利蘭Atlantean

利蘭Atlantean（有時譯成利蘭亞特蘭大）係英國利蘭出嘅一款後置引擎雙層巴士，亦係英國第一款大量生產嘅後置引擎雙層巴士。

利蘭Atlantean Leyland Atlantean
最早期嘅利蘭Atlantean PDR1/1 利蘭Atlantean AN68 用咗同廠Fleetline B20款式引擎室通風系統嘅利蘭Atlantean AN69，只係出咗一架
製造廠	利蘭
邊道出	英格蘭Farington
取代咗	利蘭泰坦
製造年份	1956年、1958年—1986年
後繼產品	利蘭奧林比安
主要對手	佳牌Wulfrunian 丹拿/利蘭Fleetline Bristol VR MCW-Scania Metropolitan 艾莎富豪B55 丹尼士統治者 都城嘉慕威曼都城巴士 Scania BR112DH 富豪Citybus
規格
長	28呎、30呎、33呎、36呎
引擎	利蘭O.600/O.680/O.690
波箱	利蘭Pneumocyclic 福伊特

先驅

利蘭喺1927年推出嘅泰坦雙層巴士，同時推出Lowbridge款式車身設計，令雙層巴士高度降低至少1呎，令雙層巴士可以駛入更多地方。但係佢嘅上層設計—右邊嘅凹入式車廂通道同埋左邊嘅4人座椅—並唔受歡迎，二戰後廠商開始着手構思解決方案。Bristol喺1949年研製嘅Lodekka用咗U形（英文Dropped-centre）尾軸同埋降低咗下層車身地台，令佢唔使再用Lowbridge車身設計；而利蘭就索性研發後置引擎雙層巴士，令傳動軸唔使再穿過成個下層車廂底部去行尾軸。

1952年利蘭試出咗一架樣辦車，佢有一副利蘭O.350引擎打橫擺喺車尾，配U形尾軸同埋Saunders-Roe（SARO）車身。架車同當時嘅前置引擎雙層巴士一樣係有車尾平台，而車頭形狀就同當時嘅無軌電車相似。1954年利蘭再整多一架樣辦車，不過佢係用都城嘉慕（MCCW）車身，兼且車頭係半駕駛艙形式。

兩架樣辦車分別登記為STF90（第一架）同埋XTC684（第二架），並進行徹底測試。其中STF90喺1963年拆咗，而XTC684就做咗收藏品。

樣辦車

1956年，英國雙層巴士嘅長度限制由27呎放寬至30呎，利蘭就喺同年嘅商用車展展出一架Atlantean樣辦車。架車同之前嘅兩架後置引擎雙層巴士樣辦一樣係用一體化設計（platform type sub-frame形式），不過前輪跨加長咗，令車門可以擺喺架車嘅最前面。佢有一副利蘭O.600引擎打橫擺喺車尾，Pneumocyclic波箱就擺喺引擎右邊，另外配U形尾軸同埋都城嘉慕車身，乘客上車只需要喺路面踏上一級，之後唔使再踏上任何梯級就可以由頭行到尾。

架車登記為281ATC，並喺英國各地進行示範。不過架車都係有啲問題，包括喺下層車廂嘅引擎聲太大等等。

發展史同埋設計

1958年，利蘭解決咗Atlantean樣辦車嘅多個問題之後，喺同年嘅商用車展展出量產型Atlantean。之後Atlantean巴士正式大量生產。

最初期嘅量產型Atlantean型號係PDR1/1，佢改以傳統嘅底盤形式出現，而引擎室就獨立喺車身之外。引擎重係利蘭O.600，不過亦有得揀利蘭O.680。至於尾軸就唔再係U形設計，而改為較傳統嘅直驅動軸。

不過條直驅動軸令到配矮車身嘅Atlantean PDR1/1要喺上層車尾左邊整一條凹落去嘅車廂通道，而通道右邊就係幾排4人座椅，結果造就以U形尾軸為標準嘅丹拿Fleetline打入市場。1964年利蘭推出配U形尾軸同埋丹拿Daimatic款式波箱嘅Atlantean PDR1/2，1967年再以配U形尾軸同埋Pneumocyclic波箱嘅Atlantean PDR1/3取代PDR1/2。PDR1/3喺1971年俾配利蘭O.680引擎嘅丹拿Fleetline取代。

至於PDR1/1就喺1962年改良成PDR1/1 MkII，到1967年再改良成PDR1A/1，並一直出到1973年。另外隨住英國雙層巴士嘅長度限制進一步放寬，利蘭喺1967年推出33呎嘅Atlantean PDR2/1，並一直出到1971年。

喺1960年代尾出現嘅左軚Atlantean代號係LPDR1/1同埋LPDR1A/1，供應歐洲大陸市場，其中最長版本長36呎。

1972年利蘭推出新一代嘅Atlantean AN68，並作出多項改良，利蘭O.680引擎成為標準，同樣有右軚同埋左軚版。後來隨住引擎同埋波箱規格嘅轉變，先後衍生出AN68A、AN68B、AN68C同埋AN68D版本。1978年利蘭為出口市場推出配利蘭O.690引擎嘅Atlantean AN69。

訂單

利蘭Atlantean喺英國本土有多間巴士公司買，蹤跡遍及英國各地。1968年英國政府開始資助巴士公司買後置引擎巴士，以推行一人控制模式，利蘭Atlantean等後置引擎巴士更將英國所有前置引擎巴士淘汰。

另外亦有多架利蘭Atlantean被出口到其他國，包括愛爾蘭、伊拉克、伊朗、新加坡等等。

最終利蘭Atlantean嘅總產量超過15,000架。

停產

自1970年代開始，利蘭已經開始研製新嘅後置引擎雙層巴士去取代旗下嘅Atlantean、丹拿Fleetline同埋Bristol VRT。初頭利蘭整咗隻泰坦（B15），但都係達唔到呢個目的，其後利蘭再整咗隻奧林比安。

1984年利蘭Atlantean喺英國市場俾奧林比安取代，而出口版Atlantean嘅生產一直維持到1986年。

睇多啲

• Booth, G. (2015). The Leyland Atlantean. Crécy Publishing. ISBN 978-1-9083-4741-1

出面網頁

• Leyland Atlantean Website （Internet Archive版本）