元洲仔
元洲仔（Yuen Chau Tsai），原字為圓洲仔，係香港大埔市區東南一笪地方，響大埔海西岸。元洲仔原本係大埔河口附近一個島，因島形稍圓，而比較細，而叫圓洲仔，而舊時因為方便，亦減筆寫做元洲仔。後尾因為大埔新市鎮發展，填海後同新界大陸連成一體。島上有舊時有理民府阿頭理民官嘅官邸，英文叫Island House，即島屋咁解，所以英文又叫呢帶做Island House。元洲仔嘅官邸，今日係世界自然基金會香港分會嘅自然環境保護研究中心。島南有大王爺廟，係大埔漁民所供奉。元洲仔行政上歸大埔區。
地理
編輯元洲仔響大埔市區運頭角同東南，黃宜坳以北。南面有大埔公路元洲仔段同吐露港公路，係大埔新市鎮嘅南大門。
元洲仔原本畀大埔海包圍，大埔填海之後，佢西岸同南岸同新界大陸相連。佢地勢唔高，最高只有海拔十幾米。山頂有世界自然基金會香港分會嘅自然環境保護研究中心。南便有大王爺廟，東南便海上有直升機場同碼頭。西便有元洲仔煤氣檢管站。
史
編輯
元洲仔，史前已有人住響呢帶。元洲仔考古遺址[1]係新石器時代晚期到青銅器時代，距今約莫三千年前[2]。個遺址早響1960年代，就有John Walden去調查，並作紀錄。佢響元洲仔岸邊同南面斜坡，搵到石錛同幾何印紋陶片。1980年代同1990年代，都發現過史前遺物[3]。考古報告指，文化層響探方深125厘米左右[4]。
1898年，英國由大清手上租到新界，當時管治新界嘅理民府就設響近大埔大和市嘅運頭角山上。為咗方便統治，1902年，香港政府起咗大埔道，即家下大埔公路，由九龍通去上水。當中黃宜坳入大埔太和市一段，就經過元洲仔。為咗起條路，響運頭角同元洲仔之間起咗條堤，另有橋由堤近元洲仔一邊，搭去黃宜坳。到咗1905年，元洲仔起好理民官嘅官邸[5]。
1980年代，大埔新市鎮發展到東南，大埔河到元洲仔之間，大幅填海。之間嘅填地，就係廣福邨同宏福苑兩個屋邨。而屋邨到過完善路嘅填地海岸，新林村河口到元洲仔嘅大埔海岸，就變成元洲仔公園。
清末，由大埔漁民建大王爺廟，間廟曾經響1988年重建。