反修例運動警察假扮示威者破壞嘅指控

喺香港反逃犯條例修訂運動（反修例運動）期間，有啲親中派嘅支持者指控示威者採取暴力手段，破壞一啲商店同公共設施。不過，之後有媒體報導同網上片段流傳疑似示威者破壞嘅情況，但呢啲示威者竟然有唔少警察先會有嘅裝備，有啲人就質疑，呢啲破壞其實係香港警察、甚至係中共武警公安假扮示威者去做，目的係抹黑示威者，為鎮壓揾藉口。呢啲講法，得到國際特赦組織一個報告提及有一定證據支持，警察否認有關指控，但就承認有臥底警員喺示威場合入面假扮抗爭者。

部分事例

• 喺2019年9月，香港恒生大學學生會編輯委員會發布一段影片，影到喺銅鑼灣維園糖街入口位置，入面有兩個黑衣男子向香港警察掟汽油彈，其中一個人背囊上面有閃光裝置，但有民眾發現跟上去嘅警察嘅手臂上面，有藍色LED嘅發光手帶特別裝置，佢哋仲有胡椒噴霧、警棍等裝備，懷疑嗰兩個掟汽油彈嘅人，根本就係警察假扮嘅示威者。
• 喺2019年10月8號，網上廣傳兩條短片，其中一段影片見到，多個蒙面男子，喺當時已經關閉嘅港鐵上水站入面破壞閘機、售票機等，又拎住警察用嘅強光手電筒同埋胡椒噴霧恐嚇目擊者。有市民質疑，胡椒噴霧係屬於管制槍械，一般人被發現買賣都屬違法，一般示威者都唔會攞到。
• 去到10月14號，有港鐵員工揭露，港鐵係因應政府要求製造呢啲示威者破壞嘅假象，特登開少啲入閘機，聲稱入閘機壞咗但其實全部運作正常，企圖增加市民對示威人士嘅不滿。另一方面，香港警察假扮示威者喺港鐵進行嘅破壞行為，仲包括有放火同灌水，同時仲配合埋親中派無綫新聞嘅獨家報道，抹黑示威者。

外界反應

• 美國共和黨海外事務組織副主席俞懷松（Solomon Yue）對香港警察嘅做法公開批評，話佢哋嘗試嫁禍抗爭者。
• 公民黨主席梁家傑質疑，照呢個講法，咁有好多事件其實都可能係警察嘅「臥底」挑動、策劃或者做出來，但就由抗爭者食死貓。佢又引述國際特赦組織嘅報告，批評警察嘅做法。
• 民主黨前區議員林詠然話，大家已經喺網上面睇得好清楚，好多都係警察假扮成抗爭者搞破壞，做好多違法嘅嘢，講到尾就係林鄭月娥唔敢面對事實。林詠然又話，如果有獨立調查委員會，全面調查嘅話，肯定會揭發更多嘅黑幕同唔見得人嘅嘢。