上海粗炒

上海粗炒係一款用咗上海地名而有港式飲食特色嘅香港炒麵，呢種炒麵喺上海幾乎都唔會搵到，不過流行喺香港同海外嘅中餐館，常被認為係上海菜嘅代表。

上海粗炒

粗炒簡介

過去喺上海，一般大小飯店都唔會有上海粗炒賣，好多上海人根本都無聽過呢款嘢食，上海粗炒只不過係「街邊嘢食」，上海最具有代表性嘅炒麵係蝦仁兩面黃。1950年代前後，大批上海人移居香港，亦將上海餐飲文化帶到香港。由於香港人並唔鍾意食煎炸嘢，所以有好多人會選擇經過本土化改良嘅上海粗炒，傳統而地道嘅兩面黃炒麵因而顯得唔受歡迎。過咗一段時間之後，上海粗炒就成為一款好常見嘅食品，代表咗香港嘅上海麵食，並由華人餐廳傳向世界各地。

用料同做法

上海粗炒原本只係早期上海街邊嘅炒麵，帶入香港後經過咗傳播同口味改良，選用瘦肉絲、椰菜等配料，加入上湯同調味料翻炒。麵條就用類似烏冬嘅粗麵，蒸完再炒，令到麵條熟而唔爛，兼有少少𡁻口。

基本做法係將麵條放入水浸5分鐘後撈出，再浸入凍水，令佢口感更彈牙、有韌性，唔易斷，再瀝乾水份待用。炒鍋燒熱油後加入肉絲同切絲後嘅椰菜分別翻炒後盛起。跟住，將麵條同調味醬油加入鍋炒到水份收乾；最後將肉絲，椰菜回鍋炒勻就得。