新世界第一巴士
新世界第一巴士服務有限公司（New World First Bus Services Limited，簡稱：新世界第一巴士、新世界巴士、新巴同埋NWFB）係香港五間專營巴士公司之一，喺1998年9月1號接辦中華巴士嘅88條線之後正式開始運作。主要營運港島區嘅巴士線，亦有營運少量九龍區同新界區嘅巴士線。新巴嘅專營權由2023年7月1號起，合併入全新嘅城巴市區同新界巴士網絡專營權。
歷史
編輯1998年初，新世界第一巴士服務有限公司正式成立。由新世界發展有限公司以及英國最大嘅陸上運輸機構第一集團合資，新世界發展（其後因集團架構重組而注入佢嘅服務業分支新創建集團有限公司）持有74%股權，而第一集團就持有其餘26%股權。當時經營港島區巴士服務嘅中華汽車有限公司（中巴）不獲延續專營權，政府就將佢其中88條路線攞出去公開競投，最後由冇任何交通營運經驗嘅新巴贏得專營權。據當時政府指出，新巴之所以能夠取得專營權，原因係新巴喺香港冇經營任何公共交通服務，符合政府引入新經營者嘅意向，同時新巴重提出一個最重要承諾：接收全部前中巴員工，解決前中巴員工嘅去留問題同埋買中巴原有車隊。呢次競投之後，中巴退出專利巴士市場，全面進軍地產業。
新巴接管88條巴士線後，只用一年幾時間就走上軌道，包括買新巴士、改善管理制度員工福利、加強巴士線班次等等。喺買新巴士方面，新巴專門買低地台巴士，包括「丹尼士三叉戟」雙層冷氣巴同埋「丹尼士飛鏢」單層冷氣巴。最初呢啲新巴士一時間趕唔切付運，新巴只係暫時買中巴嘅舊巴士服務，但呢啲舊巴士之中得冷氣巴有得留低，並相繼得到翻新。至於冇冷氣嘅巴士就喺其後4年內，全部被淘汰，淨係得一架丹尼士禿鷹（車隊編號：DM6）改為開篷巴，用嚟行山頂纜車接駁路線15C，直到2008年1月底。新巴自1999年3月起安裝八達通收費器，並喺2001年2月搞掂晒。2000年年尾，第一集團將手上嘅26%新巴股權賣畀新世界發展，但公司全名嘅「第一」字眼未有改走繼續沿用。2001年新巴推出八達通轉乘計劃，透過喺唔同路線上實施，令新巴可以借呢個計劃，取消一啲客量唔理想嘅路線，重組巴士網絡節省資源。
新巴嘅服務範圍最初只係喺香港島，直到1999年7月，政府將天水圍北同埋將軍澳南巴士線作公開競投。新巴成功投得將軍澳南嘅一組共7條路線。2001年新巴再投得西九龍新區巴士線專營權，成功將服務範圍擴展至九龍及新界。
喺營運初期新巴不斷強調形象，成日喺巴士上貼自我宣傳廣告以顯示佢嘅進取精神。不過由於之前新巴未有任何本地交通營運經驗，所以經營能力經常受到質疑。根據香港交通投訴組嘅2003年報（PDF），新巴嘅投訴率係三大專營巴士公司之冠。
2020年10月，城巴同新巴業務由新創建集團賣咗畀由Templewater Bravo Holdings Limited、Ascendal Group Limited同埋漢思能源組成嘅財團[1]，成為匯達交通嘅一部分[2]，而新巴公司全名嘅「新世界」字眼未有改走繼續沿用。
2022年7月12號行政長官會同行政會議宣布，新巴嘅專營權會喺2023年7月1號併入城巴嘅港島及過海巴士專營權[3]，同日匯達交通開記者會確認2023年7月1號起只會用城巴單一品牌營運，標誌新巴25年歷史結束。
攷
編輯- ↑ 〈新創建32億元出售新巴及城巴業務〉。《香港電台》。2020-08-21。喺2020-10-18搵到。
- ↑ 〈城巴新巴母企敲定中文名「匯達交通」 員工可票選新logo〉。《蘋果日報 (香港)》。2020-10-28。原著喺2020-11-07歸檔。喺2020-11-01搵到。
- ↑ 〈新巴併入城巴 新車費上限取較高者 運輸局稱車費維持不變 政黨憂借重組致市民捱貴線〉。2022-07-13。喺2022-07-14搵到。
出面網頁
編輯
 |
