開主選單

李煜

南唐國王
(由南唐後主跳轉過來)

李煜‎(煜讀沃,粵拼lei5 juk1937年8月15號978年8月13號),重光(重讀從,cung4 gwong1),原名李從嘉lei5 cung4 gaa1),號鐘山隱士zung1 saan1 jan2 si6)、鐘峰隱者zung1 fung1 jan2 ze2)、白蓮居士baak6 lin4 geoi1 si6)、蓮峰居士lin4 fung1 geoi1 si6),係十國之中南唐(江南國)嘅第三位國主,亦係南唐最後嘅君主,961年976年間在位[1],佢無廟號,史稱(南)唐後主naam4 tong4 hau6 zyu2)、違命侯wai4 ming6 hau4),坊間經常叫佢做李後主lei5 hau6 zyu2)。

李煜
江南國主 (更多……)
Li Yu Lidai Junchen Huaxiang.GIF
出自《歷代君臣畫像》
江南國主
在位 961年~976年1月1號[1]
前任 李景
繼任
私人明細
王后 周娥皇中文大周后(大周后)
小周后(大周后個妹)
仔女 李仲寓
李仲宣
年號
諡號 文憲昭懷孝愍皇帝
廟號
唐元宗
光穆皇后鍾氏中文钟皇后
出世 昇元元年七月初七
(937年8月15號)
過世 太平興國三年七月初七
(978年8月13號)
安葬 葬日未詳
洛陽北邙山
宗教 佛教

李煜作爲君主,喺政治上比較無能,畀強大嘅宋朝軍隊進攻入自己國家,南唐滅亡,而佢亦畀北宋俘虜;軟禁兩年後,佢畀宋太宗落令毒殺。相比之下,佢嘅文學、藝術才能極其優秀,公認佢係10世紀中國第一流嘅聞名家、人、畫家書法家[2]。特別係呢種韻文,李煜係中國史上首屈一指嘅詞人,對呢種文體嘅勃興有好大貢獻,造詣淵深,譽為詞聖ci4 sing3)、千古詞帝cin1 gu2 ci4 dai3[3],作品傳頌百世,膾炙人口,係五代詞嘅大成者。佢嘅父王唐元宗李璟喺藝術方面亦係深得評價,佢哋兩父子喺詞史中並稱做南唐二主

身世

李煜原名李從嘉[4]昇元元年(937年)李從嘉出生,係南唐第二任皇帝元宗李璟嘅六仔[4]。佢母后係鍾皇后,兄長有李弘冀中文李弘冀哋五個,細佬有李從善中文李從善哋五個,有兩個仔李仲寓中文李仲寓李仲宣中文李仲宣。李從嘉有個值得留意嘅身體特徵,佢個瞳孔係二重嘅(重瞳[4]。自幼佢就早早展示出詩文同書畫才能。佢嘅四個兄長都早死,只有李弘冀能夠成年,由此佢係事實上元宗嘅二仔。

受父皇影響,自細李從嘉就爲人仁厚,性格柔弱[2][4]。佢個皇兄李弘冀對佢既妒忌又憎佢,兼且李弘冀份人比較猜忌人[5],李從嘉驚畀佢政治追殺,就起號叫鐘山隱士、鐘峰隱者,聲明自己唔關心政治,唔想起爭執。日常之中,李從嘉有大把時間去遨遊山水,從事藝術活動[2]

政治生涯

登基

李從嘉原本封做鄭王,但顯德六年(959年)太子李弘冀死咗,於是佢成咗啲人眼中嘅後繼人,就封爲吳王。建隆二年(961年)農曆二月,南唐遷都去洪州(而家嘅江西南昌),李從嘉立做南唐太子,喺原來嘅國都金陵監國,來擔當代行國事[6]。當年農曆六月(西曆8月),唐元宗駕崩[7],李從嘉就喺金陵即位,改名叫李煜,史稱南唐後主。嗰年佢二十五歲(實歲24歲)。亦係即位呢日,停咗遷都,金陵恢復爲首都。李煜向宋太祖(趙匡胤)請求畀李景作爲皇帝身份來祭祀。宋太祖允許咗呢樣,就畀咗佢皇帝禮遇。

喺內政方面嘅貨幣,佢導入咗鐵錢,引發經濟混亂,就將爛攤子留畀重用嘅韓熙載中文韓熙載等臣下去收拾。雖則國力衰退,但憑住江南豐厚嘅經濟實力,李煜自身得以持續絢爛豪華嘅宮廷生活,佢從事嘅文藝活動寫出好多詞作,傳出幾多逸聞。

稱臣北宋

南唐自李煜父王元宗時就畀後周打敗多次,要向喺汴京嘅中原朝廷稱臣,同時要用埋嗰個朝廷嘅年號960年開始,宋朝換低咗後周,南唐繼續稱臣,用宋朝年號,但嗰陣佢嘅領土係南方各國中最大嘅,控制住長江全部嘅中游同下游,有住大笪靚地,物產豐富[8]

李後主對北宋好恭敬。接替父王登基嗰陣,佢派馮延魯帶住幾多物產、同埋由佢親自執筆寫嘅奏表,去呈報佢嘅繼位,入面啲話恭敬謙讓。爲咗令宋帝能夠安心,李後主準備咗兩套禮服:一部黃色龍袍用來設內朝,一部紫袍用來接待宋使。當宋朝使者揸住宋太祖嘅敕封詔書到咗南唐,李後主就着呢部紫袍,以藩王身份出外迎接[9]

宋太祖以統一中國爲目標,用各種理由攻擊各國,滅亡晒佢哋。喺南唐南邊嘅南漢喺971年畀宋朝滅亡,南唐就非常之驚大宋。所以李煜歇力表示佢嘅王國會服從宋廷。「南唐」本來係啲史家方便噉嗌嘅名稱,正式名叫「唐」,南唐皇室自居係輝煌嘅大唐帝國後繼人。開寶四年(971年),由於憂慮大宋,驚呢個國號會惹嬲宋廷,李煜就將國號改做「江南」,代替原先嘅唐,所以南唐又叫江南國。使用呢個國號係爲咗表示自己滿足於做個揚子江以南嘅小帝國,話自己並冇第啲野心,係個爲獲得宋廷承認而做嘅苦肉計。同時喺嗰陣,中書省、門下省呢啲官廳名本來係中央政府用嘅,所以應該只有宋廷先可以繼續使用,而江南國就將佢哋嘅名稱改成左內史府、右內史府。同時將原先南唐爵位係王嘅宗親都降格做公、侯[2]。呢啲王嘅爵位其實得皇帝先可以落令降格,而國主唔係皇帝,本來係冇權降佢哋皇族格嘅。另外佢仲唔用父王留畀佢嘅壯麗宮殿,來話畀人聽佢冇惗住享受到成個皇帝[2]

於是靠住南唐保存國家嘅努力,令大宋冇咗攻擊南唐嘅大義名份。但到開寶七年(974年),宋太祖命令李煜來朝入闕,李煜因爲病咗行唔喐而拒絕。結果畀咗宋朝口實去侵攻佢,宋太祖就命令曹彬、潘美去攻打南唐。李煜派咗臣下徐鉉去做使臣,原本想用外交平息軍事,但反而刺激起宋太祖,持續包圍金陵10個月倒,最後開寶八年十二月(976年1月)[1],金陵陷落,李煜投降兼畀宋軍捉咗去北方,南唐歷經三代而滅亡。開寶九年正月,李煜到咗大宋首都開封,之後被迫過軟禁生活。宋廷下賜佢個爵位做違命侯。宋太祖之後係宋太宗嘅時代,就改封做隴國公lung5 gwok3 gung1)。李煜嘅使臣徐鉉同宋太祖交涉時,宋太祖對徐鉉講:「我頂唔順有個人喺我張床隔籬打鼻鼾!」(臥榻之側,豈容他人鼾睡乎!)[10]呢個就係成語「他人鼾睡」嘅由來,意思係話「侵犯咗自己嘅勢力範圍」。

當國家處於亡國危機時,李煜仲有閒心去關心詩詞呢啲文化藝術,因此史家普遍認爲佢係個昏庸之君,導致畀大宋武力攻佔嘅國亡家破結局,而佢作爲沒落王族,亦遭遇到求死不得、只能忍辱偷生嘅悲慘命運。然而佢喺自己命運嘅生存體驗中,將自身既傷痛又憂鬱嘅心情淋漓盡致噉寫晒入詩文中,呢啲作品完美噉表現出佢璀璨嘅文學資質,因此後世公認佢呢啲詩詞係名作,流傳至今。

關於佢嘅人生結局,佢條命留到吳越國同大宋合併嗰年,喺佢自身生日嘅七月初七(七夕/魁星節),佢飲咗宋太宗(宋太祖嘅細佬)送嘅生辰祝賀酒後死咗。據《默記》同《唐餘記傳》,李煜寫咗思念故鄉同懷念自己王國嘅詞作,件事畀宋太宗知咗,又讀咗佢「故國不堪回首」嘅詞句,就令佢龍顏大怒,於是用牽機藥呢種猛毒暗殺佢,落毒藥喺賜佢杯酒度,李煜嘅死狀好慘,毒發後身體幾十回抽搐、扭曲,最後痛苦到身體似彎弓噉攣埋至死[11][12]。換句話講,軟禁期間之所以養住佢條命,係爲咗對外彰示大宋對歸降者寬容,當吳越國歸降時,佢就冇咗呢個用途、冇咗利用價值,佢嘅存在會成爲潛在憂患,因而就即時處決咗佢。

李煜死後,追贈佢吳王。因而得以用王嘅禮落葬喺洛陽。佢手中所成就嘅南唐文化畀宋朝文化所吸收,成爲當中燦爛嘅一部分。

文藝

 
《江行初雪畫院學生趙幹狀》(畫院學生趙幹嘅江行初雪圖),畫名題字係李煜嘅金錯刀真跡

李煜雖則唔熱心於政務,但佢有文藝才華,除開佢成就極大嘅詞,佢亦傾注心血喺書法同繪畫領域,另外唐代玄宗編曲嘅《霓裳羽衣曲》當時已經散佚,而佢就專注於復原返首曲。書法上佢有種叫「金錯刀」嘅字體,字體嘅表現特徵係筆觸上有韻味噉微妙震動[13]

詞喺李煜嘅亡國經驗前後分別有住唔同嘅詞風。喺宮中生活時,佢啲作品幾乎都係吟詠花鳥風月同埋男女間嘅曖昧情愫,風格華美。而到咗幽禁生活嘅境遇,令李煜嘅心情有咗好大變化,由此生出哀切之感,表現爲後悔心境、同埋帶住悲壯感受嘅望鄉懷念,喺藝術上進階到更高一層。李煜嘅詞作直到今時依然受人歡迎,譬如鄧麗君嘅專輯《淡淡幽情英文Dandan youqing》中就揀咗佢嘅三首詞搭上現代曲風來唱。

李煜將佢自用嘅文具發展成文房四寶,係文具史中嘅人物。佢攞玉做係龍尾硯(歙州硯),由名匠李廷珪出品,係有名嘅澄心堂紙,呢種紙嘅稱呼出自李煜喺宮中閱覽上奏文表嘅書齋,建築名就叫澄心堂。呢啲嘢都設置咗專門嘅部局去製造,可見李煜對此投入咗相當嘅熱情。

  1. 1.0 1.1 1.2 據《南唐書·後主本紀》:「乙亥歲……冬十一月……乙丑,城陷……國主帥司空、知左右內史事殷崇義等肉袒降於軍門。」查兩千年中西曆轉換,係976年1月1號。
  2. 2.0 2.1 2.2 2.3 2.4 安作璋《中國史簡編》第76頁。
  3. 《印第安納夥伴之中國古典文學》第555頁。
  4. 4.0 4.1 4.2 4.3 歐陽脩新五代史》:「煜字重光,初名從嘉,景第六子也。煜為人仁孝,善屬文,工書畫,而豐額駢齒,一目重瞳子。」
  5. 資治通鑑》、卷294
  6. 續資治通鑑》、卷1
  7. 據《南唐書·元宗本紀》:「建隆二年……六月……庚申。殂於長春殿。年四十六」。查兩千年中西曆轉換,係961年8月12號。
  8. 安作璋《中國史簡編》第61頁。
  9. 安作璋《中國史簡編》第62頁。
  10. 李燾. 《續資治通鑑·太祖開寶八年》. 上怒,因按劍謂鉉曰:「不須多言,江南亦有何罪?但天下一家,臥榻之側,豈容他人鼾睡乎!」鉉惶恐而退。 
  11. 王銍《默記》:「服之前卻數十回,頭足相就如牽機狀也。」
  12. 陳霆《唐餘記傳》:「煜以七夕日生,是日燕飲聲伎,徹于禁中。太祖銜其有『故國不堪回首』之詞,至是又慍其酣暢,乃命楚王元佐等攜觴就其第而助之歡。酒闌中,煜中牽機藥毒而死。」
  13. 陶穀《清異錄》:「後主善書,作顫筆樛曲之狀,遒勁如寒松霜竹,謂之『金錯刀』。作大字不事筆,捲帛書之,皆能如意,世謂『撮襟書』。」

參攷資料

  • 陸游. "卷三 後主本紀". 《南唐書》. 
  • 安作璋 (1986年). 《中國史簡編》. 山東教育出版社. ISBN 9787532806973. 
  • 威廉·H.年侯沙(Nienhauser, William H)【編】 (1986年). 《The Indiana Companion to Traditional Chinese Literature》(印第安納夥伴之中國古典文學). 印第安納大學出版社. ISBN 0-253-32983-3. (英文)
  • 村上哲見【譯註】,吉川幸次郎【跋文】. 《中国詩人選集16 李煜》(中國詩人選集16 李煜). 岩波書店. (日文)


前任:
元宗李璟
第三任南唐國王
961年~976年
後任:
(南唐滅亡)