維基百科

奇幻

小說類型

奇幻（粵拼：kei4 waan6；英文：fantasy / phantasy [1]，可作粵拼：fen1 te4 si4），又或者叫魔幻，係推想型故仔[歐 1]下嘅一個體裁，泛指個故仔設於虛構宇宙嘅作品。廿世紀嘅出名奇幻作品有《魔戒》、《哈利波特》同《冰與火之歌》呀噉[2][3]。

一個騎士喺度同隻龍戰鬥；龍係西方奇幻故仔入面常見嘅角色類型。

普遍嚟講，奇幻故仔傾向有以下嘅特徵[橋 1][4]：

  • 奇幻故仔因為設喺虛構嘅世界，所以往往會有一啲現實世界冇嘅超自然力量或者同現實世界唔同嘅物理法則，例如係魔法噉。
  • 喺角色上，奇幻故仔多數會涉及一啲神話傳說當中嘅生物，包括高扁、精靈、以及西洋龍等，甚至乎係作者自己想像出嚟嘅生物。
  • 奇幻同科幻以及好多恐怖故仔一樣，故仔內容通常涉及現實世界唔存在嘅事物，所以屬於推想型故仔，三者嘅分別在於科幻重視對科學科技嘅想像（故仔有一啲現實世界冇嘅先進科技）、恐怖故仔主題環繞死亡等人類本能上恐懼嘅嘢（故仔有鬼魂同喪屍等嘅超自然元素），而奇幻冇或者唔著重呢啲嘢；不過一個故仔係有可能同時屬多過一個體裁嘅。

同第啲文學體裁相比，奇幻故仔另一個特色係零舍睇重世界創建：喺作一個奇幻故仔嗰陣，作者需要好俾心機建構佢心目中嘅魔幻世界，例如《魔戒》作者就認真到為自己諗出嚟嗰個魔幻世界整咗地圖，描述佢個世界係點嘅（而且佢並唔係唯一一個噉做嘅奇幻作家）仲要度dok6埋個魔幻世界嘅物理法則同現實世界有乜分別，以及呢個世界嘅魔法點用（要令讀者覺得個故仔有理可循）等嘅問題，務求創作出一個讀者嚮往嘅世界[5][6]。因為呢個緣故，奇幻俾好多人認為係象徵想像力嘅體裁[7]。

定義

編輯
睇埋：奇幻文學同奇幻片

2020 年嘅不列顛百科全書係噉樣形容奇幻呢隻詞嘅[1][8]：

「
粵文翻譯：奇幻係一種想像性質嘅虛構故仔，依靠嘅係背景設定嘅奇異性質（例如設喺第個世界或者時間）以及係角色嘅奇異性質（例如係超自然或者唔自然嘅生靈）... 科幻可以當係奇幻嘅一個形式，不過（奇幻同科幻）呢兩個詞並唔係可以互換嘅，因為科幻通常設喺未來以及建基於科學或者科技嘅某啲部份，而奇幻設喺虛構世界以及用到神話生物嘅魅力。
」

原則上，奇幻唔一定要涉及魔法同相關橋段，不過會俾人歸類做奇幻嘅作品多數都有魔法作為故事元素嘅一部份。好似係歐洲嘅童話故事[歐 2]就充滿咗魔法元素，情節會涉及仙子（例如用魔法變靚裙俾灰姑娘著同變架南瓜馬車出嚟嘅神仙教母）等現實世界當中冇嘅事物，而廿世紀初嘅《魔戒》[歐 3]以及《魔幻王國》[歐 4]等奇幻作品嘅情節就講到有無邊法力嘅戒指同埋用黑暗魔法嘅邪惡大魔王[9]。

奇幻係一個充滿幻想嘅文學體裁。出色嘅奇幻作品往往會創造出令讀者觀眾嚮往嘅虛構世界，例如美國奇幻大師《冰與火之歌》作者佐治·R·R·馬田[歐 5]就係噉樣描述奇幻嘅[10]：

「
粵文翻譯：奇幻（嘅世界）係銀同猩紅、靛青同天藍、帶有金同青金脈嘅黑曜岩。現實（嘅世界）係膠合板同塑膠，用泥啡同單調橄欖色砌出嚟。奇幻陣味似夏灣拿辣椒同蜜糖、肉桂同丁香、一分熟嘅紅肉同好似夏天一樣咁甜美嘅紅酒。現實係豆同豆腐，最尾就得灰燼。
」

概念比較

編輯
内文：科幻、恐怖故仔同神話

奇幻成日俾人攞嚟同科幻[歐 6]、恐怖[歐 7]同神話[歐 8]呢幾種體裁比較[11]：奇幻、科幻同一部份嘅恐怖故仔都屬於推想型故仔[歐 1]，即係內容涉及一啲現實世界冇嘅嘢嘅故仔－奇幻故仔往往以魔法做中心，科幻故仔嘅內容通常會有一啲現實世界冇嘅科技，而恐怖故仔好多時都會用鬼魂同喪屍等涉及超自然事物嘅橋段[註 1]；另一方面，神話亦都俾人指同奇幻有啲似，因為神話同奇幻一樣，都興講一啲超自然嘅事物[橋 2]。呢幾種體裁嘅分野如下：

  • 奇幻同科幻嘅分野在於，科幻－尤其係硬科幻[歐 9]－一般要求盡可能做到科學上準確，而且會嘗試對故仔入面嗰啲唔現實嘅事物作出科學性質嘅解釋，而奇幻一般唔會嘗試解釋「點解呢個虛構世界有魔法」等嘅問題，而且個魔幻世界係（根據當代科學知識）冇可能存在嘅，所以奇幻故仔就零舍要求讀者觀眾暫停懷疑[歐 10]；
  • 奇幻同恐怖故仔嘅共同點係傾向用超自然元素做故仔嘅重點，而兩者嘅分野在於，恐怖嘅主要目的係要引起讀者觀眾嘅恐懼情緒（透過死亡同黑暗等人類本能上會驚嘅事物，以及故仔角色喺面對呢啲嘢嗰陣嘅無助），奇幻一般唔重視呢樣嘢[12]。可以睇埋黑暗奇幻。

奇幻同神話分野主要在於兩點：

  • 奇幻由一個或者少數作者作，而神話喺一個族群內流傳：一份奇幻作品會有特定嘅作者，作者對故仔世界嘅嘢有話事權，能夠決定個故仔嘅真傳[歐 11]（即係官方接受係故仔虛構世界一部份嘅嘢，相對於同人小說等讀者觀眾老作嘅嘢），例如對於「角色 A 係咪愛上咗角色 B」呢個問題嘅答案，最終話事權喺作者手上，讀者觀眾頂櫳都淨係有得猜測同寫同人小說[13]；神話就唔同，神話故仔唔會有一個單一嘅作者，而係會喺一個族群之間嘅人流傳，每次有故仔俾人攞嚟講都可能會起變化（睇埋迷因），不過宗教權威可能會選取某啲神話故仔做佢哋嘅正典[14][15]。
  • 奇幻一般唔俾人當係真，神話俾好多人當真：奇幻作品嘅前題就係個故仔純屬虛構，所以正路唔會有人當故仔內容係真事；相比之下，流傳神話故仔嘅人好多時都會當啲故仔係真，例如古希臘嘅人會流傳有關宙斯等希臘神話天神嘅故仔，而且仲往往會拜宙斯，相信宙斯相關嘅故仔係真事[16]。

子文類

編輯
 
1880 年一幅油畫；描繪畫家想像中「《天方夜談》主角講故仔俾想殺佢嗰個皇帝聽」嘅情境。

奇幻係一個大文類，底下可以按好多準則分子文類[註 2][9]：

按虛構程度分

編輯
内文：古典奇幻同當代奇幻
  • 古典奇幻[歐 12]設於高度虛構嘅世界，故仔世界具有獨立於現實世界嘅物理法則（但自身喺物理上內在一致）同地點[17]；古典奇幻嘅出名作品有《魔戒》、《魔幻王國》同由佐治·R·R·馬田作嘅《冰與火之歌》[歐 13]，以冰與火之歌為例，冰與火之歌舞台主要設於維斯特絡[歐 14]呢笪虛構大陸，作者有為維斯特絡畫咗多幅地圖，喺呢個特殊世界當中，一個季節閒閒地可以維持幾年咁耐嘅時間，而個故仔開始嗰陣啱啱係維持咗近乎十年嘅夏天就快完（同現實唔同嘅物理法則），維斯特絡以北嘅地方長年積雪（特色地點），而且有啲得人驚嘅類人生物喺嗰度，等緊冬天來臨嘅機會侵略維斯特絡（衝突）[18]。
  • 當代奇幻[歐 15]背景都係設於虛構嘅世界（定義上屬奇幻），但個虛構世界同作者身處嘅世界好相似，除咗可能有魔法之外，基本上同現實世界冇乜大分別，而且故仔會出現現實世界嘅地點；當代奇幻出名嘅作品有《哈利波特》[歐 16]－哈利波特背景設於一個虛構版本嘅廿世紀尾英國，呢個版本嘅英國同現實世界嘅英國冇乜大分別（而且故仔仲有提及倫敦等現實英國嘅地點），但就係有魔法同魔法生物嘅存在；亦都可以睇吓《波西傑克森》[歐 17][19]。
  • 歷史奇幻[歐 19]設於虛構世界（定義上屬奇幻），但個虛構世界同某啲古代嘅社會好相似，除咗可能有魔法之外，基本上同嗰啲古代社會冇乜大分別，而且故仔嘅情節好多時直頭係基於某啲歷史大事嘅；例如係《天方夜談》[歐 20]（設於 8 至 14 世紀嘅中東）以及歐洲嘅童話故事（多數設於中世紀嘅歐洲）等，對現代人嚟講都可以算係歷史奇幻[21]。
  • Fantastique（法文入面奇幻、幻想噉解）係一個源自法文文學嘅詞語，指一啲描繪超自然力量入侵現實世界嘅故仔；一個 fantastique 嘅故仔設於現實世界（唔係古典奇幻），故仔講述角色面對一啲佢哋唔能夠理解嘅超自然力量，而且呢啲力量喺故仔入面係完全唔尋常嘅，即係話讀者觀眾同故仔角色會否認呢啲事物嘅存在[註 3]－亦都因為噉，fantastique 故仔好多時都會帶有恐怖成份，會描繪角色面對超自然事物嗰陣嘅恐懼同無助感；Fantastique 文學例子有 18 世紀嘅法國童話故事《美女與野獸》[歐 21]，而《天方夜談》（故仔設於 8 至 14 世紀嘅中東，講角色遇到燈神等佢哋唔敢相信嘅超自然事物）亦都俾人指有 fantastique 嘅成份[22]。

按其他準則分

編輯
睇埋：怪奇小說
 
「有濃密白鬚、學識淵博嘅老魔法師」常見於西方奇幻作品。
「有濃密白鬚、學識淵博嘅老魔法師」常見於西方奇幻作品[33]。 
 
狼人係一種虛構嘅超自然生物，常見於有恐怖性質嘅故仔。
狼人係一種虛構嘅超自然生物，常見於有恐怖性質嘅故仔[橋 3]。 
 
1901 年一幅描繪《美女與野獸》嘅圖
1901 年一幅描繪《美女與野獸》嘅圖
 

重要概念

編輯
 
虛構大陸阿里迪亞[歐 32]嘅地圖
 
呢幅圖畫描述《格列佛遊記》主角去到小人國；現實世界並冇小人國。
内文：空想世界
睇埋：虛構宇宙

世界創建

編輯
内文：世界創建

喺敘事學上，世界創建[歐 33]指透過故仔描繪一個虛構世界嘅過程。世界創建喺（定義上係設於虛構世界嘅）奇幻故仔裏面零舍重要。作故仔嘅人要思考

  • 個故仔嘅世界嘅物理法則係點；
  • 自然環境係點（奇幻故仔嘅作者好多時仲會幫自己故仔嘅架空世界畫幅地圖，例子可以睇魔戒）；
  • 社會文化係點（例子：托爾金為魔戒嘅世界創建咗多隻人造語言）；
  • 歷史（例：「500 年前，高扁族同精靈族曾經打過一場大仗，雙方都死傷慘重，從此兩族誓不兩立，到咗今日都仲係噉」）；
  • 有乜特色地點（例：霍格華茲魔法學校係一間歷史悠久嘅魔法學校，係哈利要去返學嘅地方）；

... 等等[34]。

對於世界創建幾咁重要，廿世紀意大利作家兼文學評論家烏伯圖·艾高[歐 34]就噉樣講[35]：

「
粵文翻譯：創造約束（指對『故仔世界有啲乜嘢事係有可能』嘅限制）對於自在創作嚟講係必要嘅。喺詩入面，約束可以由韻律、音步、節奏施加，可以由所謂嘅『耳仔聽到嘅詩歌』施加。喺虛構故仔入面，故仔周圍嘅世界提供咗約束。呢一點同真實性無關... 一個完全唔真實嘅世界（例如一個有魔法嘅世界）可以被（作者）建構，喺呢個世界裏面驢曉飛而且公主可以靠俾人惜一啖起死回生；但嗰個純粹有可能同唔真實嘅世界一定要根據故仔初頭定義好嘅結構存在（我哋需要知呢個世界係咪一個『王子惜一啖可以令公主起死回生』嘅世界，定女巫惜一啖能唔能夠令公主起死回生，同埋公主惜一啖係咪淨係會令青蛙變王子，定係又會令例如犰狳都變王子）。
」

世界創建主要透過兩樣嘢嚟做[橋 4][36]：

  • 一方面，作者會透過故仔入面發生嘅事展示故仔嘅虛構世界（睇埋 show, don't tell），例如故仔講主角同佢嘅同伴出發去打低魔王，情節其中一段講佢哋去到一間酒吧，俾魔王嘅手下包圍，但喺呢個時候，有一班高扁同一班精靈因為兩族之間嘅世仇喺間酒吧嗰度開片，主角同佢嘅同伴趁混亂走佬－呢件事對情節進展有用，同時又展示咗有關故仔虛構世界嘅資訊（呢種做法一般俾人認為係上策）；
  • 另一方面，好多奇幻作者會直接噉向讀者描述同講解故仔嘅虛構世界（即係 show, don't tell 當中嘅 tell）；事實係，喺奇幻文學作品裏面，作者好多時會喺前言等嘅地方加入故仔虛構世界嘅地圖，又或者係喺故仔開頭以敘述者嘅身份簡短噉講解個故仔嘅虛構世界。

魔法系統

編輯
内文：魔法系統同暫停懷疑

暫停懷疑[歐 35]係奇幻作者度自己個故仔同做世界創建嗰陣要考慮嘅一樣嘢。暫停懷疑嘅概念由英國浪漫主義詩人柯勒律治[歐 36]喺 1817 年提出。柯勒律治指出，如果一個作家能夠喺佢嘅作品當中加入人情同有些少似現實嘅嘢[歐 37]，噉讀者就會自願噉暫停佢哋對故仔內容嘅質疑—即係

「呢個虛構世界根本唔真實」或者
「魔法根本唔存在」

等嘅判斷，並且享受個故仔[37]。

呢一點解釋到點解人會對奇幻或者科幻等嘅推想性質文學體裁有興趣：現代文學理論上一般認為，一個故仔唔使一定要真實，而只係需要做到可信（喺個故仔世界入面屬正常）同內部一致（即係話個故仔世界要按一啲法則運作，而且呢啲法則彼此之間唔會有矛盾），就有可能令讀者觀眾接受個故仔嘅內容；而當一個作者挑戰讀者觀眾嘅暫停懷疑底線挑戰得太過分，例如一個奇幻故仔，個故仔早期講明咗個世界嘅魔法一定係要手持魔法杖先用得嘅，但喺高潮嗰陣主角無啦啦做到空手用魔法，事後又冇解釋，噉就會破壞讀者觀眾嘅暫停懷疑，令讀者觀眾開始拒絕個故仔嘅內容，並且覺得個故仔唔好睇[橋 5][38]。

因為要做到可信同內部一致，奇幻文學界有所謂嘅魔法系統[歐 38]概念，一個魔法系統係指故仔涉及魔法元素嘅奇幻作品當中對「魔法點運作」嘅描述，即係「啲魔法做到啲乜嘢效果」、「啲魔法係邊啲人用得到」以及「啲魔法嘅力量有乜嘢限制」等問題嘅答案，令個故仔有理可循[39]，例如《哈利波特》就花咗唔少篇幅講哈利仔喺魔法學校學魔法，呢啲情節得意之餘，仲會間接話俾讀者觀眾知「哈利波特世界裏面嘅魔法係點運作嘅」，而打後情節當中發生嘅事唔會同呢啲法則有所矛盾[40]。

常用橋段

編輯
内文：奇幻橋段同魔法
睇埋：希臘神話、羅馬神話同北歐神話

廿世紀同廿一世紀初嘅奇幻作品常用嘅橋段有以下呢啲[41][42]：

角色橋段

編輯
 
呢幅畫描繪一個巫師施緊法。廿一世紀初嘅典型巫師形象係成面白鬚同埋著住長嘅袍。
 
喺神話同奇幻性質嘅故仔當中，啲人成日會用魔法嚟預知未來。
上圖呢一幅油畫就係描繪一個女人喺度睇水晶球：（設計對白）「水晶球呀水晶球，可唔可以話我知下期六合彩會開乜嘢冧把？」
睇埋：仙子同傳說生物
  • 被選中者[歐 39]：故仔某一個角色俾某啲龐大嘅力量選中咗，成為唯一能夠解決情節當中嘅問題嘅人，例如「好耐好耐之前，有個先知作咗個預言，話有一日會有個俾天神揀中咗嘅人出現，打低大魔王同驅逐籠罩世界嘅黑暗」，然後故仔中途發現主角就係呢個被選中嘅人，最後主角打低魔王令預言應驗[橋 6]。到咗廿一世紀初，「被選中者」呢條橋一般俾西方文壇覺得係一種陳腔濫調，所以唔建議作家直接用呢條橋[43]。
  • 秘密皇族[歐 40]：故仔主角或者其中一個重要配角係一個孤兒，養父母身份係平民，喺農田等嘅環境長大，而佢身處嗰個王國由一個殺死咗前任統治者嘅篡位者統治；喺故仔途中，嗰個孤兒角色發現佢查實係前任皇族嘅後裔，而佢之所以冇死係因為有個貴族角色為咗保護佢而將佢送咗去養父母嗰度。到咗廿一世紀初，呢條橋喺西方奇幻文壇經已成為咗一種陳腔濫調[橋 7]。
  • 劍：一種可以用嚟拮同劈敵人嘅長形武器、兩邊鋒利、多數尖頂，其中一端會有個柄俾用把劍嗰個人揸，等個人可以揮舞佢把劍；喺中世紀嘅歐洲，整得靚嘅劍係貴族嘅象徵，而喺廿世紀嘅奇幻故仔當中，主角通常會以劍為主要武器，呢啲劍好多時會有魔法特徵，例如係會射閃電噉[橋 8]。
  • 睿智嘅老巫師[歐 41]：指一個年老又有學識嘅巫師；典型嘅老巫師形象通常係一個有濃密白鬚嘅阿伯，會著住長袍同戴尖頂帽，曉用魔法；呢啲老巫師多數係忠嘅，常見嘅角色係負責做主角同佢同伴嘅師傅，教主角一啲重要嘅知識同技能，好多亦係負責提出預言嘅人。亞瑟王相關傳說當中嘅梅林[歐 42]成日俾現代人描繪成老巫師噉嘅形象[33]。
  • 魔杖[歐 43]：指傳統形象嘅巫師施展魔法嗰陣會用嘅架生，一支魔杖通常會係一碌木造嘅長條，又輕又細可以用單手攞住；巫師施展魔法嗰時，會一路用一隻手揮舞佢支魔杖、一路唸咒語，然後魔法嘅力量就會由支魔杖嗰度走出嚟[44]；例如《獅子·女巫·魔衣櫥》[歐 44]當中扮演故仔大奸角嘅白女巫就會用佢嘅魔杖將人變成石頭[45]。
  • 麻瓜[歐 45]：指唔識用魔法嘅人；麻瓜呢個概念通常出現喺設於類似現代世界嘅當代奇幻作品裏面，例如喺《哈利波特》當中，故仔世界就俾作者設定成得少部份嘅人識得用魔法或者知道魔法嘅存在，唔識魔法嘅人就係所謂嘅麻瓜，而識魔法嘅人往往會為咗避免同麻瓜起衝突特登隱瞞有關魔法嘅事[橋 9]。
  • 黑暗魔王[歐 46]：指一個扮演故仔大奸角、統始黑暗王國嘅角色；黑暗魔王一般會有青面獠牙嘅部下為佢做嘢（睇埋半獸人同死靈）以及同主角戰鬥，佢本人好多時會俾第啲角色指係邪惡嘅化身，而佢所統始嘅黑暗王國通常一望就知係對常人嚟講陰森恐怖（黑暗、荒蕪又充滿危險）嘅地方，反映佢嘅邪惡；黑暗魔王常見嘅目的包括征服世界同用黑暗籠罩世界呀噉；例子有《魔戒》當中嘅魔王索倫、《哈利波特》當中嘅黑魔王佛地魔、《超級瑪利奧系列》當中嘅 Bowser 同埋《OVERLORD》嘅主角等等[46]。
  • 半神[歐 47]：神話成日提到嘅一個概念，指有個人，佢阿爸阿媽其中一方係天神、另一方係凡人－所以呢兩方生嘅細路血統上「一半係凡人一半係神」，而呢啲噉嘅細路通常會有某啲遠超凡人嘅神力；例如希臘神話入面嘅大力英雄海格力斯[歐 48]（佢嘅羅馬版係大力神）就係一個半神。佢阿爸係眾神之王宙斯，而佢阿媽係個凡人，海格力斯天生力大無窮，希臘神話有好多講佢事跡嘅故仔[47]。

... 等等。

魔幻異獸

編輯
内文：西洋龍
睇埋：怪獸

現代奇幻故仔好興用喺人類（尤其係歐洲人）傳統民間傳說以至神話當中出現嘅傳說生物[註 4]。

  • 西洋龍[歐 49]：歐洲人嘅民間傳說裏面都有龍呢種傳說生物；同東方人嘅龍唔同嘅係，西洋龍嘅傳統形象係
    1. 凶惡（相對於吉祥嘅東方龍）、
    2. 有翼曉飛（東方龍都曉飛，不過冇翼）、
    3. 會噴火（東方龍通常唔會噴火），而且
    4. 身形冇東方龍咁修長；
    • 喺現代西方奇幻入面，龍嘅形象喺正面度上相當多變－有奇幻故仔裏面嘅西洋龍係冇智能嘅，淨係做奸角嘅手下或者野生動物，但又有好多作品將西洋龍描繪成法力高強嘅有智能動物，某啲作品仲將佢哋描繪成好似天神一樣高於人類嘅存在體[48]。廿一世紀初有西洋龍嘅奇幻作品有夢工場嘅動畫片《馴龍記》[歐 50]噉[49]。
 
2021 年斯洛文尼亞首都盧布爾雅那嘅一座雕像；座雕像描繪嘅係一隻典型嘅西洋龍。
2021 年斯洛文尼亞首都盧布爾雅那嘅一座雕像；座雕像描繪嘅係一隻典型嘅西洋龍。 
  • 不死鳥[歐 51]：源自希臘神話嘅一種傳說中嘅雀鳥；根據傳說，不死鳥能夠由太陽嗰度得到神力，喺死嗰陣會發放出強烈嘅光同火，而燒完之後隻不死鳥然後就會由灰燼當中重生，所以隻雀永遠都唔會死；不死鳥呢樣嘢喺現代嘅奇幻作品當中不時都會出現，例如《哈利波特》裏面就有提到不死鳥[50]。可以睇埋鳳凰。
  • 聖經海怪[歐 52]：源自舊約聖經當中嘅一隻海中怪獸；根據舊約聖經嘅描述，聖經海怪形態上係一隻身形長、有翼嘅大海龍，體形非常巨大，有啲版本嘅傳說仲話佢大隻到能夠用自己嘅身體圍繞住成個物質世界，而且仲曉噴火[51]；喺廿一世紀初，海怪嘅形象時不時都會喺西方嘅奇幻故仔當中出現，奇幻裏面嘅海怪多數都係巨型（身體有成幾架船咁大）嘅大海龍噉嘅樣，亦都有啲版本會將海怪描繪成個樣似鯨魚，現代虛構故仔當中嘅海怪多數唔識噴火，不過佢哋依然可以靠住因為龐大體型而有嘅力量而對出海冒險嘅主角造成威脅[橋 10][52]。
  • Kraken（粵拼：ku1 laa1 kan4）：源自北歐嗰頭嘅一種傳說中嘅巨型海中怪獸；同聖經海怪唔同嘅係，kraken 喺形象上係比較似八爪魚或者墨魚等嘅頭足綱動物，而且通常冇聖經海怪咁大（不過都有成架船咁大）；根據北歐人嘅傳說，kraken 住喺挪威對開嗰個海，會對周圍嘅船造成威脅。Kraken 喺現代嘅奇幻作品入面成日都會出現，例如《魔盜王》[歐 53]當中講到、一隻 kraken 用佢啲觸手纏住船令船沉沒嘅情節噉，就好深入民心[53][橋 10]。
  • 分身[歐 54]：好多時係種邪惡嘅超自然生物，一隻分身會具有變身嘅異能，好多時能夠完美噉複製另一個個體嘅外形，會靠呢種能力做好多惡行，例如[54]：
    • 變身假扮成佢目標人物噉嘅樣，跟住郁手謀殺目標人物，再進而取代目標人物－隻分身可能演技好好，唔淨只模仿到受害者個樣，仲模仿到佢啲行為，佢受害者嘅屋企人同朋友可能完全唔知發生咗咩事，最後隻分身就成功攞走一個人嘅身份。
    • 變身假扮成佢目標人物嘅朋友或者屋企人，從而引誘目標人物放低戒備；然後隻分身就可能會趁目標人物冇嗮防備，將佢食落肚。
  • 元素精靈[歐 55]：本來係文藝復興時期嘅煉金術圈講到嘅一種傳說生物；一隻元素精靈係身體完全純粹由一種「元素」（指地水火風等嘅古典元素）組成嘅靈，一隻水元素精靈可以係似人形但能夠例如隨意將身體某啲部份變成水，而一隻土元素精靈可能係身體完全由泥土構成[55][56]。
 
1806 年嘅一幅插圖；幅畫描繪畫畫人心目中嘅不死鳥。
1806 年嘅一幅插圖；幅畫描繪畫畫人心目中嘅不死鳥。 
 
1810 年一幅畫描繪想像中一隻 kraken 用佢啲觸手攻擊一架船。
1810 年一幅畫描繪想像中一隻 kraken 用佢啲觸手攻擊一架船。 
 
《D&D》入面嘅岩石元素精靈
《D&D》入面嘅岩石元素精靈
 
 
呢幅圖畫描繪《D&D》入面嘅蠍獅；蠍獅嚟自古代波斯嘅傳說，而喺廿世紀奇幻當中，蠍獅形象係有獅子噉嘅身，蠍子噉嘅尾，可以有翼識飛，好多時會守住某啲重要嘅嘢，例如有個地牢入面收埋咗件無價嘅法寶，地牢門口有隻蠍獅守住。
呢幅圖畫描繪《D&D》入面嘅蠍獅[歐 56]；蠍獅嚟自古代波斯嘅傳說[57]，而喺廿世紀奇幻當中，蠍獅形象係有獅子噉嘅身，蠍子噉嘅尾，可以有翼識飛[58]，好多時會守住某啲重要嘅嘢，例如有個地牢入面收埋咗件無價嘅法寶，地牢門口有隻蠍獅守住。 

奇幻種族

編輯
内文：奇幻種族

種族[歐 57]係現代奇幻嘅一個概念：西方奇幻故仔成日會講個虛構世界入面有人類以外嘅有智能生物種族；以奇幻做美學設計嘅 RPG 遊戲（尤其係好似《魔獸世界》等嘅奇幻 MMORPG）好多時會俾玩家喺建立自己嘅角色嗰陣揀自己角色嘅種族，唔同種族喺能力值上有唔同。

奇幻作品比較常見嘅種族有以下呢啲[橋 11][59]：

  • 矮人[歐 58]：源自古代日耳曼人民俗嘅一種傳說生物[60]；喺現代嘅奇幻故仔當中，矮人通常俾人描繪成生得矮，但身體粗壯而且力大無窮，男嘅矮人通常會有濃密嘅鬍鬚，好多時俾人描繪成喺工藝上有特殊天賦，例如《魔戒》入面就有零舍擅長採礦同打造武器嘅矮人族[61]。
  • 精靈[歐 59]：源自古代日耳曼人民俗嘅一種傳說生物；喺現代嘅奇幻故仔當中，精靈通常俾人描繪成身材修長、尖耳、個樣生得靚、愛好大自然、而且長命過人類好多，好多時仲俾人描繪成零舍有魔法天份；例如《魔戒》入面就有長生不死嘅精靈族[橋 12]。另一方面，因為佢哋呢啲高貴特徵，奇幻作品有陣時會將精靈描繪成高傲又睇唔起第啲種族[62]。
  • 高扁[歐 60]：源自歐洲民間故仔嘅一種傳說生物；喺現代奇幻故仔當中，高扁通常俾人描繪成身材細粒（成年高扁身材通常似得幾歲嘅人類細路）、光頭又醜樣，而且詭計多端，鍾意惡作劇或者偷嘢；例如《哈利波特》就有講到會營運魔法銀行嘅聰明高扁族[63]。
  • 仙子[歐 61]：源自古代歐洲民間故仔嘅一種傳說生物；喺廿世紀嘅奇幻故仔當中，仙子通常俾人描繪成比較細粒（好多時得昆蟲咁大隻）、有好似蝴蝶噉嘅翼、仲曉用魔法；例子有 1953 年嘅迪士尼動畫片《小飛俠》[歐 62]當中嘅小叮噹[橋 13]。
  • 人魚[歐 63]：喺世界多地嘅民間傳說當中都有嘅一種傳說生物，指上半身係人（或者似人）下半身係魚嘅生物，人魚上半身可以同人類冇乜分別，又可以好醜樣好恐怖，而美人魚[歐 64]就係指上半身係靚女嘅人魚；人魚可以係奸角－喺唔少故仔當中，美人魚都被描繪成會以甜美嘅聲唱歌，用佢哋嘅歌聲迷惑水手嘅心智同令船沉沒。人魚喺現代奇幻作品當中頗為常見，例如著名童話故事《人魚公主》[歐 65]就係集中講美人魚[64][橋 14]。
  • 半獸人[歐 66]：源自歐洲民間故仔嘅一種傳說生物；喺現代嘅奇幻故仔當中，半獸人一般俾人描繪成所謂嘅「邪惡種族」，佢哋醜樣得嚟又大隻，智能唔高但又充滿攻擊性，所以成日會扮演黑暗魔王嘅手下；例如《魔戒》當中嘅半獸人族成個族都係大魔王索倫嘅手下[65]。
  • 山怪[歐 67]：源自北歐民間故仔嘅一種人形傳說生物；古代啲故仔對山怪嘅描述相當唔一致，而喺現代嘅奇幻故仔當中，山怪通常係一種住喺深山或者山窿等嘅地方、生得醜樣嘅人形生物，佢哋好多時會有好勁嘅復原能力，即係例如主角攞把劍一嘢劈中隻山怪，吓攻擊造成嗰個傷口會喺幾秒內好返嗮，主角要用火等嘅方法先至可以消滅佢；亦有啲故仔會將山怪描繪成友好，或者至少講佢哋對人類冇乜敵意，人類唔去騷擾佢哋佢哋就唔會攻擊人[66]。
  • 魅魔[歐 68]同男夢魔[歐 69]：歐洲同英文圈嘅民間傳說入面嘅邪靈；
    • 魅魔會以生得好靚嘅女人噉嘅形態現身，仲會勾引男人，引男人同佢哋做愛。傳說仲話，同魅魔做愛會慢慢噉吸走一個男人身上嘅精力，最後令佢死亡[67]。
    • 男夢魔一般畀人認為係魅魔嘅男性版本。相傳佢哋會喺夜晚嗰陣搵瞓緊覺嘅女人，嘗試同呢啲女人做愛；根據某啲中世紀嘅傳說，一個女人同男夢魔做過愛，會生出能夠用巫術嘅細路，例如好出名嘅魔法師梅林就有傳說話佢阿爸係隻男夢魔[68]。
 
一個典型嘅矮人
一個典型嘅矮人
 
 
一個典型嘅精靈
一個典型嘅精靈
 
 
一隻典型嘅高扁
一隻典型嘅高扁
 
 
一隻典型嘅小仙子
一隻典型嘅小仙子
 
 
一條典型嘅美人魚
一條典型嘅美人魚
 
 
一隻典型嘅半獸人
一隻典型嘅半獸人
 
 
一隻典型嘅現代奇幻山怪
一隻典型嘅現代奇幻山怪
 
 
典型嘅魅魔形象
典型嘅魅魔形象
 
 
著名奇幻檯上 RPG《D&D》嘅圖畫；幅畫描繪「一副副識得郁嘅骨」。

不死生物

編輯
内文：不死生物
睇埋：Dullahan同邪靈

不死生物[歐 70]，又有叫死靈，係傳說生物嘅一類，指一啲明顯死咗、但（因為魔法等嘅超自然力量）能夠好似生勾勾嘅生物噉活動嘅生物－即係例如隻嘢曉郁同講嘢，但冇心跳同脈搏；喺奇幻故仔入面，呢啲生物可忠可奸，有啲故仔講佢哋唔自願噉俾邪惡魔法師變佢哋做不死，又有啲故仔講佢哋因為自己唔再有生命、仇恨生勾勾嘅人類而想殺人。會用不死生物同相關橋段嘅故仔觸及死亡相關主題同恐怖谷等嘅嘢，所以多數會有恐怖成份，傾向於黑暗奇幻[橋 15][69]。

  • 鬼魂：指因為肉體死亡而離開咗肉體嘅靈魂，通常觸摸唔到，能夠穿過實體。
  • 喪屍[歐 71]：指受超自然力量影響而曉郁嘅死屍，通常行得慢、冇乜智能可言同埋會想食人肉，好多時被描繪會成羣噉攻擊生勾勾嘅人；恐怖生存遊戲好興用喪屍做最基本嘅敵人，例子可以睇《生化危機系列》[歐 72][70]。
  • 吸血鬼[歐 73]：都係一種受超自然力量影響而曉郁嘅死屍；同喪屍唔同嘅係，吸血鬼郁動速度唔慢、有相當嘅智能同埋需要吸生勾勾嘅人或者動物嘅血嚟維持自己存在，好多時仲會有能夠變身成蝙蝠等嘅特異能力；喺弱點上，吸血鬼多數怕陽光所以日頭會喺棺材入面瞓覺，而除咗陽光之外好多時仲會驚十字架同大蒜。源自 1897 年恐怖小說《德古拉》[歐 74]嘅德古拉伯爵就係一個好出名嘅吸血鬼角色[71][72]。
  • 死靈術士[歐 75]：喺現代奇幻故仔當中通常係指使用死亡相關魔法嘅魔法師，呢啲魔法師使用嘅咒語能夠直接令周圍嘅生物死亡，以及將死屍變化成喪屍做自己嘅部下；因為死靈術士有呢啲令人不安嘅能力，佢哋多數會係奸角[橋 16]。
  • 巫妖[歐 76]：指用邪術令自己變成不死嘅死靈；喺奇幻故仔當中，有好多法力高強嘅死靈術士會想自己長生不死，而佢哋好多時會自願噉負出某啲巨大代價（例如係將自己嘅靈魂同人性賣俾惡魔）嚟變成巫妖得到長生；巫妖外觀上通常會有明顯「死咗」嘅特徵，例如皮膚呈灰白色，甚至係冇嗮肉得返棚骨，佢哋通常能夠保留自己生前嘅智能同法力，而且往往仲會因為佢哋通曉死靈術而成為喪屍等「低級」死靈嘅領袖；喺奇幻電子遊戲入面，巫妖通常會係大佬級嘅角色[73][橋 17]。
  • 食屍鬼[歐 77]：源於遠古阿拉伯地區嘅傳說生物；响廿世紀起嘅奇幻當中，食屍鬼通常係種死靈，源於生前好鍾意食肉嘅死人；《龍與地下城》[歐 78]就有講到食屍鬼一路全身發出腐爛嘅惡臭，一路食死屍肉或者去捉生勾勾嘅人嚟食[註 5][74]。

設定橋段

編輯
睇埋：中世紀
  • 中世紀[歐 79]嘅世界：西方嘅奇幻作品好多時會設喺一個類似中世紀歐洲嘅時空，故仔當中用到嘅傳說生物同魔法源自歐洲嘅民間故仔，背景嗰度會有城堡、騎士同 tavern 等中世紀歐洲文化入面有嘅嘢；例如《冰與火之歌》就係噉[橋 18]。
  • 中世紀停滯[歐 80]：指一個社會文化唔會點演變嘅世界，例如一本奇幻小說，本續集設喺第一部作品嘅 3,000 年之後，但續集入面嗰個世界喺文化同科技等方面都同第一本作品入面嗰個世界冇乜差異；呢種情況常見於古典奇幻—「3,000 年前有一個預言話會有一個被選中者會出現...」，而呢點俾唔少文學評論者批評話難以令人信服（睇返暫停懷疑）－例如廿一世紀初嘅英文同 18 世紀嘅英文經已有明顯差異，令到廿一世紀初嘅人睇起嗰個時代嘅文學作品上嚟可以好吃力，所以有奇幻界人士提倡，做世界創建嗰陣作者應該要設定個虛構世界喺社會文化上會變化[橋 19]。
  • 魔法學校[歐 81]：指一間多古怪嘢（所以成日有刺激嘢發生）嘅學校，通常係建立嚟俾人學魔法嘅；故仔嘅主角通常會係呢間學校嘅學生，並且經歷各種刺激嘅體驗，出名嘅例子可以睇《哈利波特》當中嘅霍格華茲魔法學校[75][76]。
 
英格蘭溫莎堡[歐 82]；城堡係中世紀歐洲嘅特色建築，成日會喺奇幻故仔當中出現。

拉雜橋段

編輯
  • 毀滅法寶[歐 83]：指一件擁有巨大魔力嘅法寶，通常會受到大魔王等嘅奸角覬覦，因而扮演個故仔嘅麥高芬[歐 84]；例如《魔戒》裏面嗰隻魔法戒指就係一件威力無邊嘅法寶，而故仔嘅主角想做嘅嘢就係阻止魔王索倫得到呢件法寶[橋 20]。
  • 旅程[歐 85]：七大基本情節當中被指零舍常喺奇幻故仔當中出現嗰一個；旅程型嘅情節會講主角同佢同伴出發去追尋一件物件或者去某個地方（拯救俾魔王捉走嘅公主、打低魔王或者搵寶藏等等），喺中途會遇到各種嘅難關以及由難關當中成長。《魔戒》就係一個經典例子，講主角同佢嘅同伴為咗要摧毀一隻附有邪惡力量嘅魔戒而帶住隻魔戒，出發去一個有能夠破壞任何魔法嘅神山，佢哋喺中途遇到多種危險，例如同想得到邪惡力量嘅人戰鬥，最後佢哋成功摧毀魔戒，為世界帶嚟和平[77]。

同科幻嘅結合

編輯
 
1897 年一個科幻故仔當中所想像嘅外星人侵略；「外星人侵略地球」喺當時係比較嶄新嘅諗頭。
内文：科學奇幻

「科幻係一啲可能發生嘅嘢－但你通常唔會想佢發生。奇幻係一啲唔可能發生嘅嘢－不過你好多時會想佢發生。」

英倫著名科幻作家亞科·查理斯·卡奇[歐 86][78]

科學奇幻[歐 87]係科幻同奇幻嘅結合：科幻係另一種推想型故仔，指主題圍繞科學同先進科技嘅故仔，出名作品有《攻殼機動隊》、《廿二世紀殺人網絡》[歐 88]同《未來戰士》[歐 89]呀噉；傳統上，奇幻同科幻俾人認為係相反嘅兩個體裁－科幻建基於科學科技，硬科幻會著重科學上準確，背景設定多數設喺未來；而奇幻就多數都會建基於魔法等嘅超自然元素，唔會著重解釋呢啲嘢嘅運作原理，背景設定好多都建基於古代社會，例如中世紀嘅歐洲噉。不過事實上，有一啲故仔會結合兩個體裁－同時運用奇幻上常見嘅橋段同科幻上常見嘅橋段，而且兩者比例相約，令成個故仔處於科幻同奇幻之間[橋 21][79]。另一方面亦都有人主張，好多「軟」（唔重視科學準確）得滯嘅科幻作品喺科學上極唔準確，所以可以當成「設喺虛構世界」－即係實際上應該被歸類做科學奇幻[80]。

例子：想像以下嘅故仔[81]－

  • 背景設定：故仔設喺一粒叫蓋亞[歐 90]嘅行星上，蓋亞嘅地質好特殊－蓋亞地殼內部唔係熔岩，而係一啲綠色嘅流體；呢啲流體俾人稱為「魔晄」，俾人話係「蓋亞嘅血」；蓋亞上嘅人類有近似廿世紀地球嘅科技，佢哋發現咗好多方法可以利用魔晄－魔晄會結晶成能夠令人使用魔法嘅魔晶石，而且超大型科技企業神羅公司仲創造出大型嘅魔晄反應爐，由蓋亞內部吸取魔晄用嚟做能源；
  • 另一方面，有好多人都認為神羅公司由地底吸魔晄會「殺死」蓋亞，於是佢哋就成立地下反抗組織，反抗神羅公司；故仔嘅主角卡勞德[歐 91]係一個受神羅公司改造過嘅超級士兵；喺故仔開始嗰陣，佢受呢啲地下反抗組織請佢做僱傭兵，幫手破壞神羅公司嘅魔晄反應爐，中途佢哋有用魔晶石施展魔法同神羅公司嘅士兵戰鬥，又用炸彈同槍炮破壞魔晄反應爐。

上述嘅故仔俾好多人指係科學奇幻：一方面，「設喺虛構世界」、「有生命嘅行星」同魔法一般俾人認為係屬於奇幻嘅橋段；另一方面，故仔入面魔晄反應爐嘅設計望落似未來嘅科技，而「受改造嘅超級士兵」一般俾人認為係科幻先會有嘅橋段；即係話個故仔同時用咗奇幻橋段又用咗科幻橋段，而且兩者比例相約。

奇幻歷史

編輯
内文：奇幻史
睇埋：魔幻王國同魔戒

奇幻呢家嘢歷史悠久，可以追溯到去公元前嘅遠古時代：早喺公元前 2334 年至前 2154 年嘅兩河流域文明古國阿卡德帝國[歐 92]，經已有人喺度寫有奇幻元素嘅文學作品[82]；而古希臘嘅作家亦有書寫一啲有奇幻元素、寫嚟俾大人睇嘅作品，例如古希臘劇作家阿里斯托芬[歐 93]（448 - 380 年 BC）其中一篇作品就有講到一個人喺雲裏面同雀仔一齊起咗座城市同挑戰眾神之王宙斯嘅權威[83][84]。

中世時代（5 至 15 世紀）嘅人類都作咗唔少有奇幻成份嘅故仔，出名嘅例子包括：

  • 伊斯蘭世界有《天方夜談》呢本書，本書集結咗 8 至 14 世紀同之前嘅眾多中東民間故仔，呢啲故仔入面有燈神同飛毯等奇幻性質嘅元素，對現代奇幻文化都影響深遠[85]；
  • 歐洲嘅童話故事就集結咗中世紀歐洲嘅民間故仔，故仔提到仙子同巫師等嘅元素，而呢啲橋段到咗現代都仲好多奇幻作家會用[86]。

一般認為，最早算得上係現代奇幻故仔嘅係蘇格蘭作家佐治麥當勞[歐 94]喺 19 世紀中寫嘅作品，當時佐治麥當勞寫小說，內容講成年男女喺仙子嘅影響下追求愛情，而《魔幻王國》作者魯益師[歐 95]等多位廿世紀奇幻作家都認自己受過佢嘅影響[87]。

廿世紀嘅奇幻喺文學、漫畫、電視劇以及電影等嘅媒體都有重大發展。喺文學方面，英國作家 J. K. 路靈[歐 96]嘅《哈利波特》以及美國作家佐治·R·R·馬田嘅《冰與火之歌》等嘅作品都大受歡迎，仲有俾人改編做電視劇同戲[88]；另一方面，電子遊戲呢種新進媒體廣泛噉採用奇幻美學－出名例子可以睇吓《魔獸世界》、《薩爾達傳說系列》以及係《最終幻想系列》等嘅作品，亦都令奇幻進一步擴展到社會大眾嘅意識當中[59]。

到咗 2010 年代初，奇幻經已成為咗銷售量最高嘅大眾文學體裁之一，喺文學地位上同科幻以及愛情等嘅大體裁睇齊[89]。

 
呢幅 19 世紀嘅日本畫描繪畫家想像中嘅孫悟空；《西遊記》都可以算係有奇幻成份嘅作品。
呢幅 19 世紀嘅日本畫描繪畫家想像中嘅孫悟空；《西遊記》都可以算係有奇幻成份嘅作品[90]。 

類似體裁

編輯
睇埋：推想型故仔同異世界
 
呢幅油畫描繪《奧德修記》嘅一段經典場面：奧德修斯班手下將佢綁實，等奧德修斯可以聽海妖（女人頭雀身嗰啲怪獸）唱歌得嚟，又唔會受歌聲迷惑而跳海。
呢幅油畫描繪《奧德修記》[歐 97]嘅一段經典場面：奧德修斯班手下將佢綁實，等奧德修斯可以聽海妖（女人頭雀身嗰啲怪獸）唱歌得嚟，又唔會受歌聲迷惑而跳海。 

遊戲相關

編輯

睇埋

編輯

文獻

編輯
  • Apter, T. E. (1982). Fantasy literature: An approach to reality. Springer.
  • James, E., & Mendlesohn, F. (Eds.). (2012). The Cambridge companion to fantasy literature. Cambridge University Press.
  • Levy, M., & Mendlesohn, F. (2016). Children's Fantasy Literature. Cambridge University Press.
  • Manlove, C. N. (1983). The impulse of fantasy literature. Springer.
  • Manlove, C. (2016). The fantasy literature of England. Springer.
  • Stableford, B. M. (2005). Historical dictionary of fantasy literature. Scarecrow Press.

參考

編輯

註解：

  1. ↑ 不過亦有好多恐怖故仔係唔使用超自然元素，而係要主角面對一啲唔超自然、但一樣恐怖嘅事物，例如被困喺密室或者係連環殺人狂噉；呢類恐怖故仔就唔屬推想型故仔。
  2. ↑ 呢啲類別有好多都唔係互斥嘅，所以一個作品可以同時屬幾個類別。
  3. ↑ 而喺一般嘅當代奇幻或者歷史奇幻故仔裏面，至少有一部份嘅人類會當魔法係尋常嘢。
  4. ↑ 喺多數奇幻故仔入面，呢啲生物都俾故仔世界嘅人當係正常嘅嘢。
  5. ↑ 不過呢種形象同遠古阿拉伯傳說入面嘅有啲唔同。

文中用咗嘅詞彙嘅外語（預設係英文）版：

  1. ↑ 1.0 1.1 speculative fiction
  2. ↑ fairytales
  3. ↑ The Lord of the Rings，LotR
  4. ↑ The Chronicles of Narnia
  5. ↑ George R. R. Martin
  6. ↑ sci-fi
  7. ↑ horror
  8. ↑ myth
  9. ↑ hard sci-fi
  10. ↑ suspend disbelief
  11. ↑ canon，可以作粵拼：ken1 nan4
  12. ↑ high fantasy / classical fantasy
  13. ↑ A Song of Ice and Fire
  14. ↑ Westeros
  15. ↑ contemporary fantasy
  16. ↑ Harry Potter
  17. ↑ Percy Jackson & the Olympian
  18. ↑ urban fantasy
  19. ↑ historical fantasy
  20. ↑ 波斯文：هزار و یک شب
  21. ↑ Beauty and the Beast；法文：La Belle et la Bête
  22. ↑ heroic fantasy
  23. ↑ dark fantasy
  24. ↑ The Sandman
  25. ↑ The Dark Tower
  26. ↑ Coraline
  27. ↑ Elden Ring
  28. ↑ 日文：鬼滅の刃；日羅：Kimetsu no Yaiba
  29. ↑ hard fantasy
  30. ↑ weird fiction
  31. ↑ H. P. Lovecraft
  32. ↑ Aredia
  33. ↑ world building
  34. ↑ Umberto Eco
  35. ↑ suspension of disbelief
  36. ↑ Samuel Taylor Coleridge
  37. ↑ 原文：human interest and a semblance of truth
  38. ↑ magic system
  39. ↑ The Chosen One
  40. ↑ secret royalty
  41. ↑ wise old wizard
  42. ↑ Merlin
  43. ↑ magic wand
  44. ↑ The Lion, the Witch and the Wardrobe
  45. ↑ muggle
  46. ↑ Dark Lord / Evil Overlord
  47. ↑ demigod，可以作粵拼：dem1 mi1 got1
  48. ↑ Heracles
  49. ↑ western dragon
  50. ↑ How to Train Your Dragon
  51. ↑ phoenix
  52. ↑ Leviathan，可以作粵拼：let6 waai1 aa4 fan4
  53. ↑ Pirates of the Caribbean
  54. ↑ Doppelgänger，可以作粵拼：dop1 pou4 geng1 ngaa4
  55. ↑ elemental
  56. ↑ manticore
  57. ↑ race
  58. ↑ dwarf；眾數：dwarves
  59. ↑ elf；眾數：elves
  60. ↑ goblin
  61. ↑ fairy
  62. ↑ Peter Pan
  63. ↑ merfolk / merpeople
  64. ↑ mermaid
  65. ↑ The Little Mermaid
  66. ↑ orc
  67. ↑ troll
  68. ↑ succubus
  69. ↑ incubus
  70. ↑ undead
  71. ↑ zombie
  72. ↑ Resident Evil
  73. ↑ vampire
  74. ↑ Dracula
  75. ↑ necromancer
  76. ↑ lich
  77. ↑ ghoul
  78. ↑ D&D
  79. ↑ medieval age
  80. ↑ medieval stasis
  81. ↑ magic school
  82. ↑ Windsor Castle
  83. ↑ artifact of doom
  84. ↑ MacGuffin
  85. ↑ The Quest
  86. ↑ Arthur C. Clarke
  87. ↑ science fantasy
  88. ↑ The Matrix
  89. ↑ Terminator
  90. ↑ Gaia
  91. ↑ Cloud
  92. ↑ Akkadian Empire
  93. ↑ Aristophanes；古希臘文：Ἀριστοφάνης
  94. ↑ George MacDonald
  95. ↑ C. S. Lewis
  96. ↑ J. K. Rowling
  97. ↑ Ὀδύσσεια / Odýsseia

相關嘅電視橋段網頁：

  1. ↑ Fantasy. TV Tropes.
  2. ↑ Mythology. TV Tropes.
  3. ↑ Our Werewolves Are Different. TV Tropes.
  4. ↑ World Building. TV Tropes.
  5. ↑ Willing Suspension of Disbelief. TV Tropes.
  6. ↑ The Chosen One. TV Tropes.
  7. ↑ Lost Orphaned Royalty. TV Tropes.
  8. ↑ Cool Sword. TV Tropes.
  9. ↑ Muggles. TV Tropes.
  10. ↑ 10.0 10.1 Kraken And Leviathan. TV Tropes.
  11. ↑ Five Races. TV Tropes.
  12. ↑ Our Elves Are Better. TV Tropes.
  13. ↑ Our Fairies Are Different. TV Tropes.
  14. ↑ Our Mermaids Are Different. TV Tropes.
  15. ↑ The Undead. TV Tropes.
  16. ↑ Necromancer. TV Tropes.
  17. ↑ Our Liches Are Different. TV Tropes.
  18. ↑ Medieval European Fantasy. TV Tropes.
  19. ↑ Medieval Stasis. TV Tropes.
  20. ↑ Artifact of Doom. TV Tropes.
  21. ↑ Science Fantasy. TV Tropes.

文中引述咗嘅學術文獻或者係網站：

  1. ↑ 1.0 1.1 Fantasy - Narrative genre. Encyclopedia Britannica.
  2. ↑ Martin Horstkotte, The postmodern fantastic in contemporary British fiction. WVT, Trier, 2004.
  3. ↑ Pierce, J. B. (2004). What's Harry Potter Doing in the Library? Depictions of Young Adult Information Seeking Behaviour in Contemporary Fantasy Fiction. In International Association of School Librarianship. Selected Papers from the... Annual Conference (p. 73). International Association of School Librarianship.
  4. ↑ Manlove, C. (2016). The fantasy literature of England. Springer.
  5. ↑ Richard Matthews (2002). Fantasy: The Liberation of Imagination. Routledge.
  6. ↑ Roine, H. R. (2016). Imaginative, Immersive and Interactive Engagements. The rhetoric of worldbuilding in contemporary speculative fiction.
  7. ↑ Fantasy and Imagination.
  8. ↑ 原版英文："Fantasy, also spelled phantasy, imaginative fiction dependent for effect on strangeness of setting (such as other worlds or times) and of characters (such as supernatural or unnatural beings). ... Science fiction can be seen as a form of fantasy, but the terms are not interchangeable, as science fiction usually is set in the future and is based on some aspect of science or technology, while fantasy is set in an imaginary world and features the magic of mythical beings."
  9. ↑ 9.0 9.1 Fantasy. Literary Terms.
  10. ↑ ON FANTASY 互聯網檔案館嘅歸檔，歸檔日期2019年11月12號，.. www.georgerrmartin.com，原版英文："Fantasy is silver and scarlet, indigo and azure, obsidian veined with gold and lapis lazuli. Reality is plywood and plastic, done up in mud brown and olive drab. Fantasy tastes of habaneros and honey, cinnamon and cloves, rare red meat and wines as sweet as summer. Reality is beans and tofu, and ashes at the end."
  11. ↑ Ed. Edward James and Farah Mendlesohn, Cambridge Companion to Fantasy Literature, ISBN 0-521-72873-8
  12. ↑ Charlie Jane Anders. "The Key Difference Between Urban Fantasy and Horror 互聯網檔案館嘅歸檔，歸檔日期2020年6月8號，.". io9.
  13. ↑ Parrish, J. J. (2007). Inventing a universe: Reading and writing internet fan fiction (Doctoral dissertation, University of Pittsburgh).
  14. ↑ Bascom, William Russell (1965). The Forms of Folklore: Prose Narratives. University of California.
  15. ↑ Eliade, Mircea (1960). Myths, dreams, and mysteries: the encounter between contemporary faiths and archaic realities. Translated by Mairet, Philip. Harvill Press.
  16. ↑ David Leeming (2005). "Preface". The Oxford Companion to World Mythology. Oxford University Press. p. vii.
  17. ↑ Brian Stableford, The A to Z of Fantasy Literature, (p. 198), Scarecrow Press, Plymouth. 2005.
  18. ↑ Flood, Alison (April 13, 2011). "George RR Martin: Barbarians at the gate". The Guardian.
  19. ↑ Lance Olsen, Ellipse of uncertainty : an introduction to postmodern fantasy. Greenwood Press, Westport 1987.
  20. ↑ Datlow, Ellen (2011). Naked City: Tales of Urban Fantasy. New York: St. Martin's Press. pp. xii–xiii.
  21. ↑ Shanoes, Veronica (26 January 2012). "20: Historical Fantasy". In Edward James; Farah Mendlesohn (eds.). The Cambridge Companion to Fantasy Literature. Cambridge University Press. p. 236.
  22. ↑ French Science Fiction, Fantasy, Horror and Pulp Fiction, by Jean-Marc Lofficier & Randy Lofficier.
  23. ↑ L. Sprague de Camp, Introduction of Swords and Sorcery, 1963, p. 7.
  24. ↑ John Grant and John Clute, The Encyclopedia of Fantasy, "Heroic fantasy", p. 464.
  25. ↑ Stableford, Brian, "Dark Fantasy", in The A to Z of Fantasy Literature,(p. 97) , Scarecrow Press, Plymouth. 2005.
  26. ↑ Buxton, Marc (January 26, 2014). "By Crom! The 10 Greatest Fantasy Comics of All-Time". Comic Book Resources.
  27. ↑ 'The Dark Tower': Pulp Metafiction.
  28. ↑ Kimetsu no Yaiba Manga's Total Print Run Reaches Ten Million Copies. Crunchyroll.
  29. ↑ When will the dark fantasy anime Demon Slayer: Kimetsu No Yaiba release?. News Magazine.
  30. ↑ Lindskold, Jane (January 6, 2009). "Hard Fantasy". tor.com.
  31. ↑ China Miéville, "Weird Fiction", in: Bould, Mark et al. The Routledge Companion to Science Fiction. New York: Routledge, 2009, p. 510–516.
  32. ↑ Jeffrey Andrew Weinstock, "The New Weird", in Ken Gelder, New Directions in Popular Fiction: genre, reproduction, distribution. Basingstoke: Palgrave Macmillan, 2016, pp. 177–200.
  33. ↑ 33.0 33.1 WIZARDS: OLD GREY BEARDS.
  34. ↑ Mark J.P. Wolf (2014). Building Imaginary Worlds: The Theory and History of Subcreation. Routledge.
  35. ↑ Eco, U. (1980). The Name of the Rose. postscript，英文翻譯："It is necessary to create constraints, in order to invent freely. In poetry the constraint can be imposed by meter, foot, rhyme, by what has been called the "verse according to the ear."... In fiction, the surrounding world provides the constraint. This has nothing to do with realism... A completely unreal world can be constructed, in which asses fly and princesses are restored to life by a kiss; but that world, purely possible and unrealistic, must exist according to structures defined at the outset (we have to know whether it is a world where a princess can be restored to life only by the kiss of a prince, or also by that of a witch, and whether the princess's kiss transforms only frogs into princes or also, for example, armadillos)."
  36. ↑ Fantasy World Building: How to World Build for Your Fantasy Novel.
  37. ↑ Verisimilitude. Literary Devices.
  38. ↑ Schaper, E. (1978). Fiction and the Suspension of Disbelief. British Journal of Aesthetics, 18(1), 31-44.
  39. ↑ How to Create a Magic System in Six Simple Steps.
  40. ↑ Highfield, Roger (2002). The Science of Harry Potter: How magic really works. New York: Viking.
  41. ↑ Clute, John (1999). The Encyclopedia of Fantasy (1st St. Martin's Griffin ed.). New York: St. Martin's Griffin.
  42. ↑ 14 Popular Fantasy Tropes — And How to Make Them Feel New Again.
  43. ↑ Bending of a Trope: How 3 Iconic Franchises Made the 'Chosen One' Cliche Work.
  44. ↑ David Colbert, The Magical Worlds of Harry Potter, p 195.
  45. ↑ Downing, David C. (2005). Into the Wardrobe: C. S. Lewis and the Narnia Chronicles. San Francisco: Jossey-Bass.
  46. ↑ "Dark Lord" in The Encyclopedia of Fantasy (eds. John Clute & John Grant: First St. Martin's Griffin ed.: 1999), p. 250.
  47. ↑ Brockliss, William. 2017. "The Hesiodic Shield of Heracles: The Text as Nightmarish Vision." Illinois Classical Studies 42.1: 1-19.
  48. ↑ Niles, Doug (2013), Dragons: The Myths, Legends, and Lore, Avon, Massachusetts: Adams Media.
  49. ↑ Wilhite, C. J., Wilhite, C., & Williams, W. L. (2010). Dragon training and changing culture: A review of DreamWorks' How To Train Your Dragon. The Behavior Analyst, 33(2), 239-242.
  50. ↑ Van der Broek, R (1972), The Myth of the Phoenix, Seeger, I trans, EJ Brill.
  51. ↑ Cirlot, Juan Eduardo (1971). A Dictionary of Symbols (2nd ed.). Dorset Press. p. 186.
  52. ↑ Howard, R. (2019). Faeries, Aliens, and Leviathans: Science and Fantasy in Ian McDonald's King of Morning, Queen of Day. Irish University Review, 49(2), 290-303.
  53. ↑ Torjussen, S. S. (2016). "Release the Kraken!"–The recontextualization of the Kraken in popular culture, from Clash of the Titans to Magic: The Gathering.
  54. ↑ GLOSSARY OF THE GOTHIC: DOPPELGÄNGER.
  55. ↑ Kramer, A. (2017). Cultural History of the Four Elements. Ecological Thought in German Literature and Culture, 3-16.
  56. ↑ Carole B. Silver, Strange and Secret Peoples: Fairies and Victorian Consciousness, p. 38.
  57. ↑ Manticore. Encyclopedia Britannica.
  58. ↑ Wood, Juliette (2018). Fantastic Creatures in Mythology and Folklore: From Medieval Times to the Present Day. Bloomsbury Publishing. p. 44.
  59. ↑ 59.0 59.1 The 12 most intriguing MMO races.
  60. ↑ Hafstein, Valdimir Tr. (2002). "Dwarfs" as collected in Lindahl, Carl. McNamara, John. Lindow, John. (2002).
  61. ↑ Tolkien, J. R. R. (1996), Christopher Tolkien, ed., The Peoples of Middle-earth, Boston: Houghton Mifflin.
  62. ↑ Ármann Jakobsson (2015). "Beware of the Elf! A Note on the Evolving Meaning of Álfar". Folklore. 126 (2): 215–223.
  63. ↑ Froud, Brian (1996). The Goblin Companion. Atlanta: Turner.
  64. ↑ Waugh, Arthur (1960). "The Folklore of the Merfolk". Folklore. 71 (2): 73–84.
  65. ↑ Straubhaar, Sandra Ballif (2004). Chance, Jane (ed.). Myth, Late Roman History, and Multiculturalism in Tolkien's Middle-Earth. Tolkien and the invention of myth : a reader. University Press of Kentucky. pp. 101-117.
  66. ↑ Orel, Vladimir (2003). A Handbook of Germanic Etymology. Brill. p. 410-411.
  67. ↑ Grover, S.; Mehra, A.; Dua, D. (January–June 2018). "Unusual cases of succubus: A cultural phenomenon manifesting as part of psychopathology". Ind Psychiatry J. 27 (1): 147-150.
  68. ↑ Stephens, Walter (2002), Demon Lovers, p. 23, The University of Chicago Press
  69. ↑ Melton, J. G. (2010). The vampire book: The encyclopedia of the undead. Visible Ink Press.
  70. ↑ Botting, F. (2011). Zombie death drive: Between gothic and science fiction. Wasson and Alder, 36-54.
  71. ↑ Clive Leatherdale (1985). Dracula: the Novel and the Legend. Desert Island Books.
  72. ↑ Stoker, Bram (1975) [1897]. Leonard Wolf (ed.). The Annotated Dracula. Crown. p. 193.
  73. ↑ Gygax, Gary (1976). Grewhawk. TSR Rules. p. 35. LICHES: These skeletal monsters are of magical origin, each Lich formerly being a very powerful Magic-User or Magic-User/Cleric in life, and are now alive only by means of great spells and will because of being in some way disturbed.
  74. ↑ Ammann, Keith (2019). The Monsters Know What They're Doing. Saga Press. pp. 272-275.
  75. ↑ Six Pros and Cons of the Magic School Genre.
  76. ↑ Wonderbook: Book of Potions.
  77. ↑ Booker, C. (2004). The seven basic plots: Why we tell stories. A&C Black.
  78. ↑ Clarke, Arthur C. (2000). Patrick Nielsen Hayden (ed.). The Collected Stories of Arthur C. Clarke. New York: Orb Books. p. ix，英文原文："Science fiction is something that could happen—but you usually wouldn't want it to. Fantasy is something that couldn't happen—though you often only wish that it could."
  79. ↑ Slusser, George Edgar, and Eric S. Rabkin, eds. Intersections: fantasy and science fiction. SIU Press, 1987.
  80. ↑ Moorcock, Michael (13 June 2002). "Queen of the Martian Mysteries: An Appreciation of Leigh Brackett". Fantastic Metropolis.
  81. ↑ In Our Sci-Fi Dystopia Of 2020, 'Final Fantasy VII' Feels More Timely Than Ever. Forbes.
  82. ↑ Grant, John; Clute, John (1997). "Gilgamesh". The Encyclopedia of Fantasy. London, England: Palgrave Macmillan. p. 410.
  83. ↑ Hansen, William F. (1998). Anthology of Ancient Greek Popular Literature. Bloomington, Indiana: Indiana University Press. p. 260.
  84. ↑ Mathews, Richard (2002) [1997]. Fantasy: The Liberation of Imagination. New York City, New York and London, England: Routledge. pp. 11–14.
  85. ↑ John Grant and John Clute, The Encyclopedia of Fantasy, "Chinoiserie", p 189.
  86. ↑ Tatar, Maria. The Annotated Classic Fairy Tales. W.W. Norton & Company, 2002.
  87. ↑ Lewis, C.S.. Surprised by Joy. The Inspirational Writings of C.S. Lewis. New York: Inspirational Press, 1994. 100.
  88. ↑ L. Sprague de Camp, Literary Swordsmen and Sorcerers: The Makers of Heroic Fantasy, p. 135.
  89. ↑ Science Fiction And Fantasy Book Sales Have Doubled Since 2010. Forbes.
  90. ↑ Wu Ch'eng-en; Arthur Waley (1984) [1942]. Monkey. Translated by Arthur Waley. New York: Grove Press.
  91. ↑ 胡勝. 明清神魔小說研究. 中國古代文學研究叢書. 中國社會科學出版社. 2004.
  92. ↑ W. J. F. Jenner, "Tough Guys, Mateship and Honour: Another Chinese Tradition," East Asian History, 12(1996): 1-34.

拎

編輯
 
維基同享有多媒體嘅嘢：
奇幻
由「https://zh-yue.wikipedia.org/w/index.php?title=奇幻&oldid=2208395」收