行距

行距 （粵拼：hong4 koei5；英文：leading，英文讀音：/ˈlɛdɪŋ/，意思係 ｢鉛嘢｣，又叫 interlinear spacing；喺書法叫 interlinear space，喺文書處理叫 line spacing，意思係 ｢行距｣），以前喺排版叫字身大細（body size），喺排版、平面設計同英文書法，係指基綫同基綫之間嘅距離。喺以前字粒排版嘅時代，排版講嘅行距由兩部分組成，分別係字大細（指字粒嘅大細）同行隔（以前叫 leading），但係喺照相植字嗰陣已經變咗指 ｢菲林前向量｣ 或者 ｢相紙進給量｣；到咗而今gaa1，電腦排版根深蒂固，已經冇人講行隔，淨係會講行距。

行距

喺排版同平面設計，行距係控制行與行之間節奏嘅主要方法，所以通常唔會好似用文書處理器咁畀行距自由浮動，而係由設計師或者排版師傅事先決定，等排出來嘅內容唔會覺得雜亂無章。喺排版軟件，除咗固定行距之外，亦都可以用 ｢基綫格點｣（baseline grid）之類嘅功能來將行距量化。

所謂 ｢基綫格點｣ 係指固定嘅行距所構成嘅格點（grid）。如果事先揀嘅行距全部都有倍數嘅關係，我哋話呢個 ｢基綫格點｣ 構成 ｢交叉對應｣（cross alignment），即係話所有㨂咗嘅行距，用同一套基綫格點，最多都只係會浮浮下，但係唔會對唔正。

理想嘅行距並冇一定準則，因為除咗要睇字形同字大細之外，亦要睇埋行寛，每一行越濶，行距亦要越大；所以文書處理器、網頁瀏覽器、甚至排版軟件等等預設咗行距係字大細嘅某個固定倍數，其實並唔啱，因為冇理到其餘兩個變數。

喺 CSS（網頁同電子書製作）行距叫 line-height（行高），並唔係排版同書法嘅傳統用字。