南斯拉夫社會主義聯邦共和國
(由南斯拉夫聯邦人民共和國跳轉過嚟)
南斯拉夫社會主義聯邦共和國係指1945年到1992年嘅南斯拉夫，屬共產主義陣營，行社會主義，1963年之前叫南斯拉夫聯邦人民共和國。呢個國家係由鐵托一手建立。
由於呢個國家承襲住有「第一南斯拉夫」之稱嘅南斯拉夫王國，因此有個別名「第二南斯拉夫」。
冷戰期間，响鐵托領導下嘅南斯拉夫行咗同其他東歐社會主義國家唔一樣嘅路線，既有偏向自由化嘅經濟體制、政治氣氛同埋言論自由，亦唔參加北約同華約兩大軍事聯盟，反而同印度、埃及、印尼同埋拉丁美洲國家創立咗唔結盟運動組織，重擁有領導地位。
1991年到1992年，南斯拉夫分裂，斯洛文尼亞、克羅地亞、波斯尼亞黑塞哥維那同埋馬其頓共和國先後獨立。最後塞爾維亞同埋黑山兩個加盟國組成南斯拉夫聯盟共和國，2003年又改名做塞爾維亞黑山（簡稱「塞黑」）。2006年黑山獨立，南斯拉夫正式玩完。