維基百科

Wikipedia:咪嚇新人

維基百科嘅指引
內容
自傳
利益衝突
唔好照抄原始料
搞清楚
唔好惡作劇
亂噏一通
用戶頁
條目包含
知名度
分類
子頁面
模
一覽
頁面分類
編輯
勇於更新頁面
構築網絡
編輯摘要
文章大細
討論
討論頁指導方針
在討論頁上簽名
文入便唔好有免責聲明
態度
禮儀
唔好傷害新手
唔好為咗闡釋觀點而搞亂維基百科
格式
格式手冊

睇埋：方針


維基百科入面嘅文之得以改善，除咗係一班常客努力執文嘅成果之外，亦都係透過一羣新手嘅好多嘅無名奉獻。要記住我哋喺維基百科個個都曾經係新手；況且，喺某啲情形下（例如我哋執一啲講我哋知識範圍以外嘅嘢嘅文），就算係最有經驗嘅編輯都可以仲係新手。

凡係新人，將來都可能會寫文、執文，所以新人係維基百科最寶貴嘅資源，所以要對新人友善、有耐性。冇嘢嚇走新手快得過對佢哋懷有敵意。你好難要新手喺開始執文之前就識哂維基百科嘅所有政策、指引同社群嘅標準⸺唔好話新手，就算最有經驗嘅編輯都間中要人提。

唔該唔好咬新人

編輯
  • 粵文維基嘅社羣需要新手，新手對粵維社羣好。點解呢？因為當我哋令新手覺得可以做嘢嘅時候，維基百科就有更廣嘅知識、更濶嘅視野、更好嘅理想，即係結果就係令維基百科更中立、更完整，成為更加有價值嘅資源。事實上，英文維基發現大部分冇被人鏟走嘅新內容（即係 substantive edits[1]）好多時都係新人加上去嘅；大部份嘅修改固然係圈內人同管理員做，但係佢哋做嘅嘢好多時係細執、打回頭、排過啲內容嘅先後次序等等[2][3]。
  • 記住，｢放膽!｣ 係我哋嘅口號，我哋亦都真係有叫啲新手 ｢放膽｣⸺我哋故然有我哋嘅規矩、我哋嘅標準、我哋嘅傳統，但係維持爾哋規矩、標準同傳統嘅同時亦都唔可以阻止新手聽我哋講放膽做嘢。規矩還規矩，標準還標準，新手帶來嘅係新恁頭、創意同喺其他領域得來嘅經驗，所以對粵維社羣、對維基百科整體都可能有正面嘅影響；而今嘅規矩同標準可能要改，或者可能要加嘢，又或者新手做嘅所謂 ｢錯｣ 嘢終歸會令維基百科好啲。所以要觀察一段時間，睇清楚個新手究竟試緊做乜，先至好話佢做得唔好或者係直接 ｢錯｣。
  • 如果新人犯咗小錯（例如中文書名冇用書名號），你大可以自己改返啱佢，唔好下下鬧人。記住爾度人人都可以改文，所以掉轉來講個個人嘅責任都係執文，而唔係去管人。
  • 如果你覺得一定要同個新手講佢犯咗嘅某個錯，唔該有啲建設性，唔好對佢唔尊重⸺最好喺佢個用戶版歡迎下佢先，等佢知道你歡迎佢，然後先平心靜氣咁講，唔好高高在上，要當佢係同級；如果有嘅話最好講埋佢有乜做得好。
  • 新手可能唔知改文會留底，所以佢哋寫嘅嘢被人刪咗，就可能會以為辛辛苦苦打咗幾個鐘嘅嘢就咁冇哂，結果一係就好驚，一係就搞到編輯戰，一係就索性走人。最好平心靜氣咁同新人講清楚佢哋做咗嘅嘢有留底，可以喺編輯紀錄搵得返，或者喺討論頁同人傾掂數，又或者（如果真係傾唔掂）可以隔幾個月再返來，等可能第班人睇篇同一篇文嘅時候可能易啲傾。.
  • 新人有時可能會驚整爛維基百科（或者驚得罪人被人鬧）就唔敢改，特別係唔敢做例如改善中立性、搬嘢之類嘅大改，咁嘅情形你可以話畀佢知可以放膽改。
  • 你可以話畀個新手聽有乜嘢政策喺邊度有寫佢做錯⸺咁做冇問題⸺但係唔好同佢講佢 ｢有多啲經驗｣ 先好投票、先好參與刪文討論等等，因為咁樣好唔友善，亦都好唔合理，直頭係打擊佢，分分鐘如果佢本來有乜嘢見解係維基百科從來都冇恁過但係要知嘅，我哋都變成冇機會知。
  • 畀意見畀新人，最好係比平時喺維基百科講嘢更加平心靜氣，務求個新人覺得佢已經係受歡迎，唔使擔心要點樣講服你先入到個小圈子咁。但凡係人類為咗啲乜嘢目的專注咁搞啲乜嘢新嘢，一定有有啲乜嘢架構，爾啲架構一定要時間學先會識，亦都要定期檢討、修訂先會有改善。
  • 唔好下下話啲新人係 ｢襪公仔｣（分身戶口）或者 ｢肉公仔｣（幫人帶風向），呢啲都係侮辱性嘅字眼。就算好多新人一齊一面倒咁投票，都唔好令佢哋覺得唔受歡迎，淨係需要話畀佢哋知佢哋啲票可能會無效，咁就夠，唔使用乜嘢侮辱性嘅稱呼。同樣，恁清恁楚先好話人個戶口係 ｢單一用途｣（唔係來寫文，係另有目的）。
  • 有時有啲用戶會唔記得寫完討論之後打四條波浪線簽名。你可以用 {{unsigned}} 模幫佢加返名。
  • 凡係新人，都要假定佢有善意，因為佢好可能真係來幫手，所以要畀機會畀佢！
  • 有樣嘢叫做 ｢慳倫嗰把剃刀｣，即係話，你喺爾度耐，你就覺得有啲行為就係搞破壞，但係做嘅人可能只係唔識爾度規矩。就算你 ｢絕對肯定｣ 某人係冇得救、廢柴、白目、專搞破壞或者更衰嘅人，都扮到好似佢唔係咁，儘量唔好嬲、要有興趣、尊重人哋，咁做係為咗你自己同埋維基計劃嘅尊嚴。
  • 恁下，你自己都曾經係新人；你想當時人哋點對你（或者，如果當時人哋對你好好，就恁下當時人哋點樣對你），你就應該點對人。
  • 總之，一句講哂：咬人唔好　唔好咬人！

點樣去避免咬人

編輯

新人對維基百科點做嘢往往係一知半解，斷章取義⸺出面係蠻荒世界，新人來到點都要一段時間先知爾度點做嘢⸺記住爾點可以幫你唔會變 ｢咬人狂｣。唔想被人話你咬人，試下

  1. 寫討論唔好咁激（唔使用咁多感嘆號，唔使下下話人不知所謂、低能、白痴、死蠢、衰人（或者好人）等等）
  2. 做嘢同講嘢都係，有啲禮貎
  3. 寫編輯摘要、寫信畀人同寫討論都唔好講反話，尤其係牽涉到文章打回頭嘅時候切忌
  4. 唔好下下咁大反應
  5. 唔好下下當人係賊
  6. 做嘢可以有唔同原則，有需要就要尋求共識
  7. 負責解決衝突嘅人可以係你
  8. 記住，己之所欲，施之於人，己所不欲，勿施於人
  9. 聽人講嘢要畀心機聽.
  10. 唔好下下寫維基行話；引用政策或者指引最好寫全寫，唔係寫減筆
  11. 唔好下下封鎖其他用戶，真係冇辦法先好封鎖

用標準嘅問候信同警告信都係有禮貎嘅做法，後者亦都有佢教訓嘅作用。歡迎模可以用來發歡迎信畀新手，用戶警告模可以用來發警告信。

總之，做維基人要有責任感；唔挑起事端，你就冇咁易激親人，亦都唔會咁易被人激親，新人亦都會多啲時間同資源一齊寫好爾個百科。

如果咬咗人或者被人咬，點算？

編輯

如果你咬咗人,或者覺得被人咬，睇下下面寫嘅幾點會唔會幫到以後唔會有同樣嘅事發生：

  1. 事已經發生咗，但係你可以從中汲取教訓
  2. 恁下，唔咬人你可以有乜其他方法唔會搞大件事；如果將來遇到同類事件，試下爾啲其他方法，唔好犯同樣嘅錯
  3. 喺個經驗入便搵下有冇乜嘢有用嘅嘢；有啲嘢可能唔細心搵就唔會睇得見，但係搵到就幫你增長智慧嘅寶
  4. 唔好淨係識發脾氣，要講清楚點解你嬲，點解激親你；但係同時要明白有時你講嘢人哋未必收到，或者人哋唔覺得做錯咗，或者唔願認錯，咁嘅情形咬人都無補於事，反而，唔好執着、唔好記住件事可能會係最好。

新人常犯錯誤

編輯

新人常犯嘅其中一個錯誤，就係唔知維基百科唔係個人部落格，結果就寫咗篇文講自己或者自己隊樂隊。遇到自己寫文講自己嘅事，有禮貎嘅做法就係將篇文搬去佢嘅個人版，然後寫封信解釋點解你搬咗篇文（可以用 {{nn-userfy}} 模⸺如果有爾個模），然後叫管理員鏟走個跳轉頁（可以用 {{Db-rediruser}} 模⸺如果有爾個模）；如果係寫自己嘅樂隊，就當篇文會繼續有人執，可以就咁加個 {{Prod}}（試探）模。

不知者不罪

編輯

法律上講嘅係 ｢唔識法律唔係藉口｣（拉丁文：Ignorantia juris non excusat），但係爾個原則同 ｢唔好咬人｣ 同 ｢假定善意｣ 嘅指引互相違背；事實上，按照維基百科嘅指引，如果新人唔識嘢你就搞新人，犯錯嗰個係你唔係佢。

所以，如果新手唔識嘢，唔好太介懷，試下跟住呢篇文講嘅幾點恁恁⸺同埋，記住，就算唔係新手都會間中唔跟指引，因為喺外面嘅世界好多事都唔係咁做嘢。

睇埋

編輯

註

編輯
  1. ↑ 原文指針對實質內容嘅編輯。但係喺英文嘅專業編輯界，呢種編輯（又叫針對結構或者針對 ｢故事發展｣ 嘅編輯）係泛指改變書或者文嘅大方向，唔止係 ｢寫新內容｣；見 "Definitions of Editorial Skills" (加拿大英文). Editors Canada. 喺2022年10月15號搵到.
  2. ↑ Swartz, Aaron (2006-09-04). "Who Writes Wikipedia?". Raw Thoughts (英文).
  3. ↑ ｢排過啲內容嘅先後次序｣ 如果牽涉到嘅係段落掉位，喺專業編輯嘅角度，都算係 substantive editing；見 〈Definitions of Editorial Skills〉。
由「https://zh-yue.wikipedia.org/w/index.php?title=Wikipedia:咪嚇新人&oldid=1899909」收