香港科技探索

(由HKTV跳轉過嚟)
  呢篇文講嘅唔係香港電視娛樂
  「HKTV」跳轉到呢度。有關香港電視嘅其他意思,請睇「香港電視」。

香港科技探索有限公司Hong Kong Technology Venture Company LimitedHK TECH VENTURE港交所1137OTCBBHKTVY),以前叫香港電視網絡有限公司Hong Kong Television Network LimitedHKTV,簡稱香港電視港視),係香港一間電子商貿公司,前身係1992年5月喺香港正式成立嘅城市電訊。1997年8月,城市電訊喺香港聯合交易所招股上市,1999年11月喺美國預託證券形式掛牌上市。員工約莫3,000人。香港電視網絡曾經從事電視節目製作,喺2009年開始準備申請免費電視牌照,但2013年政府用「一籃子因素」做理由唔批,引發咗好大爭議。佢地喺2014年11月19號正式以OTT方式開台,同年12月開始提供網上購物服務HKTV Mall,但2015年打後再無新節目首播,2018年3月正式宣佈放棄電視業務,唔再申請免費電視牌照。

重要人物 編輯

歷史 編輯

城市電訊成立之時,香港嘅固網電話服務係由香港電訊(家下電訊盈科)壟斷,國際長途電話(IDD)服務好貴。1992年9月,城市電訊推出888國際電話卡服務,以較平嘅價錢、積極嘅營銷策略,打破香港電訊業嘅壟斷。

城市電訊都成立咗附屬公司香港寬頻網絡有限公司(「香港寬頻」,「HKBN」),提供IDD0030、家居電話、寬頻上網、電視、2b電話等服務。2000年2月,香港寬頻攞到本地無線固網服務牌照。同年3月,香港寬頻推出寬頻互聯網服務。2003年8月,香港寬頻推出收費電視服務。2005年5月香港寬頻將IP電視服務命名為「香港寬頻數碼電視」。2007年5月,香港寬頻革新旗下IP電視服務,重改名做「bbTV」。2008年1月,香港寬頻率先喺公共屋邨提供免費WiFi無線上網服務。

2009年12月31號,城市電訊宣佈申請免費電視牌照。

2012年12月5號,城市電訊建議將中文名由「城市電訊(香港)有限公司」改為「香港電視網絡有限公司」,而英文名就由「City Telecom (H.K.) Limited」改為「Hong Kong Television Network Limited」,認為改公司名可以更準確反映集團嘅主要業務,為公司提供一個全新嘅企業形象身份,將明顯有利於公司未來嘅業務發展。

2013年10月15號,行政長官會同行政會議宣佈唔接納香港電視網絡嘅免費電視牌照申請,但以「一籃子」因素同埋行會保密條例為理由唔講點解唔批,引發十二萬人喺2013年10月20號上街示威。

2014年11月19號朝早6點,香港電視開始提供點播,同日晚黑8點開始直播[1];同年12月開始提供網上購物服務HKTV Mall

2015年,由於廣告收入逐漸走下坡,香港電視網絡宣布喺攞到免費電視牌之前,暫時唔製作自製節目。

2018年3月,香港電視網絡宣佈唔再申請免費電視牌照,同時將網上電視同流動電視停播。

2020年2月,受惠武漢肺炎疫情帶動銷售額急升,香港電視網絡股價屢創新高,市值喺2月10號超過咗佢舊時競爭對手電視廣播有限公司

2021年7月13號,香港電視網絡改名叫香港科技探索,英文名由「Hong Kong Television Network Limited」改名為「HK TECH VENTURE」,但英文簡稱咁啱得咁橋係「HKTV」行頭,7月22號上市名亦改成呢個名。

節目 編輯

劇集 編輯

《還來得及再愛你》、《驚異世紀》、《童話戀曲201314》、《第二人生》、《警界線》、《三面形醫》、《開腦儆探》、《來生不做香港人》、《導火新聞線》、《我阿媽係黑玫瑰》、《歲月樓情》、《天網》、《四年B班》、《大眾情性》、《末日+5》同《選戰》。

其他 編輯

《挑戰》、《飄》、《爆Talk》、《食的秘密》、《奧比斯救盲之旅》同《發現宮崎‬》。電視購物節目《Shopping Hero》。

收睇方式 編輯

可以透過以下方法收睇[2](已停播):

  1. TV Box
  2. 智能電視(僅直播)
  3. 電腦
  4. 平板電腦
  5. 智能電話
  6. PlayStation 4
  7. Xbox One

旗下機構 編輯

  • 香港媒體製作有限公司[3]

編輯

  1. 視公開節目時間表 早上6點起有劇睇 - U HK 港生活. 喺2014-11-20搵到.
  2. 何收看|香港電視. 原著喺2014-11-21歸檔. 喺2014-11-20搵到.
  3. 城市電訊銳意打造世界級多媒體創作中心 創意之門 由此打開

出面網頁 編輯