α 波

α 波（英文：alpha wave）係腦電波一種。呢種波喺人類當中係指頻率處於 7.5 至 12.5 Hz 之間嘅腦電波，嚟自丘腦（thalamus；主管瞓覺同扮演感知中樞嘅腦區）嗰啲 pacemaker 神經細胞嘅同步電活動。

呢個腦電波喺 1 秒之內有大約 10 個波，頻率大約 10 Hz，屬 Alpha 波。

Alpha 波可以用腦電圖（EEG）或者腦磁圖（MEG）等嘅方法量度同探測，而佢喺心理學同埋神經科學等嘅領域上俾人廣泛噉用嚟研究腦嘅活動同外界刺激之間嘅啦掕：佢喺個人醒緊合埋眼嗰陣活動強（仲要係 EEG 度到最勁嘅訊號），而喺個人擘開眼或者瞌眼瞓嗰陣會變弱。舊陣時學界仲諗住 Alpha 波代表個腦嗰塊視覺皮層（visual cortex）喺冇嘢做嗰陣嘅活動，但係近期啲嘅研究就詏話 Alpha 波反映一個腦區嘅活動受壓抑至啱。

另一方面，人腦又有所謂嘅 Mu 波，呢種腦電波頻率同 Alpha 波相近，但係功能好唔同：Mu 波主要出現喺運動皮層（motor cortex；主管身體郁動嘅腦區）嗰度，喺個人郁或者想郁嗰陣 Mu 波嘅活動會受壓制，同身體嘅郁動零舍有關係。

個名出自希臘字母當中嘅「α」，有陣時啲人又會嗌佢做「Berger 波」（Berger wave），後者呢個名係基於腦電研究個創始人漢斯伯格而改嘅。

例子

用 EEG 量度到嘅腦電活動；呢幅圖當中有好明顯嘅 Alpha 波活動－最下面嗰兩行顯示嘅係枕葉嗰頭嘅活動，而嗰兩行所紀錄到嗰啲波頻率大約係 10 Hz 左右，屬 Alpha 波。

同瞓覺嘅啦掕

有相關領域嘅科學家指出，Alpha 波至少有得分做兩種，而呢兩種 Alpha 波喺晝夜節律當中扮演咗唔同嘅角色。

Alpha 波喺瞓覺同醒嗰個循環嘅唔同階段當中都會出現：

• Alpha 波最廣為人知嘅係佢會喺個人醒住、唔瞌眼瞓、唔郁又合埋對眼嗰陣出現，而呢個 Alpha 波活動主要集中喺枕葉（occipital lobe）嗰度－枕葉係大腦皮層最近後尾枕嗰忽，同處理視覺訊息好大關係，呢種活動喺一個人 4 個月大嗰陣經已有出現，雖然喺嗰段時期呢種波嘅頻率係大約每秒 4 個波，而成熟嘅一般 Alpha 波（每秒 10 個波嘅）要去到 3 歲先會完全成形；
• 另一種 Alpha 波係喺快速動眼睡眠（rapid eye movement sleep，REM sleep）嗰陣出現，同第一種唔同嘅係，REM Alpha 波主要集中喺近額葉（frontal lobe；塊大腦皮層最近額頭嗰忽）至大腦皮層中央地帶嘅腦區，而至於呢種 Alpha 波扮演乜嘢角色，學界就仲係眾說紛紜－有科學家主張 REM Alpha 波反映咗一種半醒嘅狀態。
• Alpha 波入侵（alpha wave intrusion）係一種現象，指有陣時啲人瞓覺嗰陣喺 REM 以外嘅時期個腦有 Alpha 波出現－正常嚟講，喺呢個時期個腦應該係由低頻嘅 Delta 波主導嘅。事實係有研究發現咗，啲受試者如果喺瞓覺嗰時個腦－尤其係枕葉－度有 Alpha 波，佢哋瞓完之後傾向會覺得瞓得唔淰或者瞓得唔舒服。
• 目前仲未有證據可以明確噉指出 Alpha 波入侵同主要嗰啲睡眠障礙有乜嘢直接嘅關係，但係 Alpha 波入侵喺成日攰嘅病人當中相當之常見，亦都可能會加強其他睡眠障礙嘅影響。

預測出錯

廿一世紀頭嘅研究顯示，Alpha 波可以用嚟預測個人做緊嘅嘢有冇出錯。例如有份研究有咗腦磁圖，量度到個腦喺個人做嘢臨出錯之前 Alpha 波活動提高咗成 25%。做呢份研究嘅科學家用咗以下嘅簡單思路：醒緊嘅 Alpha 波顯示個腦區喺度閒置緊，而當一個做緊某個作業嘅人有多個腦區都喺度閒置緊嗰陣，噉佢應該喺度「行自動波」－冇乜點樣專心去做佢做緊嗰個作業，噉自然佢表現會下降，犯錯嘅機會會提升。喺個研究入面，當個受試者發現自己犯咗錯之後，佢會開始專心啲，而 Alpha 波活動就相應噉下降。另一方面，亦都有研究指，如果個人喺做一樣工作之前 Alpha 波活動係噉咦升一吓（跟住再跌返）嘅話，佢做嗰樣工作嘅表現會變好，噉似乎係因為喺工作之前經歷一陣 Alpha 波活動有助清除雜念。

基於呢個研究，啲研究人員仲提議可以整啲架生出嚟監察住飛機師（或者係其他身負重任嘅人員）嘅腦電活動，並且靠睇住佢哋嘅腦嘅 Alpha 波活動嚟評估佢哋做嘢專唔專心－有利於令到航空同埋其他出事就好大鑊嘅工作更加安全。

Alpha 波雜音

有研究顯示，有某一啲腦以外嘅嘢－例如係 Jell-O 呢種零食－可以對腦電圖嘅訊號造成干擾，搞到就算冇任何腦活動存在，個腦電圖嘅結果都俾出一幅望落似係 Alpha 波噉樣嘅圖。呢種偽訊號有可能會誤導醫護人員，搞到佢哋（例如）以為一個實際上腦死咗嘅病人個腦有正常嘅 Alpha 波活動。不過，如果細心啲睇嘅話，都仲係有可能分辨由 Jell-O 造成嘅流「Alpha 波」同真嘅 Alpha 波嘅。

睇埋

• 腦電圖
• 腦電波
• EEGLAB

腦電波

• 𝛿 波 – (0.5 – 3 Hz)
• θ 波 – (4 – 7 Hz)
• α 波 – (8 – 13 Hz)
• μ 波 – (7.5 – 12.5 Hz)
• SMR 波 – (12.5 – 15.5 Hz)
• β 波 – (16 – 31 Hz)
• γ 波 – (32 – 100 Hz)

參考書

• Brazier, M. A. B. (1970), The Electrical Activity of the Nervous System, London: Pitman.