開閂掣

開閂掣（英文：switch），簡稱開閂，又叫開關掣、開關，係指可以控制電流通唔通過到電路嘅電子元件。

開閂掣符號（常開掣）

各種開閂掣

邏輯同分類

理想化嘅單隻開關掣有兩種輸入狀態，即常態（0）同受激態（1）；同時輸出亦都有兩種，即斷路（開路，「0」）同通路（閉埋，「1」）。根據輸入輸出搭配嘅唔同，可以分成常開掣同常閉掣：

輸入輸出狀態表

輸入		0	1
輸 出	常開掣	0	1
	常閉掣	1	0

一個開關掣配幾條輸出線，可以揀某條線通，放其他線斷；幾迾開關掣又可以連埋，構成一輸入多輸出嘅掣陣迾。

物理實現

最簡單嘅電路開關掣，個物理形式係由兩粒導電嘅觸點同埋必要嘅引線、外部接點、支撐嘢、絕緣層等等組成。啲觸點互相掂到嗰陣時就通路，冇掂到就斷路。常開嘅話，未激嗰陣兩粒觸點就閬開，常閉嘅話兩粒觸點就衲埋。邇種開關掣有一種比較常見嘅機械形式係鍘刀掣：佢個鍘刀形嘅導體一便衲住一個支點，喺一定角度內旋轉得；刀頂褦有一粒觸點（又或者把刀本身就作為觸點），同底座個觸點衲埋就通路。呢種鍘刀掣都係電路圖裏便開閂掣符號嘅來源。觸點掣仲可以有好多變體，譬如順磁性嘅導體（譬如鐵片）做成嘅磁簧管、依靠電磁感應細電流電路加順磁體控制大電流開關嘅電磁繼電器等等。

雖然結構簡單，觸點掣都有好多機械限制。第一，啲觸點易受磨折、氧化等影響導致接觸不良；第二，啲觸點之間純粹靠空氣等等作為絕緣嘢、喺高壓電或者濕電嘅場合之下好容易捱擊穿、導致短路故障；第三，喺啲觸點互相掂到嘅嗰陣、由於支撐機構啲材料嘅彈性而令到短時間之內啲觸點互相重複掂唨好幾下嘅現象，個輸出就會短時間快速切換好多次，跟住令到後續電路出錯（譬如倚賴跳變沿計數嘅計數器計多唨幾次）。所以喺單純嘅觸點掣之外，仲有好多非純粹機械式、又或者直程非機械嘅開關掣用於一啲特別嘅場合，譬如光電開關、壓電開關、Hall開關、三極管開關等等。

睇埋

• 繼電器（Relay）