不可知論(又叫做不可知主義)係一種哲學觀點,認為形而上學嘅一啲問題,例如有無來世、神存唔存在等,係人類唔知道或者無辦法知道嘅。

名字嘅來源 編輯

不可知論爾個概念,最早係喺1869年英國托馬斯·亨利·赫胥黎創造嘅,佢將希臘文嘅「α」(「無」)同「γνῶσις」(「知識」)兩個詞根組合埋一齊,創造徂「agnoticism」爾個名。

分類 編輯

現代對不可知論嘅分類有以下幾種:

  1. 強不可知論:「有啲嘢,以人嘅能力係永遠唔會知嘅。」
  2. 弱不可知論:「有啲嘢,以人目前嘅能力係唔會知嘅,但係唔代表以後唔會知。」
  3. 消極不可知論:「無證據證明係恁,而且知道徂都係得個『知』字。」
  4. 漠視主義:「論題產生唔到任何可以用科學方法證明嘅結果,因此拗來都無意義。」
  5. 現代不可知論:「哲學同形而上學嘅問題無辦法證明或者否定,但係理性思維可以為其中有意義嘅假設建立思維模型。」
  6. 不可知神學:「唔聲稱知道神存在,祇係相信神存在。」
  7. 不可知心靈主義:「神存唔存在都有可能;唔局限於某種宗教。」
  8. 不可知無神論:「由於唔知道神存唔存在,所以相信無神論。」

一啲哲學觀點 編輯

著名嘅不可知論哲學家有:托馬斯·亨利·赫胥黎查理斯·達爾文同埋羅素

中國 編輯

論語入面,孔子話:「子不語怪力亂神」,反映佢曾經避免相信嗰啲野。亦都講過:「未知生,焉知死」,反映佢唔想知死住。

古希臘 編輯

不可知論係古希臘哲學入面以懷疑論嘅形式出現。佢嘅支持者有普羅泰格拉斯智者著有《論神》,呢本書一開始就話:「講起,我冇把握話佢哋係存在定係唔存在,亦都唔敢講佢哋係點樣;因為有好多嘢阻住我哋確切嘅知識,例如問題嘅晦澀同埋人生嘅短促。」)、皮洛(極端懷疑主義哲學家)同埋Carneades。

托馬斯·亨利·赫胥黎 編輯

雖然不可知論嘅基本觀點同懷疑主義一樣古老,但係赫胥黎特別創造咗「不可知」同「不可知論」呢兩個字,用嚟概括佢對同時代形而上學主義,特別係冇條件(哈密爾頓)同不可知曉(赫伯特·斯賓塞)呢兩個新發展嘅睇法。因此搞清楚赫胥黎本人嘅睇法好重要。佢喺1869年先開始用「不可知」呢個字,但係佢自己嘅意見搞掂得早過佢。喺畀查爾斯金斯利嘅一封信(1860年9月23號)入面,佢廣泛咁講解咗自己嘅感想:

「我唔肯定又唔否認人會永生。我係冇理由相信佢,又冇得反駁佢。我又冇先驗嘅原因嚟反對呢個教育。人到咗成日都要用嚟對付自然環境嘅時候,就冇心思關心乜嘢『先驗』嘅困難啦。只要好似嗰啲我相信嘅事物一樣畀我足夠嘅證據,我就信佢。有咩唔信嘅理由呢?要講奇妙玄奧嘅話,呢個永生論未有力嘅守恆論或者物質不滅論嘅一半水準……」
「唔使同我打比喻或者講乜嘢概率。當我話我信反平方定理嘅時候,我知道我指嘅係乜嘢。我唔會將我嘅生命同希望寄託喺更脆弱嘅信條上……」
「喺我知道可能係堅嘅嘢入面,我嘅個性係我最有把握嘅。但當我一諗吓佢究竟係乜嘢,就陷入語言嘅微妙之處。我成日就喺自我同非我、本體同現像等嘅廢話上面折騰咗咁耐,重未發現到:想思考呢啲問題嘅過程已經超出咗人類智力所能做嘅地步……」

查爾斯·達爾文 編輯

1879年,當查理斯·達爾文撰寫自傳嗰時,收到封信,問佢有神論進化論係唔係相容,佢係唔係信神。佢話「可能會係個熱心嘅有神論者同進化論者」,例如金斯利(Charles Kingsley)同亞薩格雷(Asa Gray)嘅引證,對達爾文佢嚟講「永遠唔係一個否認神存在嘅意義上嘅無神論者」。佢又話「我覺得一般嚟講(隨住我有年齡增長)但唔一定係,『不可知論者』對我嘅睇法係一個更加正確嘅描述」。

勃特蘭·羅素 編輯

勃特蘭·羅素嘅小冊子《我點解唔係基督徒》係對不可知論信條嘅經典闡述。呢本同名小書係基於佢1927年喺發表嘅演講。文章首先簡單咁講羅素反對有神論嘅論據,然後又反對基督教教義道德。最後佢就呼籲佢嘅讀者要用「無懼嘅態度同開放嘅智慧」「獨立自主、公平正直咁睇嘢」。

喺羅素後來嘅小冊子《我係無神論者定係不可知論者? 》(副標題:面對新教條所持容忍態度嘅辯論)入面,佢肯定,佢喺哲學意義上係一個不可知論者,唔知道神係咪真係存在。而喺同一部作品入面,佢亦都接納,無神論者呢個稱呼可以更好咁表達出非哲學追隨者嘅宗教姿態。

同其他哲學思想嘅關係 編輯

懷疑論 編輯

雖然不可知論好似懷疑論,但佢哋係唔同嘅,不可知論同實證主義方法一樣,而懷疑論就同實證主義方法唔一樣。實證主義強調自然科學同社會科學嘅成就同可能。懷疑論者甚至會同無神論、有神論、創造論、智慧設計論一樣咁反對不可知論。

另外一個唔同嘅地方係,懷疑論嘅質疑對像係知識,不可知論嘅質疑對象係真理同神。

無神論 編輯

無神論果斷咁否認神嘅存在,所以亦都反對不可知論對神嘅存在抱住嘅可能性。而不可知論係主張人類冇辦法可以知道世上嘅真理,認為無神論武斷又魯莽。

邏輯實證主義 編輯

邏輯實證主義者,如卡納普(Rudolph Carnap)同艾耶爾(AJ Ayer),對不可知論嘅諗法係錯嘅。佢哋提出嘅論據維根斯坦嘅名著《對於嗰啲唔講得嘅,一定要收聲》, 當任何有關神嘅言論係純粹謬論。邏輯實證哲學家同類似嘅思想學派嘅擁護者認為, 有關宗教或者其他超然存在經驗嘅陳述冇事實價值,都要當成冇意義。但呢個係包括一切有關神嘅言論,甚至係嗰啲否認識得神嘅可能性嘅不可知論都一樣。喺《語言、真理同邏輯》入面,艾耶爾明確咁反駁不可知論——因為不可知論喺話明上帝係冇得知嘅,但又話神有意義。

抄嘅嘢 編輯

篇文用過大英百科全書第十一版,因版權年滿內容已經歸公。

參考 編輯

睇埋 編輯

外來嘢 編輯