點 (單位)

點（英文：point，通常簡寫 pt），又有音譯做磅bong6，喺排版同平面設計，係種長度單位，用來量度字大細同行距等等。而今gaa1用緊嘅有三個叫點嘅單位，兩個係英制，一個係歐陸制，中文講點係指英制嘅點，大約或者等於 72 分之一吋；但係而今通常都係指 72 分之一吋。

點傳統上係指 72.27 分之一吋，而今坊間仍然可以買到一啲用點做單位嘅尺，上面標嘅都係爾種傳統嘅點。但係 Adobe 推出 PostScript 嗰陣，可能因為 72.27 分一嘅數值太怪，所以改咗做 72 分一吋，英文叫 PostScript point，有 1.00375 個傳統點咁大；而今喺電腦排版用嘅都多數係爾種大啲嘅點，包括一般嘅排版軟件、文書處理器、甚至係網頁都係用爾種 72 分一吋嘅點，少數例外包括 TeX 同 LaTeX，寫 pt 係指傳統嘅點，但係可以寫 bp（意思係 ｢大點｣）指 72 分一吋嘅點。

狄多點

喺歐洲大陸，傳統上佢哋並唔係用英制嘅點，而係自己有另外一個同名嘅單位，中文跟英文圈嘅叫法叫佢做狄多點（英文：Didot point），一個狄多點等於 1238/1157 個傳統嘅英制點，本來係個法國單位，狄多點大過傳統嘅點少少，大約等於 1.063 個傳統點，或者 1.059 個 72 分一吋嘅點。