朝鮮民主主義人民共和國

 朝鮮民主主義人民共和國（粵拼：ciu4 sin1 man4 zyu2 zyu2 ji6 jan4 man4 gung6 wo4 gwok3） （朝鮮本讀椒仙；朝鮮文：조선민주주의인민공화국／朝鮮民主主義人民共和國 ^{Chosŏn Minju-chuŭi Inmin Konghwakuk}），簡稱朝鮮（조선/朝鮮^Chosŏn），係東北亞朝鮮半島北部一個國。佢嘅首都同最大城市都係平壤。國北同中國為鄰，以鴨綠江為界；東北同俄羅斯為鄰，以圖們江為界；南同大韓民國為鄰，以三八線為界。東面係日本海，西面係黃海。

朝鮮民主主義人民共和國 조선민주주의인민공화국（朝鮮文）
通稱：朝鮮／北朝鮮／北韓
旗 徽
格言：「強盛大國」（강성대국）
國歌：《愛國歌 (北韓)》
屬地（實轄）
幅員 國土：120,538平方公里（世界第98名） 水域：0.11%
首都	平壤
中央政府 所在地	平壤
最大城市	平壤
至高地	長白山
至長河	鴨綠江
至大湖	長津湖
海岸線長	2,496公里
時區	平壤時間：UTC+9
國民
人數	以下係2024嘅估計數字 人數： 26,298,666（世界第54名） 人口密度：218人/km2（世界第45名）
官方語言	朝鮮語
官方文字	韓文
民族	朝鮮族
曆法	公曆、農曆、主體紀元
主要節日	元旦、春節、太陽節、光明星節
行車方向	靠右行駛
家用電源 電壓：220V 插座：C、E 頻率：60Hz
政制
國家憲法	《朝鮮民主主義人民共和國社會主義憲法》
國家結構形式	單一制
國家政權	最高人民會議 朝鮮國務委員會
政制	議行合一、世襲專政
法律體系	歐陸法系
主要領袖 最高領袖（朝鮮勞動黨總書記）：金正恩 國家元首（國務委員會委員長）：金正恩 政府代表（最高人民會議常任委員長）：崔龍海 政府首腦（內閣總理）：金德訓
其他領袖（一黨執政、金日成家族世襲專政） 國務委員會（第一副委員長）：崔龍海 國務委員會（副委員長）：朴奉珠 最高人民會議（議長）：朴泰成
經濟
GDP（購買力平價） 以下係2015年嘅估計數字 總計：$400億（第139名） 人均：$1,700（第184名）
GDP（國際匯率） 以下係2022年嘅估計數字 總計：$151.76億（第137名） 人均：$590
HDI 以下係2016年嘅估計數字 0.564（第195名）－中
中央銀行	朝鮮民主主義人民共和國中央銀行
貨幣	朝鮮圓（KPW，₩）
資訊
立國歷史 立國日期：1948年9月9號 立國事件：朝鮮民主主義人民共和國成立
國家象徵	國父：金日成 國花：迎紅杜鵑（金達萊）
國家代碼	PRK/DPRK
國際域名縮寫	.kp
國際電話區號	+850
現役軍人數	1,200,000（第5名）

朝鮮民主主義人民共和國
諺文	조선민주주의인민공화국
朝鮮漢字	朝鮮民主主義人民共和國
文觀部式	Joseon Minjujuwi Inmin Gunghwaguk
馬-賴式	Chosŏn Minjuchuŭi Inmin Konghwakuk

朝鮮歷史系列
前史	櫛文土器時代 無文土器時代
古朝鮮 前2333年─前108年	衞滿朝鮮 前194年─前108年
原三國 前300年─前57年	三韓					辰國		東 濊	沃 沮	扶 餘	高 句 麗
	馬 韓		弁 韓	辰 韓
三國 前57年──668年			伽倻 42年──562年	百濟 前18年──660年				高 句 麗 前37年──668年
	新羅 前57年──935年
南北國 698年──926年	統一新羅 668年──935年							渤海國 698年──926年
後三國 892年──936年	後高句麗 後百濟 新羅
高麗朝 918年──1392年
朝鮮朝 1392年──1897年
大韓帝國 1897年──1910年
日殖時期 1910年──1945年 臨時政府 1919年──1948年
南北分治 1945年至今
北朝鮮						南韓

呢個國家嗌自己做「朝鮮」。中華人民共和國喺1949年10月6同北韓建交嗰陣，叫佢做「朝鮮」，而南韓叫「南朝鮮」。當時中華人民共和國同北韓係同一陣營，而美國同大韓民國、日本等地係另一陣營。現時以中立立場，南面大韓民國簡稱「韓國」或者「南韓」，響北面嘅朝鮮民主主義人民共和國簡稱做「朝鮮」或者「北朝鮮」（bak1 ciu4 sin1；북조선/北朝鮮^Pukchosŏn）。「北朝鮮」嘅名喺中國大陸、日本常用，而南韓、港澳臺就習慣用「北韓」（bak1 hon4；북한/北韓^Bukhan），此外越南習慣直接用「朝鮮」。而喺兩廣嘅粵語區，北韓同北朝鮮、朝鮮呢三個用語都有人用。

由1945年建國到而家都係俾金氏政權世襲嘅朝鮮勞動黨統治，喺國際上非常之孤立。而家阿頭係金正恩，做緊朝鮮勞動黨委員長同國務委員會委員長，有共和國元帥軍銜，係最後生嘅非君主制國家領導人之一。

國名

1392年，李成桂喺松京（今開城）壽昌宮正式登基，準備咗兩個新國號「朝鮮」（古朝鮮國名）同「和寧」（成桂阿爸李子春發跡嘅地方），奏請明太祖朱元璋決定，朱元璋圈定朝鮮呢兩個字，意思係「清晨之國」、「朝日鮮明之國」，於是李成桂改用國名「朝鮮」。根據《東國輿地勝覽》（1481年）記載，「國在東方，先受朝日之光輝，故名朝鮮。」

中華人民共和國政府將朝鮮民主主義人民共和國簡稱「朝鮮」，而中華民國政府、香港、澳門以及其他華人就習慣叫佢做「北韓」。

讀音

• 中華人民共和國 普通話：Cháoxiǎn（ㄔㄠˊ ㄒㄧㄢˇ）
• 粵語（廣東話）：港澳一般叫「北韓」。大陸多數人會用朝鮮；新生代讀音同「潮鮮」（ciu4 sin1），舊輩讀音同「招鮮」。

政治

北韓由朝鮮勞動黨一黨執政，最高領導人係總書記。北韓喺1998年修改憲法，唔再設國家主席一職（永遠由已故主席金日成保留），撤銷原本係國家權力最高領導機關嘅中央人民委員會。內閣而家係國家最高權力嘅行政執行機關，由總理領導，任期5年，政府各部變咗做內閣各省。最高軍事權力機關係朝鮮勞動黨中央軍事委員會，最高權力機構係國務委員會，由最高人民會議選舉產生，最高人民會議常任委員會委員長係北韓對外嘅國家代表。

政區

北韓全國劃分為9個道（도）、2個直轄市（직할시）、同3個特區：

• 平壤市（평양시）
• 羅先市（라선시）
• 開城工業地區（개성공업지구）
• 金剛山觀光地區（금강산관광지구）
• 新義州特別行政區（신의주특별행정구）
• 慈江道（자강도）
• 咸鏡北道（함경북도）
• 咸鏡南道（함경남도）
• 黃海北道（황해북도）
• 黃海南道（황해남도）
• 江原道（강원도）
• 平安北道（평안북도）
• 平安南道（평안남도）
• 兩江道（량강도）

地理

朝鮮半島從亞洲大陸向南延伸大約1,100公里，西面有黃海同朝鮮灣，東部臨日本海（個名重有爭議，朝鮮人稱為東海），南部就有朝鮮海峽（對馬海峽）同埋東中國海（朝鮮人稱為南海）。北部多為山區，東北地區好多深狹嘅山谷，而海岸平原大部分都喺西部地區。北韓最高峰係白頭山，海拔2,744米。主要河流就有分割朝中邊界嘅鴨綠江同埋圖們江。

北韓屬於溫帶季風氣候，夏天嘅雨季降雨都叫多，冬天就好凍。北韓而家最大城市係首都平壤。

商業

朝鮮嘅商業差唔多全部由國家控制。商店分咗做便民店、國營店同埋外匯商店。外匯商店賣各種進口嘅商品，多數嚟自中國，好似食物、傢私、電器等。外匯商店只係收美元、歐元同人民幣三種貨幣。經濟改革後，外匯商店由原本用美元標價改咗做歐元，但重可以用美元。外國人喺朝鮮用朝鮮圓，要出示外匯兌換證明。朝鮮嘅國營商店賣嘅全部都係本國產品，但係成日冇貨。朝鮮便民店嘅嘢多數都係由中國進口。喺朝鮮，喺便民店以外嘅商店買嘢嘅人好少。

網絡通訊

2000年，朝鮮整咗個覆蓋全國，面向國內普通老百姓嘅電腦網絡，稱為「光明網」。但係電腦喺朝鮮嘅普及率好低，有冇成效係一個疑問。

但近年朝鮮政府大力推廣，朝鮮嘅中小學校、少年宮、大專院校、政府機關、工廠同圖書館入面都提供大量自行開發、朝鮮文嘅作業系統畀民眾隨便用。

電話區碼

• 國碼：850
  • 平壤：02
  • 清津：73
  • 羅先：08
  • 平壤外交機構：19
• 流動電話（Mobile）用緊GSM流動通訊制式。
  • 朝鮮用7位數字嘅流動電話號碼，好似：193 XXXX

旅遊

去朝鮮旅遊要有官方導遊陪同。朝鮮為防範外國間諜從事破壞活動，未經允許唔畀任意遊覽、影相或者向朝鮮人散發任何嘢。朝鮮向南韓開闢金剛山觀光特區做遊覽地。

參考

• Made in North Korea 朝鮮民主主義人民共和國 國立 金日成綜合大學

出面網頁

• 〈国家概况 — 中华人民共和国外交部〉 (簡體中文)。中華人民共和國外交部。
• 〈朝鮮民主主義人民共和國 Democratic People's Republic of Korea - 亞太地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "North Korea - United States Department of State" (英文). 美國國務院.
• 朝鮮民主主義人民共和國喺中央情報局《世界概況》嘅資料 （英文）
• 〈北朝鮮 ｜ 外務省〉 (日文)。日本外務省。
• "Democratic People's Republic of Korea (North Korea) - Department of Foreign Affairs and Trade" (英文). 澳洲外交貿易部.