馬鞍山 (香港市鎮)

馬鞍山香港新界一市鎮,地區行政上屬沙田區,喺沙田東北面,馬鞍山山腳。

馬鞍山

馬鞍山屬於沙田新市鎮嘅擴展部份[1];不過馬鞍山嘅發展比較遲,所以城市規劃有好大嘅分別。因此,佢同同樣喺1980年代開發嘅天水圍新市鎮以及將軍澳新市鎮都係屬於「第三代新市鎮」。[2]

歷史

馬鞍山曾經發現過新石器時代晚期(距離依家大概三千至四千年)同埋南宋時期嘅文物。發展新市鎮之前,哩笪地方重係一個細村仔,村民主要從事農業、漁業呢啲傳統鄉村經濟活動。之後近代嘅日本企業嚟到呢度去開採啲磁鐵礦,令到馬鞍山成為工業重鎮,鼎盛嗰陣有幾千個工人喺呢度住。但去到七十年代,因為石油危機同埋新市鎮嘅發展,導致開礦嘅成本大增,再加上香港政府決定要開發馬鞍山變做新市鎮,礦場卒之喺1976年倒閉。馬鞍山新市鎮嘅發展開始喺1980年,經過幾十年嘅努力,馬鞍山已經變咗做有大把屋邨、商場嘅大型住宅區。

地理

馬鞍山喺沙田區嘅東北面,同沙田本來嗰區就用梅子林路做分界線。同埋,馬鞍山喺馬鞍山雙峰嘅西面,佢起喺吐露港同馬鞍山之間嘅嗰條地帶上。佢北面可以去到烏溪沙嗰邊,南面去到大水坑。仲有,馬鞍山以東同埋西貢北(行政區劃上面其實屬於大埔區)嘅十四鄉相鄰。另外,喺1866年嘅清朝地圖《新安縣全圖》入面,已經出現咗「馬鞍山」同「沙田」兩個名喇。

馬鞍山三寶

  1. 鐵礦:馬鞍山鐵礦藏量有超過700萬噸,1950至70年代開採嘅鐵礦主要係出口日本。
  2. 杜鵑花:香港杜鵑(Hongkong Azalea Rhododendron)喺1851年喺香港發現,但係當時畀人誤認咗做另一個品種,去到1930年香港先將佢命名做新種。佢嘅花期係四月,花白至到淡紅色。佢淨係可以喺馬鞍山及其他幾笪地方見到。馬鞍山其他品種嘅原生杜鵑重有毛葉杜鵑、華麗杜鵑、羊角杜鵑、南華杜鵑同埋紅杜鵑。
  3. 黃麖:即係赤麖或者赤麂(Muntiacus muntjak),係小型偶蹄目鹿科麂亞科嘅動物,喺華南地區包括香港,西至印度、巴基斯坦同阿富汗生活。雄性有小角同獠牙,鍾意棲息喺樹林裏面同埋高嘅草叢入面,樹葉同埋地下根或者莖都係佢嘅食物,間唔中會食樹皮。佢係獨居,當佢受驚嗰陣或者繁殖季節都會發出一種奇怪嘅叫聲,俗稱鳴鹿(Barking Deer)。佢生性細膽,而香港曾經有被困嘅赤麖喺圍捕嗰時嚇死嘅紀錄。
  1. "歷史背景". www.pland.gov.hk. 喺2020-07-11搵到.
  2. "區新線新". archive.is. 2009-10-27. 喺2020-07-11搵到.