卡薩布蘭卡級護航航空母艦

卡薩布蘭卡級護航航空母艦（英文：Casablanca Class aircraft carrier），係美國響第二次世界大戰嗰陣整嘅一級護航航空母艦，一共整咗50艘，係二戰建造數量最多嘅航空母艦之一，到二戰完嘅時候一共有5艘被擊沉。

史

美國輪船製造商亨利·凱澤提出咗一種用流水線整預製件，再將部件焊接嘅造船方案。呢種方案曾經用嚟製造自由輪，但係美國海軍作戰部長恩斯特·金恩反對用呢種方式製造航空母艦，於是亨利·凱澤直接去搵總統富蘭克林，響總統嘅干預之下，海軍通過咗凱澤嘅製造方案。

同博格級護航航母唔同，卡薩布蘭卡級護航航空母艦全部留咗響美國海軍，其中得5艘參與咗大西洋嘅作戰，呢5艘當中又只有傳教灣號護航航空母艦係進行反潛作戰。而瓜達康納爾號護航航空母艦響反潛戰方面戰功赫赫，一共擊沉或者俘獲咗4艘德國U型潛艇，其中U-505號係美國自從1812年戰爭以嚟第一次俘虜敵方嘅潛艇。

由於護航航母嘅航速低、裝甲薄，一般都唔可以承擔高強度嘅軍事對抗，通常係用嚟運輸飛機或者對地支援。戰後大部分嘅卡薩布蘭卡級護航航空母艦被拆解，有尐就轉作它用，而最後一艘航母泰芬斯灣號護航航空母艦響1964年俾人拆毀。

結構

卡薩布蘭卡級係美國第一級一開始就按護航航母設計嘅，而之前嘅護航航母多數係改裝。卡薩布蘭卡級好快就整完，通常只要3個月就能整到一艘，其中阿德默勒爾蒂群島號淨係整咗76日。卡薩布蘭卡級護航航空母艦嘅裝甲好少，淨係艦橋同魚雷庫周圍裝咗尐裝甲板。利斯康灣號護航航空母艦沉沒之後，響航空炸彈彈藥庫周圍就有咗用水同油兩溝嘅液體保護屏障，但係減少咗炸彈嘅存放量。

呢級航母擁有兩部𨋢同一部彈射器，一般搭載27架飛機，分別係9架戰鬥機、9架魚雷轟炸機同9架俯衝轟炸機；有時會配置18架魚雷轟炸機，唔要俯衝轟炸機。響實戰嘅時候配置都唔同，例如彼得羅夫灣號護航航空母艦就曾經搭載過16架F4F戰鬥機同12架TBF復仇者式轟炸機。