九龍公共圖書館（英文：Kowloon Public Library）係一間喺香港九龍城區何文田嘅公共圖書館，喺培正道同窩打老道交界（培正中學對面），樓高12層，主要係圖書館，康樂及文化事務署管理。
九龍公共圖書館係香港第一座專用圖書館大樓，第一期喺1984年11月16號啟用，取代1965年啟用嘅窩打老道公共圖書館，而第二期就喺1985年9月9號啟用，由當時港督尤德爵士夫人主持開幕典禮。剛落成嘅時候叫做九龍中央圖書館，為咗配合香港中央圖書館於2001年啟用，2000年改名做九龍公共圖書館。
