眼鏡凱門鱷

眼鏡凱門鱷，又叫南美短吻鱷，凱門鱷或眼鏡鱷，係一種鱷魚。因為眼前端有一條橫骨嵴，好似人戴嘅眼鏡架，因此英文名有眼鏡鱷之稱。普通凱門鱷體長最大可達2.5 米，啱啱孵出嚟嘅鱷魚 BB 有20 - 25 cm 長。嘴長，背面呈橄欖綠色，頭、身體、尾上有好多好多深色斑，背脊同尾巴上有深棕色或黑色嘅橫帶紋，肚 dump 係純米色或者淺黃色。初孵出嚟鱷魚 BB 下琶（頜）兩側有淡色斑，到咗大約 35cm 長嗰陣呢啲斑紋會消失晒。

How to read a taxobox 眼鏡凱門鱷
瀕危指標
Least concern (LR/lc)
物種分類
界 動物界 門 脊索動物門 綱 爬蟲綱 目 鱷目 科 短吻鱷科 屬 凱門鱷屬 種 C. crocodilus
二元學名
Caiman crocodilus （Linnaeus，1758年）
眼鏡凱門鱷嘅分布

分佈

凱門鱷係美洲鱷類分布最廣泛嘅種類。原產中南美洲，不過有人帶佢哋到佛羅里達州同古巴。呢種鱷魚根據分佈地分成幾個亞種。

生物學

普通凱門鱷住喺廣泛嘅水域棲息地。同其他鱷魚一樣，食物隨年齡、季節同棲息地嘅唔同而變化。鱷細個主要食無脊椎動物，特別係鞘翅目昆蟲，亦都食螺、蝦、蟹。大咗主要食脊椎動物，包括水生同陸生脊椎動物。策略包括靜靜伏喺度唔郁，偷襲路過嘅陸上脊椎動物，響水度偷襲游近嘅魚同其他水生脊椎動物，有時亦會用身體同埋尾趕啲魚到淺水處或者響開闊水體將啲魚驅趕到狹窄岸邊再捕食。

求愛行為包括跳出水面，炫耀條尾，輕咬同摩擦頭頸咁。凱門鱷響唔同地點嘅造巢活動嘅高峰期亦有唔同，一般喺潮濕季節。個巢用葉、樹枝仔、雜草同泥堆成山仔型。每次生差唔多 40 隻蛋，成個孵化期鱷魚乸有規律咁關心同埋保護巢址。鱷魚 BB 出殼時發出叫聲，鱷魚乸（有時公會幫手）將巢挖開送鱷魚 BB 落水裏面，有時乸會用嘴幫鱷胚破殼而出，重用嘴擔鱷 BB 入水。凱門鱷一世唔同時期有唔同敵人。食鱷蛋嘅動物有黑點雙領蜥、發冠長腳鷹、食蟹狐、浣熊、長鼻浣熊同戴帽猴等。食鱷魚 BB 同鱷魚仔嘅有：鯰魚呢啲肉食性魚類、龜、鱷魚、夜鷺、鸛、鷹、虎貓以及家豬。美洲豹同埋森蚺都會捉成年鱷魚食。

種群動態同保護

爬蟲館 (屯門公園)裏面嘅眼鏡凱門鱷

凱門鱷分布廣，數量多，係提供國際鱷皮貿易嘅最主要種類。響原生地以外地方，佢係極具威脅性嘅外來物種。

響香港，嘉道理農場暨植物園而家養咗一條眼鏡凱門鱷，就響水鳥池嗰邊。另外，康樂及文化事務署亦喺2008年運咗一條去爬蟲館 (屯門公園)度養。

參考

• 《揚子鱷研究》，ISBN 7-5428-3377-4/Q‧32
• 《兩生爬行類圖鑑》，ISBN 957-469-519-0