多頭蛇do1 tau4 se4英文hydra [註 1],可以做粵拼haai1 draa4古希臘文Ὕδρα / Hýdra),嚟到現代又可以叫多頭龍(如果隻 hydra 係好似惡龍噉有腳),係希臘神話入面一隻怪獸。希臘神話入面嗰隻 hydra 係九頭蛇,蛇如其名係一條有 9 個頭嘅蛇。

19 世紀一幅油畫,描繪畫家想像中「海格力斯同九頭蛇戰鬥」嘅情境。

Hydra 喺現代奇幻當中都有出現,例如著名奇幻小說系列《哈利波特》就有用到 hydra 嘅橋段[1]

故仔 編輯

九頭蛇係希臘神話著名故事《海格力斯嘅勞動》嘅一部份,故仔係噉嘅[2]:p. 143-144

海格力斯(Ἡρακλῆς / Heracles)係一個半神,佢阿媽係個人類,而佢阿爸就係身為眾神之王嘅宙斯。海格力斯血統上一半係天神所以有超人力量,佢足智多謀又力大無窮,做出咗好多英勇事跡,係廣受全希臘敬重嘅英雄。不過始終佢係宙斯嘅私生子,所以天界女王希拉(Ἥρα / Hḗrā;宙斯個正室老婆,同時亦係掌管結婚生育天神)不嬲都好憎佢,好想搵方法整死佢。有一日,希拉對海格力斯落咒,搞到海格力斯發癲攻擊身邊嘅人,仲喺發癲途中殺死自己老婆同仔女。悲痛嘅海格力斯向太陽神阿波羅(Ἀπόλλων / Apollo)祈禱,想搵方法贖罪。阿波羅聽到佢嘅祈禱,就叫佢去做邁錫尼國王嘅僕人做 10 年[3]:p. 253

海格力斯喺邁錫尼國王手下做嘢期間,曾經畀國王派去做 12 單好危險嘅工作,而呢連串事跡就係海格力斯嘅勞動。响第二單勞動當中,海格力斯畀國王派去誅殺九頭蛇-條蛇查實係希拉暗中養出嚟嘅,希拉噉做係想用條蛇嚟殺死海格力斯。

九頭蛇蛇如其名有 9 個頭。佢住喺一個大沼澤裏面,沼澤入面彌漫住毒霧,海格力斯搵塊布揞住自己口鼻行入沼澤,同九頭蛇戰鬥。

海格力斯話咁快就發現,一般嘅攻擊對九頭蛇完全冇效:每當佢將九頭蛇嘅其中一個頭斬落嚟嗰陣,條蛇會由個傷口度即刻生個新嘅頭出嚟,噉無論海格力斯點樣斬條蛇嘅頭,條蛇都唔會死;海格力斯大聲叫佢個侄仔伊奧勞斯(Ἰόλαος / Iólaos)嚟幫手,伊奧勞斯諗到條計仔[註 2],提議每次斬條蛇嘅頭嗰時都用火燒條蛇嘅傷口;然後兩個人就一齊合作行動,海格力斯一路斬條蛇嘅頭,而伊奧勞斯就一路攞住火把,用火辣海格力斯斬蛇頭造成嘅傷口;結果伊奧勞斯條橋真係掂,條九頭蛇變到愈嚟愈虛弱,最後海格力斯攞住雅典娜(Αθηνά / Athena;掌管打仗同智慧嘅女神)賜畀佢嘅神劍,將九頭蛇最後嗰個頭一嘢斬落嚟,成功誅殺九頭蛇。

仲有版本話,希拉事後好嬲,將九頭蛇條屍收埋咗喺天界一間暗室度,而條屍最後變咗做長蛇座

影響 編輯

睇埋:惡龍屠龍

好似古希臘九頭蛇噉嘅故仔,响打後嘅西方世界嘅文化入面成日都見到。例如屠龍者就係西方奇幻故仔民間傳說好興用嘅橋段。

 

上面呢幅圖畫描繪著名奇幻檯上 RPGD&D》裏面嘅 hydra 嘅形象。喺廿一世紀初嘅奇幻當中,hydra 成日畀人當係惡龍一種[4]:現代奇幻作品裏面嗰啲 hydra 傾向

  1. 有好多個頭,但唔一定係 9 個,上圖嗰隻 hydra 有 6 個頭;
  2. 有極強嘅重生能力,斬咗佢一個頭落嚟佢會好快生個新嘅頭出嚟;
  3. 可以有,即係身體唔成蛇噉形。

-點 1 同點 3 同希臘神話入面嗰隻 hydra 有明顯差異。噉嘅現代 hydra 被指望落比較似「冇翼但有好多個頭」嘅惡龍[註 3]

睇埋 編輯

註釋 編輯

  1. 呢隻字喺英文入面仲可以指一啲多頭蛇以外嘅嘢。
  2. 有版本話伊奧勞斯會諗到計,係因為受到雅典娜啟發。
  3. 亦可以睇睇 TV TropesOur Hydras Are Different

編輯

  1. Lovatt, H. E. L. E. N. (2020). Fantastic beasts and where they come from: How Greek are Harry Potter's mythical animals. Chasing mythical beasts: The reception of ancient monsters in children's and young adults' culture, 449-470.
  2. Kerényi, K. (1978). The heroes of the Greeks. Thames and Hudson.
  3. Hard, R. (2003). The Routledge handbook of Greek mythology: Based on HJ Rose's handbook of Greek mythology. Routledge.
  4. Dragon Types - Hydra. Basic Dragon Information.

編輯