中國遊客在外爭議

隨住中國經濟發展，加上一帶一路入面，一啲促進唔同國家同中國經濟互動嘅協議，越來越多中國人出國觀光，為其他國家帶來一定嘅經濟機會。不過，佢哋喺外面嘅行為同表現，就引發咗一啲唔同嘅爭議。

部分中國遊客被批評行為包括大聲吵鬧、不停問重覆問題、對當地景點歷史唔感興趣淨係顧住影相、唔顧衛生、隨意移動甚至破壞擺設品。就算去到一啲講到明要細聲或者唔畀影相嘅地方，佢哋都唔識尊重。另外，有啲中國遊客去旅行參加嘅亦只係低價、甚至係零團費嘅旅行團，對當地經濟效益有限但就做成人滿之患，影響當地民生。

個別國家情況

台灣

佢哋有啲人嘅不文明行為喺台灣引起咗唔少人反感。雖然中國覺得靠旅遊業發展可以帶動經濟，仲當係送畀香港同台灣嘅「大禮」，當作係兩岸關係好轉嘅象徵，但喺台灣人眼中，呢份「大禮」真係未必受歡迎。再加上，台灣旅行社經常話攞唔到大陸合作伙伴嘅錢，搞到幾間大旅行社破產。台灣人仲擔心大陸遊客對國家安全有影響，早喺2009年，就有大陸遊客混入台灣國防部影相，呢種隱憂早已經浮現。

事例

• 2015年10月，有中國遊客喺台灣鼎泰豐餐廳度，當眾畀個細路喺餐桌上小便，仲要求餐廳因為「尿液沾到食物」而免費換過水餃。呢個舉動搞到餐廳職員同其他食客都好唔滿。
• 2016年12月，有網友爆料話，12月19日下午有兩名中國大陸女遊客喺阿里山森林遊樂區度便溺。
• 2024年10月1日，有在台香港人喺台北西門町街頭舉辦「反中國國慶」活動，掛起「光復香港 時代革命」等旗幟，之後有兩名自稱來台觀光嘅中國遊客鬧場。

中國政府回應

2015年，中國官方為止住呢個歪風，救返中國人喺國外嘅名聲，就出手喇。佢哋話如果有遊客喺國外搞到破壞古蹟、環境衞生等唔當行為，所有嘢都會被記錄低，保存大概1到2年嘅時間。

睇埋

• 丁錦昊塗鴉事件
• 國泰航空被小紅書網民投訴爭議 - 來自中國嘅投訴者旅客，偷偷錄音嘅做法被指違反規定
• 中國大陸遊客喺香港行為爭議