2021年大埔公路雙層巴士失事

2021年11月18號夜晚大約11點，大埔公路大圍段一架九巴88K線雙層巴士翻側，造成1死11傷。一名37歲男乘客頭部重傷，當場證實死亡，另外58歲男巴士司機、1名男乘客同9名女乘客受傷，被送往伊利沙伯醫院同威爾斯親王醫院救治。司機通過酒精呼氣測試，涉嫌危險駕駛引致他人死亡同危險駕駛引致他人身體受嚴重傷害被捕。

意外過程

夜晚大約11點16分，涉事司機揸住架九巴88K線雙層巴士沿大埔公路大圍段往顯徑方向行駛，駛經成運路橋面時，車長懷疑因為行錯路，扭軚轉線失事撞石壆向左翻側，多名乘客被困。

救援

事發之後，一位駛經現場嘅的士司機梁先生見到即刻停車，同幾位市民一齊打爛巴士玻璃救人。

高級消防隊長鄭銘生表示，事發後3分鐘已經到達現場，共派出8架消防車、14架救護車次、31名消防員及36名救護員到現場拯救，喺到場後16分鐘將全部傷者救出，分別送往威爾斯醫院同伊利沙伯醫院。高級救護主任林景祺指，傷者共有3男9女，年齡介乎19至70歲，其中1人當場死亡，另有1人內出血重傷，其餘多為擦傷。

各界回應

市民回應

有大圍居民指出，事發地點係出九龍嘅必經之路，但係88K線係由駿景園開去顯徑，唔應該經過嗰個位，巴士司機應該係行錯路。

九巴回應

九巴安全總監關翠蘭同行政總監許鎮德指，涉事車長駕駛紀錄普通，過去3年發生過3宗輕微意外，對上一宗係2021年年初，同輕型客貨車相撞發生輕微意外，當時已為車長提供輔助訓練，車長亦已經完成相關訓練；又話有關司機嘅駕駛經驗足夠，九巴對呢次意外十分重視，會全力配合調查。

汽車交通運輸業總工會九龍巴士分會回應

肇事司機據報一日要揸幾條線，搞到撈亂咗路線。工會九龍巴士分會主任黎兆聰表示，多年前運輸署同工會、公司協定指示車長每日只可以揸3條線，但工會曾接獲其他車長投訴，曾一日接獲5個order（揸5條線），質疑安排係有違協定。女車長陳淑萍表示，佢自己都要揸3條線，包括46X、286X同涉事嘅88K，3條線嘅路線有一部份相同，例如有成6至7個站相同，佢自己亦都試過行錯路，又話涉事車長一向駕駛態度良好，唔係粗心大意嘅人。

黎兆聰又話，一發生意外九巴管理層就話涉事車長駕駛紀錄普通，年初曾涉及一單同輕型貨車相撞嘅輕微意外，有關言論係同車長「割席」，強調呢啲輕微碰撞係好常見。九巴就回應所有車長嘅編更及工作安排都符合甚至好過政府指引。