母語

母語（粵拼：mou5 jyu5），又叫第一語言（語言學上簡寫 L1，取自英文 Language 1），係指一個人喺 BB 仔嗰陣，由屋企人或者照顧者嗰度學識講嘅嗰種或者嗰幾種語言，呢種學習過程係唔使有意識噉諗嘅。母語相對於第二語言。

母語習得：呢幅相影到一個 BB 喺度聽佢阿媽講嘢；細路喺生命頭嗰幾年一路聽住身邊嘅大人講嘢，聽吓聽吓就會學識佢哋嘅母語。

喺概念上，母語同祖先語言好接近，祖先語言大致上可以理解做「祖輩所講嘅母語」，通常但唔一定會係一個人嘅母語。

嗌法

睇埋：語言同自然語言

母語喺各語言入邊嘅名如下：

• 粵語：母語（粵拼：mou5 jyu5），可以理解做「阿媽嘅語言」或者「由阿媽嗰度學到嘅語言」噉嘅意思。
• 英文：mother tongue / first language
• 德文：Muttersprache
• 葡文：língua materna
• 西班牙文：lengua materna

而祖先語言（下邊有詳細啲講）就係

• 粵語：祖先語言（粵拼：zou2 sin1 jyu5 jin4）
• 英文：ancestral language

概念釐清

睇埋：第二語言

界定母語

内文：語言習得

要講講母語（語言學簡稱：L1）呢個概念嘅定義：

母語係一個人「人生第一隻用嘅語言」：齋靠日常觀察經已可知，喺一個蘇蝦仔生命嘅頭嗰幾年，佢一路都會聽住身邊啲大人（屋企人或者照顧者）講嘢，甚至觀察啲大人傾偈；互動到咁上下，個細路就會慢慢牙牙學語學識講嘢；佢响呢個時候學識講嗰隻語言，就係佢嘅 L1 。

首先要留意嘅係，寫嘢同講嘢係兩種好唔同嘅過程。一個人可以講嘢完全冇問題，但唔識讀寫（文盲）或者讀寫有困難（讀寫障礙）；而唔識講嘢嘅聾啞人士可以寫嘢寫得好流暢。上述呢個對母語嘅定義，著重嘅係講嘢。

响依個定義之下，就算一個細路好早就學某隻語言，都唔表示隻語言係佢嘅 L1：想像依家有一個粵藉華人細路，佢喺加拿大卑詩省長大，佢屋企係講粵語嘅，佢同父母以及第啲長輩講嘢一路都係以粵語為主嘅；同時個細路好細個就接觸英文，兩三歲返幼稚園嗰陣已經有上英文堂，最後佢大個咗能夠純熟噉講同寫英文。响呢個情況下，英文雖然佢好早就學，但係佢學英文嘅途徑唔係「喺生命早期，透過聽屋企人講嘢以及同屋企人互動」噉嚟學，所以英文依然唔算係佢嘅母語。

祖先語言

睇埋：遺產語言

而祖先語言就係一個同母語好相似嘅概念。一個人嘅祖先語言大致係指「佢祖先嘅母語」，通常但唔一定會係佢嘅母語。舉個具體例子說明，想像有個 BB 仔，暫且叫佢做「明仔」，明仔對上五代祖先都係以粵語做母語嘅粵藉華人；明仔屋企喺阿爺阿嫲嗰代就移咗民過加拿大卑詩省；明仔嘅家人唔重視粵語，覺得粵語學嚟嘥時間，其後明仔嘅父母為咗「想佢學英文學得好啲」，就選擇咗淨係用英文同明仔交流，又唔肯喺明仔面前講粵語；明仔自細好少可接觸粵語，等到佢大個咗，佢就淨係識英文，完全唔識粵語。對於明仔嚟講，英文可以算係佢嘅 L1 —佢「喺生命早期由屋企人嗰度學」嘅語言的而且確係英文，不過佢嘅祖先語言依然係粵語。

值得一提嘅係，事實上有唔少父母都嫌自己嘅母語「學嚟都冇用」，唔肯用母語同仔女講嘢，搞到啲仔女大個咗就唔識得同阿爺阿嫲傾偈。呢種現象喺廿一世紀初廣受關注。詳情可以睇睇語言威望、雙層語言、語言重振同語言滅亡等嘅概念。

學習過程

睇埋：第二語言習得同內隱知識

有唔少語言學專家都著力研究學第二語言（SLA）同學母語（FLA）之間有乜嘢分別。

首先，FLA 通常主要係由屋企人（或者照顧者）做嘅—細路學 L1，通常唔使人特登教，照顧佢嘅人成日喺佢身邊用 L1 講嘢，個細路聽聽吓就會學識用 L1 講嘢；相比之下，學第二語言就傾向會係形式化噉做嘅，會由老師等嘅人員教細路用呢啲語言。因為噉，一個人學 L1 嘅過程好大程度上係由內隱知識主導嘅。

SLA 同 FLA 會有以下呢啲分別：

• 學 L1 正常嚟講唔會跟咩教學大綱；
• 有人用廿一世紀初嘅英文做 FLA 研究，觀察家長點樣同學緊講嘢嘅細路講嘢，發現家長成日都唔改正細路嘅文法，淨係改正啲唔真確嘅內容－即係話家長同細路講嘢嗰時，重視嘅係信息唔係形式。用粵語諗嘅話，想像有個阿嫲同個學緊講嘢嘅孫仔講嘢－

  孫仔：嗰嚿係士多啤梨。（一句完全文法正確嘅句子）

  阿嫲：唔係呀，嗰嚿係蘋果。（改正唔真確嘅內容）

  孫仔：嗰係蘋果。（一句錯文法嘅句子）

  阿嫲：啱喇，嗰嚿係蘋果。（唔改正個細路嘅文法）

呀噉。

相關嘅文

• 國際母語日
• 母語教學
• 語言威望
• 雙層語言
• 以人口排列嘅語言一覽