反修例運動示威者被自殺或失蹤爭議

反修例運動示威者被自殺或失蹤爭議，係指喺香港反逃犯條例修訂運動（反修例運動）期間，報稱有大量被捕人士失蹤或者被香港警察殺害嘅爭議。

公眾對自殺者真正死因嘅質疑

喺香港反修例運動期間，有啲民眾發現自殺案件數字節節攀升，而且海上發現唔少浮屍，有學者質疑呢啲自殺案件唔單純。自6月12號之後，每10天嘅自殺案件都維持在大約10人左右，但去到8月21號到31號，自殺案件突然飆升至18人，咁啱就係新屋嶺事件曝光嘅時間。八三一太子站事件後，自殺案件更高達49件。呢啲案件有啲疑點重重，包括墜樓無血跡，屍體反有舊傷等等。

其中被視為被自殺者，又比較多人關注嘅有郭振江、黃健茵、朱植雄同陳彥霖。

民間反應

為咗搵番有關失蹤者，有網民聯同社工、私家偵探等開設「被捕人士關注組」Telegram群組同埋其他Facebook專頁，盡可能上載所有被捕者嘅資料。其中facebook群組「香港失蹤人口關注組」喺2020年3月28號接受蘋果日報訪問嘅時候表示，仍然有二百至三百人未被搵番，每日平均有六十多個尋人帖子，有遊行示威嘅日子會更多。

政府同親中派反應

《文匯報》指呢啲消息「全屬子虛烏有」，只係用來煽動仇警情緒；警方曾回應指唔應該信謠言，認為造謠者「散佈恐怖情緒，誤導市民」，又表示現今資訊發達，任何人都無可能無端「消失」，且失蹤人口在修例風波下無異常增加。

不過，雖然警方正式回應嘅時候否認，但係喺香港警察入侵理工大學校園事件嘅審訊，有被告就引述入侵理大校園嘅警察對佢進行嘅恐嚇，話有警察對佢哋講「你有無發覺呢排多咗好多浮屍？」，對話恐嚇示威者同串連反修例運動示威者被自殺或失蹤嘅爭議入面。