交通安全城

交通安全城（英文：Road Safety Towns）係香港一種提供模擬道路環境嘅主題公園，教導細路對道路嘅安全意識，係香港小學同幼稚園學生嘅熱門參觀地點。交通安全城由康樂及文化事務署擁有同管理，而有關道路安全嘅教育就由道路安全組嘅警務人員負責講解。

歷史

1970年，為咗畀學童提供一個真實嘅環境去學習正確使用道路嘅方法，香港交通安全會連同香港警務處同市政局喺觀塘秀茂坪共同籌建全香港第一個交通安全城，由於公園深受歡迎，之後再喺北角、沙田、屯門地區興建交通安全城，令到總數增加至四個^[1]。