品，包括有《大時代》丁蟹（鄭少秋飾演）嘅走佬老婆，同埋電影《九品芝麻官》中段表哥常威（鄒兆龍飾演）有姦情嘅婉君表妹。

去到2012年，王維基成立香港電視網絡（HKTV）準備進軍免費電視行業，並招兵買馬力邀黃鳳琼加盟，但2013年時任行政長官梁振英聲稱『一籃子』因素否決發牌，最後黃鳳琼放棄佢嘅演藝夢移民。

政治立場

黃鳳琼可以被視為支持反修例運動但係無乜參與嘅公眾人士，亦對2012年之後嘅香港政府持負面態度。

喺2020年12月，黃鳳琼接受《香港蘋果日報》訪問，話港視不獲發牌，令佢對政府失望從而希望移民，當時佢亦有出席一啲支持港視嘅活動。另外佢又曾經話，如果佢當時仲喺香港，可能已經『被自殺』。