嘉傑

嘉傑係維基百科一位香港資深維基友，專長係寫香港同中國政治。不過喺2021年有中國大陸維基人用戶組成員指控佢濫用傀儡同喺中文維基百科持續搞破壞，畀當時濫權嘅管理員蟲蟲飛封殺，引起香港維基友被打壓嘅爭議。

個人介紹

擅長嘅領域主要係政治方面，特別係香港政治同中國政治。撰寫過關於香港政治嘅文章包括：反對逃犯條例修訂草案運動過程 (2019年12月)、反對逃犯條例修訂草案運動過程 (2020年1月)、香港特別行政區維護國家安全委員會、香港特別行政區候選人資格審查委員會等。撰寫過關於中國政治嘅文章包括：習近平新時代中國特色社會主義思想、以習近平同志為核心的黨中央、習近平崇拜、廢除干部領導職務終身制等。除咗喺中文維基百科寫文，亦都有參與粵文維基百科嘅編輯工作，幫粵文維基改正錯咗嘅內容。

封殺爭議

有唔少維基友為嘉傑抱打不平，認為佢嘅編輯根本唔符合持續出沒破壞（Vandalism）嘅定義，甚至可以話編輯內容係冇問題，亦唔構成違反Verifiability（可供查證）同違反Neutral point of view（中立嘅觀點），不過部分持有特定政治立場嘅中國大陸用戶堅持指控佢係一個破壞者，例如中國大陸維基人用戶組成員「Walter Grassroot」指控嘉傑係過去一年都非常活躍嘅破壞者，但冇提供任何證據；中國維基人「痛心疾首」將編輯聯合國大會第2758號決議嘅4個台灣IP都認定係嘉傑所為，指控佢違反ASF（明確表達）、NOR（非原創研究）、DUE（合理嘅比重）等一系列罪名。指控嘉傑係破壞者嘅清一色係中國維基人，其中Walter Grassroot、DavidHuai1999、Yining Chen等係中國大陸維基人用戶組成員。

有中國維基人將嘉傑寫落LTA頁面引起爭議，畀其他維基友以唔符合持續出沒嘅破壞者條件為理由申請刪除。身為中國大陸維基人用戶組成員嘅管理員「霧島聖」喺展開LTA頁面存廢討論一日之後就用無共識為理由關閉討論，明顯違反最少七日討論期嘅規定，引發爭議之後被提出發還再開放討論。

封殺影響

有維基友擔心嘉傑被封殺同被認定係搗亂慣犯之後，有唔同政見立場嘅編輯會被中國維基人老屈係佢嘅傀儡賬號。中國大陸維基人用戶組成員「Walter Grassroot」就將編輯立場同佢有衝突嘅香港IP用戶舉報係傀儡，有香港IP用戶因為編輯立場爭議畀中國維基人濫用「一望而知」指控係傀儡賬號，喺缺乏證據嘅情況下畀濫權管理員蟲蟲飛多次封殺，蟲蟲飛亦拒絕回應香港IP用戶嘅申訴。Walter Grassroot之後更加變本加厲，聲言要向警方國安處舉報香港編輯，令到負責管理維基百科嘅維基媒體基金會介入調查。

後續發展

根據維基媒體基金會嘅調查，中國大陸維基人群組同相關人士存在針對香港編輯嘅行為，基金會喺公開聲明入面提到「公開記錄顯示這其中有一部分用戶存在針對香港的中文社群成員的行為」。維基媒體基金會喺2021年9月13號，破天荒咁採取咗一系列行動，手起刀落全域封殺部分賬號同解除部分管理員嘅權限，蟲蟲飛、Walter Grassroot、霧島聖等人都牽涉其中，一係被徹底封殺，一係被免職，中國大陸維基人用戶組核心成員更加係被連根拔起。基金會法務部門副總裁瑪姬·丹尼斯話行動係有考慮中國大陸維基人同香港志願編輯之間嘅衝突。之後嘉傑嘅LTA頁面被刪除，從持續出沒嘅破壞者名單中剔除，事件暫告一段落。

睇埋

• 2021年維基媒體基金會針對中文維基百科嘅行動
• 中文維基百科嘅爭議