嗣聖

嗣聖（嗣讀字，粵音：zi⁶ sing³；684年1月23日—684年2月27日），係唐中宗李哲（哲讀折，粵音：lei³ zit³） 第一次在位嗰陣所改嘅唯一年號，用咗兩個月都唔夠。因為嗰個年號用嗰陣由皇太后武則天臨朝稱制，攞住實際大權，所以有尐史書話佢係武則天嘅年號，但係大部分史書重係寫佢做李哲嘅年號。呢個年號淨係用咗1個月又6日（嗣聖元年二月初六，684年2月26號）。跟住，唐中宗就因為一句戲言而俾母后武則天捉住把柄廢咗去，第二日（即係嗣聖元年二月初七，684年2月27號）唐高宗李治個細仔李旦登基，改元文明，嗌唐睿宗，而「嗣聖」年號跟住就廢咗。

嗣聖 684年 正月初一（1月23日）—二月初七（2月27日）
政權	大唐
君主	中宗大和大聖大昭孝皇帝李哲（或李顯） 則天皇太后武氏
歷時	兩個月
嗣聖喺大唐同埋唐中宗李顯時期嘅位置。

「嗣聖」年號嘅廢止同「文明」年號嘅建立，標誌住武則天「聖衷獨斷」嘅時代開始，「則天朝」亦隨之開始。

開年號

大唐第一位皇太后、亦係中國唯一嘅女皇帝——武則天

弘道元年十二月初四丁巳日（683年12月27日），天皇（唐高宗）李治喺洛陽洛陽宮貞觀殿駕崩。過咗兩日，即弘道元年十二月初六己未日（683年12月28日），皇太子李哲喺先帝靈柩前即皇帝位，是為唐中宗，尊天后武氏為皇太后。

弘道二年正月初一甲申日元旦（684年1月23日）改元嗣聖。嗣，代表繼承；聖，聖人、聖王、聖帝，指先帝唐高宗；「嗣聖」即係繼承先帝遺志嘅意思。

大事記

講錯嘢嘅罪

弘道二年春正月初一甲申日元旦（公元684年1月23號），改年號做嗣聖，大赦天下。立太子妃韋氏做皇后，將韋皇后個老豆韋玄貞嘅職位由普州（治所喺而家四川省安岳縣）參軍提升做豫州（治所喺而家河南省汝陽縣）刺史。

正月初十癸巳日（684年2月1日），任命散騎常侍韋弘敏 做太府寺卿（九卿之一）、同中書門下三品（就同宰相級別差唔多），接替喺舊年十二月三十除夕（684年1月22日）被炒魷魚嘅宰相郭正一。

同一年，杞王兼沔州（治所喺而家河北省武漢市漢陽區）刺史李上金、鄱陽郡王李素節同埋義陽公主、宣城公主兩個公主知道父皇高宗嘅訃告之後，喺外地趕嚟東都洛陽奔喪。左武衛將軍檢校左羽林將軍黑齒常之升官做左武衛大將軍。

唐中宗想將國丈韋玄貞再將豫州刺史升官做侍中（門下省長官、宰相中嘅第二位），重想封自己個乳母個仔做五品官。中書令（中書省長官、首席宰相）裴炎據理力爭，堅持認為唔可以。激到中宗好嬲，同左右侍臣講：「我就算將成個天下讓畀韋玄貞，又點啫？！唔通就稀罕一個侍中嘅位咩？！」 裴炎好驚，走咗之後將呢件事同太后禀報，兩人定下咗廢黜中宗、另立新帝嘅計劃。

廢中宗，立睿宗

嗣聖元年二月初六戊午日（公元684年2月26日），太后去到東都洛陽嘅皇宮正殿——洛陽宮乾元殿，召集百官。裴炎同原北門學士成員中嘅三人——中書侍郎劉禕之、左驍衛大將軍檢校左羽林將軍程務挺同右領軍大將軍檢校右羽林將軍張虔勖率兵入去大殿，宣佈太后嘅命令，廢中宗做廬陵王，將廢帝扶落殿。廢帝問：「我有咩罪？」太后答佢：「你想將天下讓畀韋玄貞，點會無罪？」 於是將廢帝囚禁喺第二處，而啱啱做皇后嘅韋氏亦都廢埋，家屬更被發配嶺南。第二日，武太后立佢個細仔李旦為帝，佢就係睿宗，改元文明，「嗣聖」年號被廢止。

喺呢個年號期間出世嘅人

• 高力士（喺684年出世，可能喺「嗣聖」嗰陣出世，又或者喺「文明」嗰陣出世）

喺呢個年號期間死嘅人

• 大唐飛騎部隊入面嘅十幾個士兵：因為想跟隨廢帝廬陵王李哲而被人篤背脊，跟住被人殺咗，但時間有懷疑。

紀年

嗣聖	元年
公元	684年
干支	甲申

參考資料

年號參考資料

1. 《中華五千年長歷》，氣象出版社寫嘅，2002年9月第1版 ISBN 7-5029-3090-6
2. 《中國歷代年號考》，李崇智寫，中華書局出版，2001年1月第2版，第100页 ISBN 710102512021
3. 《中日朝三國歷史紀年表》，徐紅嵐寫，遼寧教育出版社1998年出版，第150頁 ISBN 7538276193
4. 《中國歷代帝王年號手冊》，陳光寫，北京燕山出版社出版，第225-226頁 ISBN 7540210311
5. 《辭海縮影版·附錄·中國歷史紀年表》，上海辭書出版社出版，1999年1月第1版
6. 《唐會要》，北宋嗰陣王溥編

大事記參考資料

1. 《舊唐書》，五代嗰陣劉昫等人撰寫
2. 《新唐書》，北宋嗰陣歐陽修、宋祁等人撰寫
3. 《資治通鑒》，北宋人司馬光等撰寫

有關其他資訊

1. 《武則天傳》，台灣人雷家驥撰寫，人民出版社出版，2001年11月第1版 ISBN 7-01-003453-2/K·696
2. 《武則天》，唐浩明撰寫，甘肅人民出版社出版，2005年8月第1版 ISBN 7-80635-999-1/I·528
3. 《實事求是說帝王——女皇武則天》，吳江著，中國長安出版社出版，2007年1月第1版 ISBN 978-7-80175-550-6
4. 《中國皇后傳·唐高宗李治皇后——武則天》，史海陽著，中國人事出版社 ISBN 7-80139-000-8

睇埋

• 相關人物：
  • 武則天：大唐第一位皇太后，唐中宗同唐睿宗生母，臨朝稱制，掌握實權。
  • 唐中宗：即李哲，大唐第四任皇帝。
  • 裴炎：大唐中書令（首席宰相），同皇太后武則天同謀廢黜中宗。
  • 唐睿宗：即李旦，大唐第五任皇帝。