光復香港，時代革命

  光復香港跳轉到呢度。

• 想搵同名遊戲，請睇「光復香港 (遊戲)」。
• 想搵1945年8月15號英國成功收復香港，香港日治時期結束，請睇「香港重光」。

  「時代革命」跳轉到呢度。想搵同名紀錄片，請睇「時代革命 (紀錄片)」。

「光復香港，時代革命」(粵拼：gwong1 fuk6 heung1 gong2 si4 doi6 gaak3 ming6)（英文：Liberate Hong Kong, the revolution of our times / 英文：Free Hong Kong, revolution now），係香港本土派倡議嘅一個社會運動口號。

「光復香港，時代革命」旗幟

喺2019年8月22號反送中示威期間展示嘅口號

2019年8月18號，反逃犯條例修訂運動入面出現有關標語塗鴉。

2019年8月5號，反逃犯條例修訂運動入面，金鐘夏慤道天橋懸掛「光復香港，時代革命」手寫標語。

歷史

呢句口號喺2016年，本土民主前線發言人梁天琦參選第5屆香港立法會新界東地方選區補選嗰陣頭一次提出。佢話任何年齡人士都可以革新同改變，就係「時代革命」。同年第6屆香港立法會選舉，青年新政亦有用「光復香港，時代革命」作為競選口號。

到2019年，因應《逃犯條例修訂草案》爭議造成反送中逆權運動，過程中衍生出一系列事件，造成社運升級，香港人重新提出「光復香港，時代革命」口號，引起全世界關注。前端傳媒總編輯張潔平表示個口號係強化行動同革命願望，並指出「香港人要將香港，成為香港人嘅香港」，但係親中派表示反對。

前香港特別行政區行政長官董建華、親政府派人士、中共黨媒（《環球時報》、新華社）話，口號同香港獨立運動有關，係挑戰「一國兩制」原則。

2020年7月2號，亦即係香港國家安全法實施嘅第三日，香港特區政府發聲明話：「光復香港，時代革命」口號有港獨同顛覆國家政權嘅意思。

變種

「康復香港，時代抗疫」嘅塗鴉

• 「驅逐共黨，光復香港」：意思係想光復香港嘅話，就要擺脫中共對香港嘅干預。
• 「康復香港，時代抗疫」：2020年頭，武漢肺炎香港疫情爆發，抗爭者改編「光復香港，時代革命」口號自勉，希望香港可以盡快成功抗擊疫情。

政府回應

2020年7月2日，有報章引述香港警務處消息話由於「光復香港、時代革命」口號出自於本土民主前線前發言人梁天琦喺參加2016年立法會新界東地方選區補選時嘅競選口號，而佢過往曾經提出「港獨」、「香港國」等倡議，所以喺遊行現場或者公眾地方例如商場高叫呢個口號會被視為違反《港區國安法》。

睇埋

• 反修例運動常用抗議口號