Backdoor (電腦)

Backdoor（粵拼：bek1 do1 aa4；又有譯做軟件後門）係指一個電腦系統或者網絡有方法俾人避開一般鑑別（即係入密碼等鑑別身份嘅過程）同保安控制就可以進入，搞到黑客等嘅人物有能力攞到一啲唔應該攞到嘅數據。

部電腦嘅系統有冇後門（正常以外嘅進入途徑）呢？

舉個簡單例子，軟件工程師製作軟件嗰陣，好多時都會將隻軟件設定成用家要入密碼或者用第啲方法做鑑別，確定咗佢身份，先至准佢哋用隻軟件；同時軟件工程師好多時又會特登設計一啲另類嘅方法，畀用家唔使做呢啲鑑別就用到隻軟件－用意可能係想（例如）確保技術人員能夠喺用家唔記得咗自己密碼嗰時照行隻軟件，從而幫用家 reset 密碼。不過事實表明，黑客等嘅惡意人物成日會利用呢啲噉嘅 backdoor 嚟偷取資訊。

攻擊

攻擊方要用 backdoor 攻擊，可以有多種途徑。最直接嗰種方法，可能攻擊方對佢想攻擊嗰個系統或者嗰隻軟件好熟，甚至知個系統或者隻軟件嘅源碼，知道（例如）喺開咗隻軟件之後撳某段掣再入某段密碼，就能夠直接略過正常鑑別程序，直接用到隻軟件嘅，於是就用呢種方法攻擊；亦都有一種做法係用某啲方法（例如釣魚）吸引用家 download 隻惡意程式，然後隻惡意程式會喺用家唔為意嗰陣 download 第啲惡意程式，等呢啲其他惡意程式唔使經用家同意就入到用家部電腦－帶頭嗰隻惡意程式可以算係一道由黑客自己整、再擺落用家部電腦度嘅 backdoor 。

睇埋

• 電腦保安
• 源碼