公園仔 (大埔)

公園仔係大埔一地，亦係公園，喺太和市東面，由大和市擴展出來。家係下大埔墟一帶，最繁盛地方。東面係運頭角，西面係太和市，北面係六鄉樓，南面係泮涌。

大埔公園仔地圖

公園仔正中央，真係有個公園，官名大明里廣場，人稱公園仔。而公園周圍嘅樓，歸入公園仔。因爲公園匯合四里，所以又叫四里公園。

地

公園仔笪地，約莫方形，有四條街圍住，卽係北面廣福道，南面鄉事會街，東面運頭街，西面寶鄉街。正中央有大明里廣場，四方形。方邊伸出四里，北向叫廣福里，通廣福道。南向大光里，出鄉事會街。東向大明里，去運頭街。西向大榮里，通寶鄉街。四里只行人，唔通車。

四里間開公園仔一地，分四份，中間各有一坊。東北有廣福坊。東南有運頭坊。西南有鄉事會坊。西北有寶鄉坊。坊名代表通出邊條街，唯獨廣福坊開口喺運頭街。

呢帶多係唐樓，無電梯。地面街舖林立，有唔少食肆。所以好旺。

大光里可謂街市，買餸爲主。大榮里曾有戲院，叫寶華戲院。

四坊都有泊車位，而寶鄉坊有紅色小巴，去上水。

公園

未翻新嘅大明里廣場

大明里廣場，英字Tai Ming Lane Square，就係公園仔，就係街坊聚集之處。公園仔樹木高矗，鴿鳥流連，燕雀徘徊。

二零零六年，康樂及文化事務署同規劃署，翻新公園同四里，香港房屋協會以唐坊•明里為主題，四里口起牌樓，廣場四角鋪設特色地磚，大明里廣場加特色街燈、舞台布景板、公園照壁、垃圾筒、長櫈同遊客資訊亭

間中有公開活動，在此舉辦。

史

公園仔一帶，遠古係海來嘅，涌水積沙成灘，後成地。後尾開墾成田。運頭角同大和市間，一直係田。到咗二十世紀六十年代，呢帶開始起樓，劃成家下咁樣。

舊時公園仔有好多小販，家下少見。

里

大光里成條街市咁，日頭人頭擁擁，肩摩踵接

• 廣福里，英字Kwong Fuk Lane。
• 大光里，英字Tai Kwong Lane。
• 大明里，英字Tai Ming Lane。
• 大榮里，英字Tai Wing Lane。

坊

• 廣福坊，英字Kwong Fuk Square。
• 運頭坊，英字Wan Tau Square。
• 鄉事會坊，英字Heung Sze Wui Square。
• 寶鄉坊，英字Po Heung Square。

睇埋

• 三角地 (大埔)