南蒙古人權信息中心（Southern Mongolian Human Rights Center）發放消息，話內蒙古 教育部門喺26號宣佈咗要新學年開始強令啲學校用漢語 取代蒙古語 教學，連日嚟引發咗南蒙古民眾嘅不滿，當地出現大規模嘅「公民不服從」抗議運動。據報喺南蒙古各地嘅學生、家長同教師都發起咗抵制，唔少學校課堂就變吉嗮。而唔少學生仲著咗傳統嘅蒙古裝落街抗議，多間學校都有家長要求接返走啲仔女。喺離呼和浩特 成千公里遠嘅扎魯特旗，當地嘅蒙語學校度有數百名家長要求接返仲住宿嘅仔女，卻俾差人架起啲鐵馬阻著嗮，喺對峙幾個鐘後，大批家長成功咁衝破咗差佬嘅防線同接走啲後生仔女。(自由時報) (青年日報) (立場新聞)
44歲嘅俄羅斯 反對派人物阿力西·拿華連兒 （Alexei Navalny）一直係俄羅斯 總統普京 （Vladimir Putin）最大聲嘅批評者之一，咁多年以來組織多次抗議，亦多次俾人落毒。呢位反普京人士8月19號朝早搭飛機由西伯利亞 飛返首都莫斯科 嘅途中突然不適陷入昏迷。佢搭嘅班機即刻緊急降落係西伯利亞城市鄂木斯克 （Omsk）。醫生話佢當時已經處於昏迷狀態。佢嘅發言人同隊友懷疑有人喺機場一間咖啡廳內，喺佢杯茶裏面放咗一啲嘢，疑似被「落毒」。負責醫佢嘅其中一位醫生話目前仲未可以確定係被落毒。2017年呢位反政府人士俾人淋綠油，右眼遭受到嚴重嘅化學灼傷造成暫時性失明。2019年9月俄羅斯舉行地方選舉，俄羅斯當局以遊行未批准為由將佢同另外幾位反對派人士拘留30日。服刑期間佢出現臉部腫脹嘅疑似中毒過敏症狀，被緊急送院。(上報) (香港電台) (BBC)
雖然每年非洲 嘅尼羅河 都會因為暴雨而氾濫，但係今年雨季都未真係開始蘇丹 就已經因為洪災造成最少65人死亡，並摧毀30,000幾間房屋，有近700隻牛死亡。蘇丹 新聞社報導，由於天氣惡劣，有差唔多2,000名金礦工被困喺加達里夫州東部嘅兩個礦山中。蘇丹氣象部門預測，至少大半個八月嘅降雨量都將會高於平均水平，繼而導致進一步嘅洪水氾濫。當地官員努賽巴·法魯克·卡洛爾（Nusaiba Farouk Kalol）同美聯社通電話，話暴雨搞到個布特大壩倒塌。蘇丹洪水氾濫一大部份嘅原因係基礎設施落後，下水道系統同埋去水渠功能不足。(AfricaNews) (Al Jazeera) (Relief Web)
上萬嘅泰國人係曼谷 嘅民主紀念碑（Democracy Monument）示威遊行集會，高呼佢哋嘅三大訴求。呢次係自從2014年軍事政變以來最大規模嘅群眾示威抗議。一個月前嘅18號由學生團體自由青年（Free Youth）舉辦嘅集會亦都係喺呢度進行。(yahoo) 呢一個月泰國政府都冇乜回應呢班學生嘅請願，仲喺7月撤銷咗紅牛 （Red Bull）提神飲品集團共同創辦人許書標（Chaleo Yoovidhya）個孫沃拉育（VorayuthYoovidhya）涉嫌2012年喺曼谷揸法拉利 撞死警察後肇事逃去，魯莽駕駛等罪嫌，更加令到群眾憤怒。 (中央廣播電臺) 之後喺 8月 7號，泰國政府又以煽動為由逮捕咗人權律師Anon同埋學生領袖Panupong。泰國警方更喺8月15號逮捕知名學生運動領袖巴利（Parit Chiwarak），罪名包括煽動、攻擊以及舉辦可能會散布武漢肺炎嘅集會。群眾嘅三大訴求係 一) 解散軍政府國會要求政府進行全面改革，二) 要求重寫2017年嘅軍事憲法，因為佢哋認為嗰個憲法歪曲咗舊年嘅選舉結果同偏向軍事結盟嘅政黨，三) 停止打壓異議人士，即係要言論自由。(星島日報)
白俄羅斯 嘅選舉喺8月9號舉行。喺8月10號長期總統盧卡申科 （Alexander Lukashenko）獲得80.23％選票壓倒性勝利。總統候選人季哈諾夫斯卡婭（Svetlana Tikhanovskaya）唔承認選舉結果，話選舉「舞弊」，同埋要求重新計算票數。第二晚爆發抗議活動。季哈諾夫斯卡婭繼承咗佢因為參選總統而被捕坐緊監嘅老公，但係季哈諾夫斯卡婭8月11號流亡咗去立陶宛 因為當權者捉咗佢幾個助選團員。(BBC中文)
南韓 中部連續42天的雷電交加嘅暴雨已經令 13人死亡、7人受傷、13人失踪，同1025人受災。數字每日增加，同埋未來幾日嘅雨勢都冇減少嘅跡象，起碼繼續落到下個禮拜。5條鐵路已經停駛。(韓聯社) (中時新聞網)
