利蘭奧林比安
利蘭奧林比安，又譯成利蘭奧林匹克，係英國利蘭出嘅一款後置引擎雙層巴士。
| 利蘭奧林比安 Leyland Olympian | |
|---|---|
 利蘭奧林比安  香港一架有冷氣嘅利蘭奧林比安 | |
| 製造廠 | 利蘭 |
| 邊道出 | 英格蘭Bristol，Brislington地區（Bristol車廠） 英格蘭Workington 英格蘭Farington |
| 取代咗 | 利蘭Atlantean 丹拿/利蘭Fleetline Bristol VRT 利蘭泰坦（B15） |
| 製造年份 | 1979年—1993年 |
| 後繼產品 | 富豪奧林比安 |
| 主要對手 | 艾莎富豪B55 丹尼士統治者 都城嘉慕威曼都城巴士 丹尼士巨龍/禿鷹 富豪Citybus Scania BR112DH Scania N112 Scania N113 DAF DB250 |
| 規格 | |
| 長 | 9.5米、10.3米、10.4米、11米（兩軸、三軸）、12米 |
| 闊 | 2.5米 |
| 引擎 | 利蘭TL11 吉拿5LXCT/6LXB/6LXCT/LG1200 康明斯L10 |
| 波箱 | 利蘭Hydracyclic Voith DIWA 851/DIWA 851.2 ZF "Ecomat" 4HP500/"Ecomat" 5HP500 |
背景同生產史
編輯1970年代，利蘭出咗泰坦（B15）一體化設計雙層巴士，諗住用嚟取代旗下嘅三款後置引擎雙層巴士，利蘭Atlantean、丹拿珍寶同埋Bristol VRT。不過當時啲巴士公司想要底盤加車身嘅配搭，所以利蘭開始咗B45計劃。
第一副B45底盤喺1979年整好，去到1980年中有一架B45樣辦車喺英國投入服務。利蘭B45喺同年底投產，並正名為「奧林比安」。
利蘭奧林比安嘅生產線曾經搬過三次。佢最初係喺利蘭旗下Bristol間廠出，1983年搬咗去Workington，1985年再逐步搬去Farington，1990年又再逐步搬返Workington出。
設計
編輯利蘭奧林比安嘅設計基本上係將多個源自泰坦（B15）嘅組件裝落一副完整底盤上面，底盤係用半合式設計（英文semi-integral construction），底盤結構要個車身結構幫手撐住，而引擎係吊喺引擎室入面。
佢初時可以配利蘭TL11或者吉拿引擎，同埋利蘭Hydracyclic或者Voith DIWA波箱。後來加入咗康明斯L10引擎同埋ZF Ecomat波箱選擇，亦有少部分係用Maxwell波箱。Leyland Bus私有化之後，由於公司冇買埋利蘭引擎生產線同埋決定唔再開發Hydracyclic波箱，呢兩個選擇喺1988年冇咗。
利蘭奧林比安推出嗰時得兩軸版，長9.5米或10.3米，後來多咗11米可以揀。1981年利蘭為香港市場推出三軸版奧林比安，中軸係輔助車軸，緊貼住驅動軸，而且中軸車轆可以順住架車自己作輔助轉彎。初時得12米長，後來再加入11米同埋10.4米版。
利蘭奧林比安亦有冷氣巴版本，初時副冷氣機係由另一副引擎行，後來利蘭出咗隻用一副引擎同時行車同埋經過波箱去行冷氣嘅利蘭奧林比安。
英國
編輯利蘭奧林比安喺英國有多隻車身可以揀，包括利蘭屬下嘅ECW同埋Roe、亞歷山大R型、東蘭開夏、Northern Counties、Marshall，後來亦有用過Optare（用Roe嘅設計）同埋利蘭（ECW同埋Roe執咗之後）車身。
佢喺英國本土有多間巴士公司買，蹤跡遍及英國各地，不過倫敦方面只係入咗三百幾架，同利蘭泰坦（B15）嘅際遇好唔同。英國嘅利蘭奧林比安一般都係兩軸車，不過Stagecoach喺1989年引入咗3架11米三軸車。
出口市場
編輯利蘭曾經出口奧林比安樣辦車去中東、新加坡、香港、希臘、葡萄牙、北美洲、泰國/馬來西亞（架樣辦車係二手車）、台灣（兩架11米三軸車）、南韓（一架11米三軸冷氣車）等地，不過得其中幾個國家或地區嘅巴士公司買。
香港
編輯香港嘅九龍巴士喺1981年接收咗3架10.3米嘅兩軸利蘭奧林比安，再喺1982年接收1架12米三軸利蘭奧林比安，全部配ECW車身。之後九巴繼續買利蘭奧林比安，但全部改配亞歷山大RH車身。九巴喺1983至1985年引入120架9.5米兩軸版，1983至1986年引入162架12米三軸版（有三道門）。再之後喺1986至1994年引入470架11米三軸版。1988年，九巴引入1架利蘭奧林比安11米三軸冷氣巴士嚟試，其後喺1990至1993年引入多149架。
中華巴士喺1981年接收咗兩架兩軸利蘭奧林比安，一架係9.5米長，一架係10.3米長，都係配ECW車身。但去到1991至1992年至引入25架利蘭奧林比安11米三軸冷氣巴士，同埋喺1993年引入10架利蘭奧林比安11米三軸冇冷氣巴士，兩者都係配亞歷山大RH車身。1998年9月1號中巴嘅專營權完咗之後，35架利蘭奧林比安三軸車都賣晒畀新世界第一巴士。
城巴喺1985年引入4架利蘭奧林比安12米三軸客車，配獨立驅動嘅冷氣同埋ECW車身，專行中港過境線。1989至1992年間，城巴一共買入99架11米三軸利蘭奧林比安冷氣客車、1架10.4米三軸利蘭奧林比安冷氣客車同埋11架12米三軸利蘭奧林比安冷氣客車，全部配亞歷山大RH車身，並且得一道門，當中7架12米車裝咗行李架，用嚟行來往深圳機場嘅路線。城巴喺1993年9月1號接辦26條中巴專利巴士線（Network 26新里程），因此買入52架12米三軸利蘭奧林比安冷氣巴士（雙門）同埋33架10.4米三軸利蘭奧林比安冷氣巴士，全部配亞歷山大RH車身。另外城巴喺1992年底火炭車廠火警後，將一架燒咗嘅11米三軸利蘭奧林比安冷氣客車改成12米巴士，並且買多兩架12米三軸利蘭奧林比安冷氣巴士，亦係配亞歷山大RH雙門車身。
九廣鐵路公司喺1990至1991年買咗24架利蘭奧林比安11米冷氣巴士，配亞歷山大RH車身，行九廣鐵路接駁巴士線（後來叫九廣東鐵接駁巴士線，今日嘅港鐵接駁巴士線）。兩鐵合併後，呢啲巴士租晒畀港鐵公司用。
中華電力喺1992年引入15架單門版利蘭奧林比安12米冷氣巴士做員工車，配亞歷山大RH車身。
希臘
編輯希臘雅典嘅EAS公司喺1983年引入19架10.3米嘅兩軸利蘭奧林比安，配ECW車身。呢19架車連埋1架希臘樣辦車喺1988年正式俾EAS買咗，並一直行到1994年。
新加坡
編輯新加坡巴士公司（今日嘅新捷運）喺八十年代初接收咗一架配亞歷山大車身嘅兩軸利蘭奧林比安樣辦車（後來去咗英國牛津），之後喺1986至1988年引入200架配亞歷山大RH車身嘅兩軸利蘭奧林比安，再之後喺1993至1994年引入200架配亞歷山大RH車身嘅三軸利蘭奧林比安。
美國
編輯美國三藩市嘅Grosvenor Coach Lines（Gray Line San Francisco）喺1986年引入10架三軸利蘭奧林比安，配ECW客車車身。
愛爾蘭
編輯愛爾蘭都柏林嘅Dublin Bus喺1990至1993年引入175架兩軸利蘭奧林比安，車身由亞歷山大喺貝爾法斯特嘅Alexander (Belfast)分廠出。
停產
編輯富豪喺1988年收購咗利蘭。後來富豪修改利蘭奧林比安嘅設計，並發展出富豪奧林比安。
利蘭奧林比安喺1993年中宣告停產，係最後一款停產嘅利蘭巴士。佢俾富豪奧林比安取代。
之前嘅「利蘭奧林比安/奧林匹克」
編輯利蘭喺1950年代出過一款叫Olympian嘅中置引擎單層巴士。
而喺同一時期，利蘭亦有出一款叫Olympic嘅中置引擎單層巴士，不過係用大引擎。
參考
編輯- ↑ "The Leyland Leopard - A Brief History". 原著喺2008年11月20號歸檔. 喺2009年8月28號搵到.
