詞句配列

詞句配列ci4 geoi3 pui3 lit6（morphosyntactic alignment）係語言類型學上一個重要概念，靠文法格將語言分類。

基礎

内文：文法格

首先，以下嘅部份會用到 3 個符號：S、A 同 P，當中

• S（Sole argument，英文唯一論元噉解；簡寫 S ）表示一隻不及物動詞嘅唯一論元，例：明仔打乞嗤，打乞嗤係不及物嘅動詞，而明仔係隻動詞嘅 S；
• A（Agent；做出舉動嗰方）同 P（Patient；承受舉動嗰方）分別表示一隻及物動詞嘅兩隻論元，例：米高識講廣東話，識講係及物動詞短語，米高係 A 而廣東話係 P。

語言就首先可以分 5 大類。呢套分法就係所謂嘅詞句配列：

S 同 A 用同一方法處理，P 當做另一類嘢。→ 對格型（nominative-accusative），S = A ≠ P

S 同 P 用同一方法處理，A 當做另一類嘢。→ 能格型（ergative-absolutive），S = P ≠ A

A 同 P 用同一方法處理，S 當做另一類嘢。→ 二種斜格型（double oblique），A = P ≠ S

S A P 都用唔同方法處理。→ 三立型（tripartite），S ≠ A ≠ P

S A P 都用同樣方法處理。→ 中立型（neutral），S = A = P

分佈

睇埋：語言類型學

實證嘅研究表明，二重斜格型、三立型同中立型極之少有。喺廿一世紀初，淨係得某啲極少人講（母語使用者數量得嗰幾千至萬零）、多數人聽都未聽過嘅語言被指有呢啲類型嘅傾向，例子可以睇吓伊朗乳山話（根據 1990 年嘅估計，得大約 18,000 位母語使用者）被指有二重斜格型嘅傾向。

有觀點主張，對格型同能格型之所以咁常見，係因為格嘅使用重點在於

「

要幫聽或者睇語言嘅人分辨 A 同 P 邊個打邊個

」

而 5 大基本配列當中，得對格型同能格型算係有效率噉做到呢一點－

• 如果一隻語言用二重斜格型或者中立型，聽或者讀嘅人就成日都焗住要靠自己嘅常識判斷「邊隻字係 A 邊隻字係 P」，
• 三立型缺乏效率，因為定義上 S 唔會同 A 或者 P 喺同一隻動詞度出現，所以一隻語言冇必要好似三立型噉分開嗮 3 嚿嘢嘅嘜法。

睇埋

• 語序