利蘭泰坦 (B15)
想搵前置引擎嘅利蘭泰坦嘅話，請睇利蘭泰坦。| 利蘭泰坦 Leyland Titan | |
|---|---|
 利蘭泰坦（B15） | |
| 製造廠 | 利蘭 |
| 邊道出 | 英格蘭倫敦，Park Royal地區（Park Royal車廠） 英格蘭Workington |
| 製造年份 | 1974年—1984年 |
| 後繼產品 | 利蘭奧林比安 |
| 主要對手 | 艾莎富豪B55 丹尼士統治者 都城嘉慕威曼都城巴士 Scania BR112DH 富豪Citybus |
| 規格 | |
| 長 | 9.57米 |
| 闊 | 2.5米 |
| 高 | 4.42米 |
| 引擎 | 利蘭500系列（樣辦車）/L11/TL11 吉拿6LXB/6LXC |
| 波箱 | 利蘭Hydracyclic |
生產史
編輯利蘭喺1973年開始B15計劃，原意係用一架新雙層巴士去取代旗下嘅三款後置引擎雙層巴士，利蘭Atlantean、丹拿Fleetline同埋Bristol VRT。
B15雙層巴士同當時嘅利蘭National單層巴士一樣係用一體化設計，底架車身都係利蘭自己搞掂晒。呢個設計受到一啲巴士車身製造廠嘅關注，其中亞歷山大車身公司同埋Northern Counties曾經同利蘭傾過授權生產B15嘅事，但都係冇結果，最終Northern Counties同Foden合作出咗一款叫Foden-NC嘅後置引擎雙層巴士（不過只係出咗幾架），而亞歷山大就同艾莎富豪B55出車身。
1974至1977年，利蘭總共出咗5架配旗下Park Royal Vehicles車身嘅B15巴士。之後B15巴士被正名為泰坦（之前有另一款出咗幾十年嘅泰坦），並喺1977年6月投產，並繼續配Park Royal車身。
不過利蘭原訂計劃係喺Park Royal出頭100架泰坦，然後將生產線搬去AEC間廠，結果Park Royal出現工業行動，令利蘭泰坦嘅生產進度被拖慢，第一架量產嘅泰坦去到1978年8月至交到貨。1978年10月利蘭宣佈執咗AEC，而泰坦生產線繼續留喺Park Royal，但情況都冇乜改善，最終利蘭喺1979年10月宣佈執咗Park Royal，之後利蘭泰坦嘅生產進度就快番。Park Royal喺1980年中執笠。之後利蘭決定喺Workington（出利蘭National單層巴士嗰間廠）繼續出利蘭泰坦，而喺Workington出嘅車身就叫利蘭車身。
Park Royal嘅工業行動同埋隨後嘅搬生產線工作延誤咗利蘭泰坦交貨進度，令利蘭損失訂單。最後一架利蘭泰坦喺1984年出。而利蘭泰坦（B15）最終俾利蘭奧林比安取代。
設計
編輯利蘭泰坦（B15）嘅一體化設計係類似後置引擎版AEC Routemaster，都係分前後兩個副架（冇完整底盤）同埋鋁合金車身骨架。巴士係用前獨立懸掛同埋U形尾軸，引擎係打橫擺喺車尾，而散熱水箱就擺喺引擎室右上面。
利蘭泰坦樣辦車係用利蘭500系列引擎，但量產巴士係用吉拿6LXB引擎，少部分就用吉拿6LXC或利蘭L11/TL11引擎。而波箱就係利蘭Hydracyclic。
所有利蘭泰坦都係長9.57米。
英國
編輯倫敦
編輯倫敦運輸局自1978年開始引入利蘭泰坦（B15），一直去到1984年，最終倫敦運輸局入咗1,125架泰坦。倫敦運輸局另外入咗6架二手泰坦。
1994年倫敦巴士完成私有化並分成多間巴士公司，啲利蘭泰坦就被分配到唔同嘅倫敦巴士公司。
倫敦嘅利蘭泰坦自九十年代開始退役，有多架被調去英國其他地方繼續行，最後一架喺2003年6月19號撤出倫敦合約巴士線。
倫敦以外
編輯由於利蘭泰坦（B15）嘅一體化設計比起底盤加車身嘅配搭複雜，兼且車身冇得揀，再加上生產出問題，令泰坦唔受英國嘅巴士公司歡迎。
利蘭泰坦初初出嗰時，Greater Manchester PTE接收咗15架泰坦（原訂單係要190架），West Midlands PTE接收咗5架（原訂單係要80架），Reading Transport接收咗兩架。利蘭泰坦改喺Workington出之後，Reading Transport喺1983年接收多10架。
Greater Glasgow PTE同埋Maidstone & District等公司曾經訂過利蘭泰坦，但因為Park Royal嘅工業行動等因素而取消訂單。
香港
編輯香港嘅中華巴士曾經訂過兩架Park Royal車身嘅利蘭泰坦（B15），一架係9.57米長客車版，另一架係11米長版本。
其中客車版泰坦喺1980年初投入服務，係唯一一架出口嘅同款巴士，初時主要行南區嘅豪華巴士線，1992年起被列為士啤車，1995年退役。
至於11米長泰坦就受到Park Royal嘅工業行動影響而交唔到貨，最終利蘭改出兩架勝利二型，而11米長泰坦嘅組件就用咗嚟出一架倫敦版泰坦。
參考
編輯- Jack, D; (1984). Leyland Bus Mk2. The Transport Publishing Company. ISBN 0-903839-67-9
- Jack, Doug; (1994). Beyond Reality - Leyland Bus - the twilight years. Venture publications. ISBN 1-898432-02-3