乜皮都有

《乜皮都有》（粵拼：mat1 pei4 dou1 jau5）係《格林童話》有收錄嘅一個童話故事。個故仔講一位公主，佢父皇想夾硬娶佢做老婆，於是公主就著住一塊由好多唔同野獸嘅毛皮（乜皮都有）造嘅披肩逃走。公主後來去咗第個王國做女僕，有一日佢喺舞會上畀嗰個王國嘅國王睇中，最後做咗呢位國王嘅老婆搵到真愛，大團圓結局^[1]。

呢個故仔嘅情節，同《驢皮妹》近乎完全一樣。

個名

《乜皮都有》呢個故仔有好幾個名：

原版德文：Allerleirauh
標準英譯：All-Kinds-of-Fur（可以理解做乜皮都有噉解）
除此之外，英文又有個譯名叫 Thousandfurs，跟呢個名嚟譯嘅話，個故仔可以叫做《千種皮》或者《千皮公主》。

情節

個童話故事嘅情節如下。

公主嘅身世

話說好耐好耐以前，有一位國王同一位皇后，兩公婆育有一位公主。皇后生得國色天香，全國冇任何一個女人可以同佢媲美。本來一家三口過住幸福嘅生活，點知好景不常，有日皇后惹到重病。知自己冇幾耐命嘅皇后瞓喺病床上，同佢老公講：

「如果你想喺我死後再娶，應承我一樣嘢。你娶返嚟嗰位新太太，一定要生得同我一樣咁靚。」

國王諗都唔諗就答應，然後皇后就斷咗氣。

皇后死後，國王一路都意志消沈，冇心機去搵新老婆，但佢班大臣係都要佢去搵：

「陛下，我哋嘅王國需要有一位皇后母儀天下先得㗎。」

班大臣四圍去搵美人返嚟見國王，諗住梗會搵到個美人係國王睇得上眼嘅。但係班大臣年復一年噉搵，國王始終都係唔肯再娶。結果有一日，國王卒之搵到一個美貌可比皇后嘅美人—佢望住自己嘅親生女長大，發覺大個咗嘅公主生得同佢死咗嘅母后一個餅印噉。國王面露邪笑，話想娶自己個女做老婆。

畀父皇迫婚

班大臣一聽到，個個都喺度勸阻國王。

「陛下，噉唔得㗎！噉係亂倫呀！」

但國王堅持想娶自己個女。公主聽到第一個反應係覺得驚愕。面對阿爸向自己求婚，公主噉講：

「呀... 如果你想娶我，你要幫我準備三條裙，第一條要好似太陽咁金黃，第二條要好似月亮咁銀白，第三條要好似星星咁閃爍。除此之外，我仲想要一件用一千種唔同野獸嘅毛皮整嘅披肩。」

「好！」

（公主心諗）「啲噉嘅嘢邊有可能搵得到。父王佢最後實係要死死哋氣認輸。」

不過國王唔肯放棄。佢請晒全國最擅長編織嘅織女同埋最神勇嘅獵人返嚟，最後真係畀佢織到三條好似太陽月亮星星噉嘅裙，又捉到一千種唔同嘅野獸並且將啲野獸嘅毛皮織做一件披肩。公主簡直唔敢相信，而國王諗住自己贏咗，就郁手安排婚禮。無可奈何嘅公主唯有趁夜逃走。當晚佢帶住三條裙，著起件千皮披肩，再用煙塵染黑自己塊面然後就走。佢博晒命跑，跑跑吓跑到去一座森林，跟住覺攰，就喺一樖樹下面瞓著咗。

第二朝，有一位國王（但唔係佢父王）嚟到森林打獵—原來公主跑得好遠，跑到去咗另一個王國。國王啲手下話咁快就發現瞓緊覺嘅公主。

「陛下，我哋發現咗隻異獸，佢啲毛皮望落似係由一千種動物嘅毛皮組成㗎。」

公主醒咗，畀班男人嚇親：

「唔好傷害我！我係... 一個貧窮嘅孤兒，畀我阿爸阿媽遺棄咗。」

國王同佢班手下諗咗吓，有少少同情呢個女仔，又醒起佢哋想請個女僕返皇宮嘅廚房做嘢，就決定帶呢個女仔返皇宮。國王同佢班手下即場幫個女仔改咗個花名，叫乜皮都有。公主覺得鬆咗啖氣—可以搵到個地方棲身，又有嘢可以做，乖乖哋返皇宮，從此就做「乜皮都有」。