九龍東

九龍東（英文：Kowloon East）係指香港九龍東部嘅地區，一般嚟講範圍包括黃大仙區及觀塘區。傳統上九龍嘅東、西係用「火車路」（即九廣鐵路英段，家下東鐵綫）為界，所以九龍城區（即紅磡、土瓜灣、九龍塘等地）喺好多人心目中其實都係屬於九龍東；早期香港地鐵打算起穿過嗰區嘅鐵路就叫做東九龍綫。有啲政府部門將九龍城區都當係九龍東，但亦有唔少政府部門（好似香港警務處嘅警區）將九龍城區當係九龍西。九龍東唔係一個有嚴格定義嘅地區名稱（有嚴格定義嘅只係九龍，唔係九龍東）；好多政府機構都用九龍東嚟劃分地區，但定義未必一樣。