土瓜灣天后廟

土瓜灣天后廟係香港九龍土瓜灣一座天后廟，1885年建成，位於下鄉道同落山道交界，依家被列作香港三級歷史建築，並由華人廟宇委員會管理。

歷史

土瓜灣天后廟係清朝光緒十一年（1885年）由客家漁民籌建，建於當時嘅海邊，近當時嘅土瓜灣村旁邊。建廟時所鑄嘅銅鐘至今仍然得以保存。該廟喺1888年重修過，現存入口嘅門額「天后古廟」四字就係嗰時寫嘅。1860年代，嗰度有小村落叫土瓜灣村，當時可以由天后廟遠眺海心廟。後來幾次小規模填海已經將海岸線推出並拉直。

1970年代，土瓜灣海心島嘅龍母廟因填海而拆卸，龍母像就改設喺土瓜灣天后廟。

建築

土瓜灣天后廟屬兩進三開設計，兩邊設有廂房，天井位置就改為拜殿。而後進嘅屋頂有魚尾形嘅裝飾。

天后廟正殿供奉天后娘娘，右側嘅偏殿就供奉觀音、王母、龍母同列聖。