1964年夏季奧林匹克運動會

1964年夏季奧林匹克運動會係第18屆現代奧林匹克運動會，1964年10月10號到10月24號喺日本東京搞。

背景

對於二次大戰之後經歷現代化過程嘅日本人嚟講，1964年嘅東京奧運意義真係好大。之前東京曾經計劃承辦1940年奧運會，但係因為發動侵華戰爭搞到當時嘅國際關係惡劣而流產。

太平洋戰爭打完之後，作為主要戰敗國之一嘅日本嘅地位更一敗塗地。1964年，東京終於成功申辦奧運會，對比下成為咗日本重拾自信嘅改革象徵，係經濟急速恢復、轉型和平政治嘅重要國家記憶，因此後尾日本人對於奧運會嘅申辦有住零舍特殊嘅感情。所以東京後尾响2020年又再次申辦夏季奧林匹克運動會，從而成為亞洲第一個兩次主辦夏季奧運會嘅城市同國家（由於2020年武肺大爆發嘅關係，2020年夏季奧林匹克運動會已被褪後到2021年）。

呢屆奧運一共有94個國家地區派出代表團參賽，當中有16個國家第一次派代表團參加夏季奧運，包括阿爾及利亞、喀麥隆、乍得、剛果共和國、象牙海岸、多明尼加共和國、利比亞、馬達加斯加、馬來西亞、馬里、蒙古人民共和國、尼泊爾、尼日爾、贊比亞、塞內加爾、坦桑尼亞，但係利比亞代表隊响奧運開幕禮後退出賽事，因此參賽國家同地區數目其實係93個。

賽事焦點

• 南非共和國因為大搞種族隔離政策，亦喺呢屆奧運會開始被禁止參賽，直到1992年，當南非政府廢除隔離政策之後，先至獲國際奧委會批准，喺1992年巴塞羅拿奧運會當中亮相。
• 印尼因為力撐中華人民共和國，反對中華民國參加1962年雅加達亞運，而畀國際奧委會暫停會籍，因為咁，印尼拒絕參加呢屆奧運會，直到1968年墨西哥城奧運會先至再次派隊參加（嗰陣時蘇哈托已經上台）。
• 北韓原本亦有份參與呢屆奧運會，但係有部分北韓選手曾經參加1963年嘅新興力量運動會（當時，國際奧委會阿頭布倫達治認為，新興力量運動會係「政治干預體育運動」嘅舉動），搞到國際體育組織處罰曾經參加呢項運動會嘅北韓選手，搞到一啲北韓選手攞唔到奧運資格，於是响1964年10月8號，北韓宣告全體運動員退出比賽以示抗議，直到8年之後嘅慕尼黑夏季奧運會先至蒲頭。
• 柔道同排球項目喺呢屆奧運會，正式加入奧運項目大家庭。