七聖古廟
七聖古廟，又叫七聖宮古廟，簡稱七聖廟，喺香港新界大埔區西貢北十四鄉官坑。七聖古廟喺明末清初時候起，由十四鄉鄉村組成嘅「東平社」、「西平社」、「南慶社」同埋「北慶社」合力建成，每一個社輪流打理一年。
傳說
編輯聽講喺清朝乾隆嘅時期，有個漁夫喺毗鄰嘅帆沙排、汀洲、白沙頭一帶打魚搵食，有一晚喺帆沙排下網，只係網得石頭一大堆，喺堆石之中有七粒好特別嘅石卵，漁夫就將呢七粒石卵掟向岸邊，竟然見到七粒小火星升起一直飄到馬鞍山山麓，漁夫即時向天禱告話，如果魚獲大有收穫時，必定喺山邊建廟，報答神恩。從此漁夫就一帆風順，得償所願。因為咁就喺陳角咀山邊起咗一間叫「黃金廟」嘅屋仔作為敬拜之用，但後來竟然俾火焚燬，就有七粒小火星像流星一樣，沿住廟後山飛至官坑就失蹤咗，班鄉民覺得係神靈指示建廟嘅地點，就再發起重起新廟。
供奉神祇
編輯七聖古廟正殿供奉有8個神像，前排係單一媽祖像，亦都有人話喺王母，後排喺七仙女居中最大嗰一尊係大家姐，聽村民所講係織女[1]，係全港僅有嘅三間「七姐廟」之一，另外兩間係坪洲嘅「仙姊廟」[2]同埋石籬嘅七聖宮，偏殿就供奉關帝。每年到咗七夕，唔少戀人拖手前來敬拜，祈求愛情圓滿順利。
建築同古物
編輯七聖古廟係三開間兩進式傳統建築廟宇，廟內掛咗一口乾隆二十七年（1762年）鑄造嘅銅鐘，喺外殿聯寫住「七姐善心存愷測；聖神仁術統陰陽」同埋喺堂前高腳牌「污穢勿近」，就係喺光緒三十二年（1908年）所立嘅，並有光緒同埋民國年間重修嘅匾聯。廟前建有一幅風水牆，喺出面重有一個廣場，古裝武俠片大行其道嗰時，經常係電影公司拍攝外景嘅場地，有「武林勝地」之稱。
七聖古廟原先每歲都演戲酬神，直至七十年代，因唔少男丁去咗外國工作而停咗。喺1998年進行重修之後，原居民就重新開始，每隔三年就舉辦酬神粵劇[3]。七聖古廟原先被評為二級歷史建築，後來因重建導致原貌盡失，喺2010年2月4號確定不予評級。
日治時期
編輯香港日治時期有日軍駐紮七聖古廟，東江縱隊港九大隊西貢中隊曾經偷襲過，因為估計錯誤，俾火力強大嘅日軍擊退咗，隊員吳壽喺衝入廟嗰時頭部中彈身亡，其他隊員未能及時搶番條屍，俾日軍割咗個頭掛喺廟前榕樹上面。嗰棵越澗相連人稱「七姐橋」嘅「連理樹」，近年因為政府大興土木施工，將別名「七姐坑」或「銀河」嘅溪澗改建為明渠先至冧咗。
地區中心
編輯1954年十四鄉一帶鄉村成立西貢北約鄉事委員會，七聖古廟就成為議事同埋辦公嘅地方，直到喺大埔墟嘅新會址建成先至結束。成立七聖古廟嘅「東平社」由烏溪沙村民組成，其後連埋馬鞍山一齊歸埋沙田區，而其餘三個社就仍然歸大埔區管轄嘅西貢北。
交通
編輯參考
編輯- ↑ 〈官坑「七聖古廟」〉 (香港中文)。wenweipo.com。2003-03-16。原著喺2012-07-14歸檔。喺2010-08-25搵到。
{{cite news}}: Italic or bold markup not allowed in:|publisher=(help) - ↑ 〈老廟舊俗拾遺 七夕拜七姐〉 (香港中文)。wenweipo.com。2007-08-18。原著喺2010-08-19歸檔。喺2010-08-25搵到。
{{cite news}}: Italic or bold markup not allowed in:|publisher=(help) - ↑ 〈十四鄉官坑七聖古廟酬神〉 (香港中文)。mbon.net。2009-11-22。喺2010-08-25搵到。
{{cite news}}: Italic or bold markup not allowed in:|publisher=(help)
參考文獻
編輯- 《沙田文物誌》，衛慶祥 編撰，沙田民政事務處 出版，2007年
- 《香港英雄兒女》，周奕 著，利文出版社 出版，2004年，ISBN 962-988-119-5
- 《奇廟》，天涯不曉生 著，次文化堂 出版，2004年，ISBN 962-922-107-3