懷疑論

懷疑論（粵拼：waa4 ji4 leon6；美式英文：skepticism；英式英文：scepticism）係指一個人對已知嘅知識－就算係一啲俾人視為常識嘅知識－抱持懷疑嘅態度。非正式噉講，懷疑論者唔淨只會對政治、宗教、超自然同埋假科學等嘅嘢抱懷疑態度，仲會主張「俾主流人所接受嘅知識」好多時都只不過係一啲主觀、未必真確嘅觀念。懷疑論可以引申至泛指凡事都抱有懷疑、尋根究底嘅態度。

蘇格蘭哲學家大衛休謨（David Hume）嘅畫像，1754 年；佢係一個懷疑論者。

嚴格嚟講，懷疑論係一種知識論（思考知識本質嘅哲學子領域）相關嘅思想，大致上有得分做激進同溫和兩派：

• 激進派嘅哲學懷疑論者認為所謂「客觀嘅知識」或者「理性嘅信念」根本就係唔存在嘅，所以人類永遠都冇可能真正噉「知道」任何嘢，主張人類對於有爭議性嘅嘢淨係可以「唔作出判斷」；
• 溫和派嘅哲學懷疑論者就冇咁激，淨係會針著「任何知識都有不確定性」呢一點，主張人類永遠冇可能完全 100% 確實噉話自己知道任何嘢（睇埋科學哲學），尤其係針對一啲形而上學方面嘅問題，例如自由意志、來世同宗教等等，溫和派懷疑論者會話「因為缺乏充足嘅證據，唔能夠下定論」。

懷疑論俾人指係唔少重要思潮背後嘅力量，例如現代嘅科學方法就係局部建基於科學家對於「冇得客觀驗證嘅諗法」嘅質疑嘅，而科學方法喺現代學界有巨大嘅影響力－由自然科學以至社會科學都會用到科學方法嚟做研究。

定義

睇埋：知識論

通常嚟講，懷疑論（skepticism）呢個詞嘅意思係：

1. 一種傾向懷疑、唔信任嘅態度，可以係針對所有或特定嘅事物。
2. 一種信念，認為所有或特定嘅知識並唔確實。
3. 一種方法，造成懸置判斷、笛卡兒式懷疑、或懷疑型嘅批判。

哲學上，懷疑論亦可以表示：

1. 一種考究嘅方法，強調批判性嘅研究、理性上嘅嚴謹。
2. 一種方法，通過笛卡兒式懷疑同不斷試驗得到知識。
3. 各種有關人類知識嘅極限，同點樣處理呢啲極限嘅主張。

哲學

内文：哲學懷疑論

科學

内文：科學懷疑論

科學懷疑論者相信科學，反對所有建基於信仰、以訛傳訛嘅講法。佢哋除咗會考慮可唔可以通過實驗去證實，亦都會考慮呢啲驗證當中有冇可能造假或者出錯，所有主張都應該要經得起科學方法（scientific method）驗證先可以話係正確嘅知識。反之，如果要話一啲講法係錯嘅話，就算呢啲講法聽落係幾咁匪夷所思都好，同樣要經科學實證。呢啲講法需要用比較嚴格嘅方式去驗證，需要更加有力嘅證明，但係只要搵到充足嘅證據，佢哋都會接受呢啲講法。

宗教

内文：宗教懷疑論

顧名思義，宗教懷疑論泛指所有針對宗教嘅懷疑論。雖然通常係指無神論或者不可知論之類對宗教有負面態度嘅人，宗教懷疑論者亦包括反對某啲儀式／教義／教派嘅教徒、反對其他宗教嘅一神論嘅教徒、或者反對任何宗教嘅理神論者。

最早嘅宗教懷疑論者可以追溯至色諾芬尼，佢覺得當時啲人信嘅希臘眾神係嚟自啲人傾向將人格套落神身上，提出咗比較理性嘅角度去睇宗教。

現代嘅宗教懷疑論者多數會透過科學同歷史上嘅研究去驗證一啲宗教嘅可信性，有一啲就覺得宗教本身根本冇得驗證，因為所謂信仰係唔需要證據。

睇埋

• 假科學
• 常識

拎

• （英文） Skepticism. Stanford Encyclopedia of Philosophy.