六脈渠

六脈渠（粵拼：luk6 mak6 keoi4）係一個古老嘅水渠系統，位置喺廣東省城（今廣州市）。渠畀到啲船可以駛入廣州城，兼且有防火同排洪作用。

舊時大致係南北走向，水由北流到南，通過城壕流入珠江。明清兩代，城區東北、西北分別出現咗向東、向西嘅兩條渠道。近代，隨著廣州城區擴展，六脈渠因為日久失修，好多經已淤塞，難以承擔繁重嘅排水任務。中華人民共和國成立後，將啲仲用得嘅渠道改成下水渠。而家六脈渠同玉帶河、西濠都改曬做暗渠，仲係廣州市中心重要嘅排水渠道。

史

據考，喺五代時期（907～960）六脈渠就有咗雛形。明洪武三年（1370）三城合一，洪武十三年擴築北城，六脈渠進而完善埋。清順治庚寅年（1650），耿精忠、尚可喜率兵攻入省城嗰陣，下令屠城7日（庚寅之劫）。城中啲街坊為咗逃避殺戮，匿咗入六脈渠內，據計有成六七千人，唔好彩大雨令渠水暴漲，大部分浸死咗。

民國22年（1933）開始到1950年代前，廣州城開闢馬路，將部分六脈渠改成馬路渠，分別有：

光孝寺街、詩書街、紙行街嘅右三脈渠
擢甲里、竇富巷、西濠街嘅右二脈渠

豪賢街脈渠、法政路脈渠等等都改成石屎馬路幹渠，將原來流入脈渠嘅各條街渠直接駁入大渠。

1952年開始，政府搞城市建設，逐步改造六脈渠，去到1959年尾搞完。變化包括：

整新嘅馬路幹渠代替嘅：
- 連新路馬路渠代替咗右一脈渠中段；
- 應元路馬路渠代替咗左二脈渠北段以及右一脈渠北段
- 教育路幹渠代替咗左一脈渠南段
- 德宣西路（而今東風西路同盤福路）大渠代替咗左一脈渠北段同右一脈渠北段
- 吉祥路馬路渠代替咗左一脈渠中段
- 小北路幹渠代替咗左三脈渠東北段
- 德宣東天官里（東風中路）大渠代替咗左一脈及右一脈渠東北段。
內街下水渠一齊改造嘅：
- 雨帽街、蓮花井、周家巷、西華二巷、芒果樹街、桂香街、賢藏街、馬鞍南等等內街下水渠代替咗右一脈嘅南、中、北段；
- 長塘街下水道代替咗左二脈渠南段

分佈

第一脈（左第一脈正渠）

自總督部堂（今越華路）向南流經華寧里、衛邊街（今吉祥路南段）、七塊石、清風橋（華寧里同中山五路之交）、南朝街、學院署、九曜池（都喺而今教育路）至書芳街、仙湖街穿城出南勝里入玉帶河。

第二脈（左第二脈正渠）

由舊城隍廟（文德路北端）後南北分流。南流經長塘街（大塘街之西），由賢思街穿城出玉帶河；北流經司後街、豪賢街同橫向嘅渠匯合。橫向嘅渠源出三元宮，東流經將軍大魚塘（喺大石街北）、丹桂里、天官里（今東風中路東段）出銅關，流入東濠。

第三脈（左第三脈正渠）

自東華里起，南流至貢院（而今中山圖書館），折入東濠，流程短啲。

第四脈（右第一脈正渠）

自巡撫部院（今中央公園）西側起，南流經雨帽街、桂香街、馬鞍街、由孚通街三聖宮前穿城出南勝里，入玉帶河。

第五脈（右第二脈正渠、南濠）

自將軍署（今廣東迎賓館）前玄妙觀左邊分南北流。南流經擢甲里、麻行街，由大水關（古西澳）出城入玉帶河。北流經豆腐巷、官塘街（海珠北路）同西流嘅橫渠相接。橫渠自三元宮前西柵起，西流經西華一巷，由北水關出城，流入西濠。

1796年，南濠成為六脈渠嘅右二脈。

第六脈（右第三脈正渠）

自光孝寺前起，南流經紙行街、詩書街，折向西，出小水關，入西濠。