台山話

台山話（toi4 saan1 wa5*2）（台山話讀 /hᵘɔi²² san³³ va³²⁻³²⁵/）屬粵語四邑方言片，係四邑話嘅代表語言。好多情況下台山話就係四邑話嘅代名詞。

台山話
用嘅國家、地區	中國廣東省四邑地區及海外華人地區
講嘅人口	—
系屬	漢藏語系 漢語族 粵語 四邑話 台山話
文字	漢字
官方地位
官方語言	無
管理機構	無
語言代碼
ISO 639-1	無
ISO 639-3	—
ISO 639-6 (經已唔用)	tisa

分布範圍

台山話（四邑話）主要分布喺中國大陸廣東省江門市（原稱四邑，後因鶴山加入改稱五邑）嘅新會、台山、開平、恩平四縣（市），以及江門市區、鶴山嘅部分地區，大陸以外嘅華人社區（尤其是北美）。江門市區講帶有好多五邑話發音特點在內嘅白話。

江門五邑介紹

江門五邑（台山、新會、開平、恩平及鶴山）流通嘅一般都係四邑粵語同廣州粵語（廣州話）。五邑（舊名四邑）粵語以台山話（台城話）為代表。台山係一個著名僑鄉，海外台山華僑130萬，台山本地區人口110萬。出名嘅藝人，好似Beyond樂隊嘅黃家駒、黃家強兄弟，陳百強、麥嘉等等都係台山人。

語言特點

台山話（四邑話）係粵語各種方言中相當之具有特色嘅一種，同廣州話差異明顯。差異嘅表現喺語音上，亦表現喺辭彙上。

語音

同標準粵語一樣，台山話保留咗許多古漢語語音嘅特點。喺某啲方面比標準粵語保留嘅成分更多。例如，佢完整保存咗四種入聲，「北白伯百」四個字音調都唔同（粵語中百、伯同音）。

台山話共有9個音調，參考粵語音調分別記為陰平/陰去（衣/意）、陰上（倚）、陽平（移）、陽上（以）、陽去（易）、中入（百）、陰入（北）、低陽入（伯）、高陽入（白）。採用五度標音法時，呢啲音調嘅調值分別係33、55、11、21、32、33、55、21、32。同粵語相比，調值有所改變，合併咗陰平同陰去，而原來合併為中入音嘅低陽入就保持獨立。

聲調表

聲調	陰平 （中平）	陰上 （高平）	陰去 （中平）	陽平 （低平）	陽上 （低降）	陽去 （中降）	陰入 （高促）	中入 （中促）	低陽入 （低降促）	高陽入 （中降促）
調值	33	55	33	11	21	32	55	33	21	32
粵語調值	55/53	35	33	21/11	13	22	5	3	3	2
編號	1	2	1	3	4	5	6	7	8	9
代號	•	-	•	*	>	'	•	-	>	'
漢字舉例	衣	椅	意	移	以	易	北	百	伯	白
拼音（標示調類）	yi1	yi2	yi1	yi3	yi4	yi5	bak6	bak7	bak8	bak9
國際音標（標示調值）	ji33	ji55	ji33	ji11	ji21	ji32	pak55	pak33	pak21	pak32

此外，台山話重有變調現象，主要包括三種情況：

• 升變調，將一字嘅調值喺最尾升到最高。除咗陰上同陰入之外，其他音調都可以升變調。除入聲外重有4種可升變調嘅音調，令到實際發音嘅調式增加4種：

• 33->35 例如：學生³³証->學生³⁵
• 11->15 例如：金錢¹¹->工錢¹⁵
• 21->215 例如：該²¹（呢/哩）->該²¹⁵（呢度/哩度）
• 32->325 例如：話³²說->講³²⁵

而入聲變調時，會喺最尾一字後尾加上一個e⁵⁵音節。甚至有時非入聲字變調亦可拉長出一個e⁵⁵出來，意思不變。例如該²¹欸⁵⁵=該²¹⁵。 呢種變調應用廣泛，常用於名詞詞尾（包括單音詞）。學者鄧鈞認為相當於現代標準漢語嘅兒化現象。

因爲欸e⁵⁵呢個字有時跟喺動詞後面做助詞，形式上同升變調相似，亦有類似簡化為音調改變嘅現象，因此需要辨析。例如：跟欸我=跟著我，講得快都會變成跟³⁵我。呢種情況因為欸字有語法含義所以同名詞嘅變調唔多相同。至於兩種形式相似嘅變調係咪有聯繫就未有結論。

• 高平變調，將一字嘅聲調根據原讀音係咪入聲分別變爲陰上或陰入，調值55。用於某啲辭彙，往往因為台山話嘅33調值部分對應於粵語嘅55調值，因此喺部分辭彙中沿襲音調。例如「上高」（上面）後一字音調同粵語。此外，呢種變調喺標準粵語中亦廣泛存在。
• 低降變調，將一字嘅聲調根據原讀音係咪入聲分別變為陽上或低陽入，調值21。特點如下：

• 可用於對現有嘅字進行轉義，例如竇字用於“窩”、“洞穴”等意思或作量詞時使用低降變調，用於其他含義用正常調值32。
• 有時被變調嘅字意義完全唔變，但喺不同嘅配搭有不同嘅讀法。例如「章魚¹¹」嘅魚字唔變調，「墨魚²¹」嘅魚字變調。
• 被變調嘅字可以出現喺詞語開頭。例如：木³²工→木²¹頭
• 低降變調後重可以再升變調，例如「買魚²¹⁵」。

此外，重存在一啲零散嘅變調現象。台山話嘅變調研究目前重未充分，處於歸納階段，關於幾時用邊種變調，重未有好明確嘅總結。

台山話將古音以t為聲母嘅字（如打）變成零聲母，因此會有大量零聲母嘅字。當呢啲字跟住一個鼻音音節時，就會連讀成一個音節。另外重有一啲類似嘅音變。

此外，某啲字詞往往有文白兩種讀音，而部分字詞嘅發音沿襲或仿照粵語發音而唔係跟循本地發音。

文法

台山話喺文法方面一個突出嘅特點，就係人稱代詞單複數嘅表達。同標準粵語以及現代標準漢語唔同，佢唔用詞尾（粵語「哋」，標準漢語「們」）區分，而喺通過變調、變音等內部屈折來表示。另外，指示代詞中表示「呢」同埋「呢度」嘅「該」，表示「嗰」同埋「嗰度」嘅「恁」亦通過屈折來區分。

• 人稱代詞：我ŋɔi³³（單）→我ŋɔi²¹（複）；你ni³³（單）→你niεk²¹（複）；佢k'ui³³（單）→佢k'iεk²¹（複）；另有一個「非特指第三人稱」代詞，相當於「人哋」或者「第個」：惗niεk⁵⁵，可以單獨用，亦可以組成「人惗」，意思一樣，無單複數。注意佢個發音除音調外同複數嘅「你」相同但意思完全唔同。
• 指示代詞：該k'ɔi²¹=呢 → 該k'ɔi²¹⁵=呢度；恁nen²¹=嗰 → 恁nen²¹⁵=嗰度
• 疑問代詞：乃nai²¹=邊 → 乃nai²¹⁵=邊度

疊用形容詞方面，台山話可以將兩個字重疊，其中一個升變調，以表示程度。一般第一個字變調，表示程度加強；第二個字變調，表示程度減弱。例如「紅紅」可以表示「非常紅」（紅¹⁵紅¹¹）或者「有啲紅」（紅¹¹紅¹⁵），取決於邊一個字有變調。

兜字係台山話特有量詞，粵語同標準漢語都叫「棵」。粵語量詞「啲」被細分成兩個，倷（nai⁵⁵）同埋伱（nit⁵⁵）程度唔同，前者要比後者表示更多嘅數量，至於「啲多」就變成「伱子」（nit⁵⁵du³⁵）

句法方面，大部分同粵語相同，但下面呢個係台山話特有嘅句型：

• 我都聽唔見句。（我一句都聽唔到）

辭彙

以下詞彙為台山話部分特有詞彙同埋俗語：

• 打暴：第一次
• 法嚹：窿嚹，法字讀陽上（21）。
• 險過老鼠噬貓鼻：俗語，形容極度危險。
• 斧頭唔大柄大：俗語，形容某件事情次要部分嘅開銷比主要部分重高。
• 三個狗仔數過夜：俗語，比喻做嘢慢。
• 跟著好人做好人，跟著生婆學拜神：生²¹婆，即神婆，幫人做法事或者算命看相等等嘅女人。
• 喃譕佬撞到狗—冇細符：歇後語，喃譕佬，指專門幫人做法事嘅道士或和尚；冇細符=冇辦法，同粵語冇晒符，但喺度細字語帶雙關。
• 未見過大蛇屙屎，生雞漏蛋—少見多怪：歇後語，生雞指冇閹到嘅公雞。（粵語亦有大蛇屙尿一說，但呢個較為完整）

代表語言及方言

台山話（四邑話）係以台山台城鎮為中心嘅，越偏離呢個中心嘅發音就越接近於粵語粵海片（廣州話）。因此，鶴山同埋江門市區嘅口音更接近廣州話。台山話嘅代表語言係台城話，發音同白話嘅區別比其他台山話更加大。

花絮：日月潭

台山話中日同月兩個字好容易造成混淆，但呢兩個字並唔同音，甚至差別唔算好細。但係由於各地方言嘅差異，開平赤坎片方言中嘅「月」字啱啱同台山水步片方言中「日」字同音。咁啱喺開平市操這兩種口音嘅人都好多。於是「三個月」嘅個字常因連讀省略，同「三日」混淆。遇到呢個情況，請務必要對方講清楚，中間係咪有個「個」字，因爲「三個日」係唔啱語法嘅。呢度對初學者來講係一個可能會遇到嘅「潭」（氹），故名為「日月潭」。