元朗
想搵第二個意思嘅話，請睇元朗 (搞清楚)。元朗係香港新界西北市區。響英國管治新界中期，選做新界西北面行政中心，到家下亦都係元朗區中心。元朗英文寫做 Yuen Long，早期就寫做 Un Long。
史
編輯根據考古發掘，元朗喺新石器時代就有先民活動。秦朝開始劃入中國版圖。
元朗一帶，地理環境以前同家下好唔同。古時元朗係汪洋一片，元朗舊墟一帶都係島。舊墟南便個地方叫大樹，即係家下十八鄉大旗嶺大樹下，係水上人，即係蜑家人嘅艇聚埋一氣嘅海灣。佢哋重響處起咗間天后廟，即係大樹下天后廟[1]。天后廟東面係蜑家埔，西面係蜑家灣。因為呢處多水上人，會同村民做買賣，所以就變成墟。廟記（1938年嘅《重修天后古廟碑記》）有寫：『三百年前，元朗河流上通南坑，中有高原矗然而深秀者，則大樹也，大樹東曰蛋家埔，大樹西曰蛋家灣，處居爰處，而浮家泛室之流，若輩崇仰水神，在大樹下建小廟，以祀天后。』[2][3]後尾因為個海畀河沙積，或者村民圍淺海做田，就慢慢變成地，個墟後尾搬到去大橋墩。再因為同樣原因，個墟又搬到個近海嘅地方，即係元朗。
元朗原本係指家下元朗舊墟一帶。由一個墟發展而來。香港全境曾經響大清中期受遷界令打擊，人口大減。1668年，即係康熙七年，大清皇帝愛新覺羅玄燁准村民返屋企。之後一年，1669年，即係康熙八年，錦田進士鄧文蔚封咗地開墟。佢就搬咗響原本響大橋墩嘅大橋墩墟到圓蓢，呢件事亦都寫咗響舊墟天后廟《重修天后古廟碑》，『清康熙八年大橋墩市場改遷元朗』。塊碑係1856年，即係大清咸豐六年，愛新覺羅奕詝做皇帝嗰時（變調讀史）立嘅。因為搬到元朗，亦都改名做圓蓢墟，後尾變做圓朗墟，最尾寫成變咗元朗墟，亦即喺元朗舊墟。
到咗1899年，英國人接收新界，元朗成為香港一部分。英軍無耐就開始起青山道（今日嘅青山公路），將元朗同九龍打通，方便統治之餘，亦都改變咗新界經濟面貌。響呢個時候，因為元朗墟唔夠用，亦都有鄉民嫌錦田人收租收得貴，就響1915年青山道附近，就係家下青山公路同合益街一帶，另開新墟，叫元朗新墟。啲人亦都叫青山公路做大馬路或者元朗大馬路。原本元朗墟就畀人叫舊墟，墟唔近大馬路，無咁方便，最後都沒落。
1907年香港政府揀咗大埔做新界管治中心，叫理民府。之後，再一分為二，元朗一帶屬於北約理民府，係大埔管。1947年，北約理民府分為元朗理民府同大埔理民府。元朗就成為新界西嘅管治中心。
因為經濟同政治中心都響元朗新墟一帶，所以呢度亦變得越來越大，人口越來越多。香港政府亦都介入呢度嘅發展，好多公共設施都起響元朗。墟市呢個形式亦都慢慢淘汰。1972年政府將元朗規劃做衞星城市。1982年再將元朗加埋屏山同附近地方連埋規劃做元朗新市鎮。
註
編輯- ↑ 衞星圖
- ↑ 〈大樹下天后廟簡介〉。原著喺2007年5月5號歸檔。喺2007年2月26號搵到。
- ↑ 〈香港城市大學中國文化中心嘅網上刊物:《香港節誕》。十八鄉大樹下天后誕主頁：甲、十八鄉的組成〉。原著喺2005年3月8號歸檔。喺2017年7月16號搵到。