希臘神話

希臘神話hei1 laap6 san4 waa2（希臘文：ἡ Ἑλληνικὴ Μυθολογία）係指古希臘種種神話，內容包括神、英雄、自然同宇宙史咁。希臘神話大作有荷馬嘅《伊利亞德》同《奧德修記》、赫西奧德嘅《神譜》咁。

希臘神話最大粒嗰位：宙斯

重要事件

英雄時代

希臘神話入面充滿咗講英雄嘅故仔。當中最出名嘅要數著名英雄海格力斯（Ἡρακλῆς / Heracles）。

Info：海格力斯誅殺九頭蛇

19 世紀一幅油畫，描繪畫家想像中「海格力斯同九頭蛇戰鬥」嘅情境。

海格力斯相傳曾經誅殺九頭蛇。個故仔係噉嘅：

海格力斯係一個半神，佢阿媽係個人類，而佢阿爸就係身為眾神之王嘅宙斯。海格力斯血統上一半係天神所以有超人力量，佢足智多謀又力大無窮，做出咗好多英勇事跡，係廣受全希臘敬重嘅英雄。不過始終佢係宙斯嘅私生子，所以天界女王希拉（Ἥρα / Hḗrā；宙斯個正室老婆，同時亦係掌管結婚同生育嘅天神）不嬲都好憎佢，好想搵方法整死佢。有一日，希拉對海格力斯落咒，搞到海格力斯發癲攻擊身邊嘅人，仲喺發癲途中殺死自己老婆同仔女。悲痛嘅海格力斯向太陽神阿波羅（Ἀπόλλων / Apollo）祈禱，想搵方法贖罪。阿波羅聽到佢嘅祈禱，就叫佢去做邁錫尼國王嘅僕人做 10 年。

海格力斯喺邁錫尼國王手下做嘢期間，曾經畀國王派去做 12 單好危險嘅工作，而呢連串事跡就係希臘神話當中好出名嘅海格力斯嘅勞動（Labors of Heracles）。响第二單勞動當中，海格力斯畀國王派去誅殺九頭蛇（Ὕδρα / Hýdra）－條蛇查實係希拉暗中養出嚟嘅，希拉噉做係想用條蛇嚟殺死海格力斯。

九頭蛇蛇如其名有九個頭。佢住喺一個大沼澤裏面，沼澤入面彌漫住毒霧，海格力斯搵塊布揞住自己口鼻行入沼澤，同九頭蛇戰鬥。

海格力斯話咁快就發現，一般嘅攻擊對九頭蛇完全冇效：每當佢將九頭蛇嘅其中一個頭斬落嚟嗰陣，條蛇會由個傷口度即刻生個新嘅頭出嚟，噉無論海格力斯點樣斬條蛇嘅頭，條蛇都唔會死；海格力斯大聲叫佢個侄仔伊奧勞斯（Ἰόλαος / Iólaos）嚟幫手，伊奧勞斯諗到條計仔，提議每次斬條蛇嘅頭嗰時都用火燒條蛇嘅傷口；然後兩個人就一齊合作行動，海格力斯一路斬條蛇嘅頭，而伊奧勞斯就一路攞住火把，用火辣海格力斯斬蛇頭造成嘅傷口；結果伊奧勞斯條橋真係掂，條九頭蛇變到愈嚟愈虛弱，最後海格力斯攞住雅典娜（Ἀθῆνα / Athena；掌管打仗同智慧嘅女神）賜畀佢嘅神劍，將九頭蛇最後嗰個頭一嘢斬落嚟，成功誅殺九頭蛇。

仲有版本話，希拉事後好嬲，將九頭蛇條屍收埋咗喺天界一間暗室度，而條屍最後變咗做長蛇座。

好似九頭蛇噉嘅故仔，响打後嘅西方文化入面成日都見到。例如屠龍者（dragonslayer）就係西方奇幻故仔同民間傳說好興用嘅橋段，故仔往往係講一位英雄殺死龍（好似海格力斯殺九頭蛇噉），而且英雄好多時仲會喺殺龍嗰陣拯救畀惡龍脅持嘅公主。

主要神祇

希臘神話嗰啲天神，好多時都係某啲概念嘅人格化：例如根據好多希臘神話故事嘅描述，蓋亞（Γαῖα / Gaîa）唔淨只係大地嘅女神咁簡單，仲係大地呢樣嘢嘅人格化－當大地因為打仗而著嗮火嗰陣，蓋亞會「覺得痛」；亦可以睇吓作為黑夜嘅人格化嘅倪克斯（ Νύξ / Nýx）或者作為勝利嘅人格化嘅尼姬（Νίκη / Nike）... 呀噉。

傳說生物

1873 年一幅油畫，幅畫描繪隻薩提洛斯喺度同班寧芙跳舞。

• 寧芙（Νύμφες / Nymph）：係希臘神話入面一類次要女神。正常嚟講，每位寧芙都會同自然環境入面某一件有生命力嘅嘢（例如一樖生得好茂盛嘅樹，或者一條小溪）有連繫，屬自然神靈。
  • 寧芙係「次要」嘅神祇－佢哋唔似得（例如）宙斯或者雅典娜等嘅大天神噉會話掌管住啲乜嘢重大嘅力量，而且佢哋嘅壽命雖然長過人類好多，但依然係有限嘅，唔似得啲大天神噉長生不死；不過佢哋話嗮都係神祇，會有一定嘅神力，而且傳說話佢哋有可能對人類有好意，所以唔少古希臘人都會拜寧芙，想求寧芙保佑。
• 薩提洛斯（Σάτυροι / Sátyros）：係種半人半獸嘅傳說生物，同戴歐尼修斯（Dionysus；掌管酒、果園同豐收嘅天神）好有啦掕。
  • 喺外形上，典型嘅薩提洛斯望落上半身似男人而且從來都唔著衫，下半身就似馬或者山羊（又或者下半身似人但有好似馬噉嘅尾）。除此之外，一隻薩提洛斯仲會有條好大好樣眼嘅下體。
  • 根據傳說描述，薩提洛斯出嗮名鍾意享樂，而且好淫蕩：傳說講，薩提洛斯住喺山同森林等偏僻嘅地方，會祟拜戴歐尼修斯；佢哋好懶唔會點樣做嘢，終日就係掛住跳舞同飲酒，而佢哋唔跳舞飲酒嗰陣，就鍾意用各種方式追求性愛上嘅快感；甚至仲有啲故仔話，薩提洛斯會為咗得到性愛上嘅滿足而走去強姦牲畜、人類同埋寧芙。
• 牛頭怪

主題

希臘神話啲故仔成日提到「有人類自高自大，諗住自己同天神對等甚至超越天神，結果落得悲慘下場」噉嘅情節，例如掗克妮嘅故仔就係噉。

Info：掗克妮（Arachne）

掗克妮個故仔最常見嘅版本如下。

掗克妮係個牧羊人嘅女。佢由好細個嗰陣就喺度學梭織，到佢大個就成為咗個出名擅長做梭織嘅織女。佢對自己嘅技術好有信心。有日，佢仲自大到諗住自己喺梭織技術上能夠打贏雅典娜（Athena；掌管打仗同手工藝嘅女神），於是佢就走咗去挑戰雅典娜，話要同雅典娜鬥梭織。

雅典娜接受掗克妮嘅挑戰：於是兩方就各自郁手織；等到兩個都停手嗰陣，雅典娜織好咗塊緙織壁毯，啲圖案描繪眾神嘅英姿，而掗克妮都係織好咗塊緙織壁毯，不過啲圖案係描繪眾神啲風流事蹟；雅典娜一見到掗克妮件作品就大發雷霆－對於「雅典娜點解發嬲」呢點，唔同傳說有唔同講法，有版本話雅典娜覺得掗克妮件作品嘅題材侮辱緊眾神，亦有版本話雅典娜覺得自己真係輸咗所以惱羞成怒；無論發嬲嘅原因係乜，震怒嘅雅典娜跟住就郁手，將掗克妮件作品撕成碎片。

掗克妮好驚，諗住自己得罪咗天神下場實會好慘，嚇到走去吊頸自殺。不過雅典娜冷靜咗吓，又覺得掗克妮罪不至死，於是就施法將掗克妮用嚟吊頸嗰條繩變成蜘蛛網，而掗克妮就幻化變咗做隻蜘蛛－掗克妮有得保住條命，但要一世係噉喺度織蜘蛛網。

有學者指，掗克妮係希臘神話入面典型「有人類自高自大（hubris），諗住自己同天神對等甚至超越天神，結果落得悲慘下場」嘅故仔。

18 世紀初一幅油畫；幅畫描繪想像中「米娜娃（Minerva；雅典娜嘅羅馬版）郁手毆掗克妮」嘅情境。

睇埋

• 人格化
• 奇幻