六鄉

六鄉（Luk Heung），又寫陸鄉，又叫六鄉新村（Luk Heung San Tsuen），亦叫六鄉樓，係香港一地，喺新界大埔，歸大埔墟。六鄉係六條村合稱，即小滘、大滘、金竹排、橫嶺頭（包括橫嶺背）、涌尾及涌背。六鄉響大埔市區，近林村河，響廣福道北便隔籬。六村原本係船灣六鄉，喺船灣海東北岸，1960年代因起船灣淡水湖，而由香港政府安排，搬近大埔市。六鄉樓係起成一棟棟大廈咁，格式一致，有別於一般村屋。

六鄉各村都歸入大埔鄉事委員會之下，各村各有代表選入會。

六鄉側邊寶湖道，英名Plover Cove Road，就係紀念村民搬自船灣海（英名Plover Cove），寶取自英Po音，改得有意頭。而新村內有，陸鄉里係指名該處係六鄉。

六鄉南邊廣福道，過馬路係公園仔。北過寶湖道係寶湖花園同寶湖道街市。六鄉西南西係太和市。

地理

六鄉屋宇分佈圖

新村位置，舊日係岸，今日因填海變內陸，唯近普益新街一帶近河邊。

六鄉範圍，畀寶鄉街分成兩截。

寶鄉街以東，六鄉佔有廣福道同寶湖道之間，東至東昌街。內有三坊一里。三坊係三笪四方地，分別係同發坊、同秀坊同同茂坊。三坊並排，由樓隔開，闢做停車場。而陸鄉里同廣福道、寶湖道平排，貫通三坊。全部劃一高樓。

寶鄉街以西，六鄉，除咗政府地方，佔有普益街同林村河之間，西至普益里。普益街企有六鄉樓三棟。而三棟樓後便，近寶鄉街一邊，係六鄉新村公立學校，而其餘至到林村河，開有普益新街，有比較矮嘅村屋三排。

史

六鄉各村原本響船灣海東北岸。六鄉未搬之時，主要從捕魚，耕田，打柴，執帶子為生。除咗金竹排姓王，其餘都係姓李。

村原址響船灣海北岸，村同村之間，有路連接。小滘響石芽頭西麓，大滘響觀音峒南麓，金竹排響大峒下面，橫嶺頭響雞仔峒下面。而船灣西岸，近三潭溪口，北有涌尾村，南有涌背村。涌尾村現址，被闢做作新娘潭公路停車場，而涌背村畀公路冚咗認唔出。響1968年，淡水湖堤壩初初築成，各村村屋仍響度。之後唔計小滘村，全部村屋都拆晒。到1973年，響堤壩加高12呎之時，小滘村都拆埋。

搬村之時，當時重未係大埔新市鎮，六鄉所在地，原本係林村河口，對住大埔海嘅淺灘，有紅樹林。六鄉新村建響廣福道外呢笪淺灘之上。淺灘填地加高。最初係家下寶鄉街，東昌街，廣福道同寶湖道嘅範圍，之後加到埋普益街同寶鄉街，向海嘅範圍。

1966年，六鄉安頓好，就響同發坊立六鄉村公所，以及響寶鄉道西面，將原本三光同育群兩村校合併，改成六鄉新村公立學校。而六鄉中嘅涌背村，更重建李氏宗祠，將舊祠堂基石門框，搬到同發坊，重現【龍門世澤，柱史家聲】嘅門聯。其他村嘅祠堂，原本政府都有地舖畀返，不過村民另有用途。

2006年，六鄉新村公立學校停辦，畀信義會做六鄉學習園地。